Read O Debleskro Drom - I Bibla an o Romano Rakepen 2021 Maleachi 2 Bible Online

Maleachi 2 - O Debleskro Drom - I Bibla an o Romano Rakepen 2021 bible

Maleachi 2

¹O baro Dewel, ko rai pral o bolepen un i phub, penell ap i rashajende: Un kanna, tumer rashaja, kau lab hi tumenge: Hadenn man un krenn, hoi tumendar kamau. Te kamenn gar te shunell, hoi tumenge penau, palle tchiwau i praassepen ap tumende un bitchrau tumenge bibacht. Un koi bacht, hoi ap tumende tchiddo hi, well i bibacht. Tchatchepah, o praassepen hi ap tumende tchiddo doleske, kai lan gar ap tumare djia, hoi tumenge penom.

³Dikenn, hoi me kamau te krell: Kolla, kai tumendar wenna, kolen phagau. Un o ful kol viechendar, hoi tumer mange anenn, witsrau me an tumare muja. Un tumer wenn win witsedo khetne o fuleha.

⁴Palle haiwenn, kai kowa, hoi pral tumende was, mandar was, jaake har me tumenge penom. Kowa, hoi win krom kolentsa dran o kheer Levi, hunte atchell tardo, penell o baro Dewel, ko rai pral o bolepen un i phub.

⁵Lentsa krom win, te dap len djipen un latchepen, un jon hadan man. An kol diwessa shunan le ap mande, un len his traash mandar.

⁶Jon anan i menshenge kowa pashel, hoi tchatcho hi. Un kek tchilatcho lab his an lengre muja. Jon djiwan glan mande an o latchepen un an o tchatchepen, un rikran bud menshen o tchilatchepastar pale.

⁷Kowa hi i rashajengri budi: Jon hunte penenn o Debleskro lab an o tchatchepen, te nai djan i menshe pash lende, te kamenn le te djinell, hoi o baro Dewel lendar kamella. I rashaja hi i bitchepangre o baro Deblestar, ko rajestar pral o bolepen un i phub.

⁸Tumer rashaja nashan miro dromestar ap i wawar drom. Un bud menshe peran tumentsa miro dromestar tele. Tumer sikran lende buder gar o tchatcho drom, un phagan ko lab, hoi me i Levitarentsa win krom. Doleske penau me, o baro Dewel, ko rai pral o bolepen un i phub:

⁹Tumer rikran tumen gar ap miro drom, un dikan ap o mensheste, har an-diklo job hi, har penan leske, hoi te krell lo. Doleske krom tumen pale-tchiddo, un tchiwom ladj ap tumende glan i tsele menshende an Israel.

¹⁰Men halauteren hi jek dad! O emligo Dewel kras men halauter! Hoske phukrell ko jek ap o wawareste, un rikrell pes gar ap kowa, hoi o baro Dewel mare phurentsa win kras?

¹¹I menshe dran Juda phagan pengri sowel, hoi dan le pengro Debleste. Un an o them Israel un an o foro Jerusalem djal djungelo koowa, hoi i menshen pale-tchiddo krell. I mursha an Juda romedineran djuwjen, kai wawar deblen an-mangenna. Un jaake kran le o kheer pale-tchiddo, kai o baro Dewel djiwell, un hoi lo kamell.

¹²Mu tchiwell o baro Dewel hako murshes pale, kai sau koowa kras, te djiwell job buder gar mank peskre menshende Israel, job gar un leskri familja witar gar, ninna te anell lo tchomone an o kheer o baro Deblestar, ko rajestar pral o bolepen un i phub.

¹³Koi hi gomme i wawar koowa, hoi tumer kran: Te wenn tumer glan o baro Debleste, un o baro Dewel dikell gar latches ap kowa, hoi leske anenna, un kamell tchi dran tumare wasta te lell, palle rowenn tumer un denn gole, un tumare swa tchakrenn leskri chatchepaskri.

¹⁴Un tumer putchenn: ‘Hoske lell lo tchi mendar?’ Djiness! O baro Dewel his pashel, har tu romedineral tiri romni har terno hals. Un tu lal tuke i wawar un chochral tiri romjat, ninna te his li koja, kai tuha djiwas. Un tu phagal tiro lab, hoi lake dal glan o Debleste.

¹⁵Kek krals sau koowa, te wals i tikno kotar fun miro ducho an leste. Job kamals tchawe te lell, kai o Debleske koi hi. Doleske denn jak an tumare djia, te chochell un mukell kek tumendar peskri romjat!

¹⁶Kowa kai choirell pes pral peskri romni, un tradell lat krik, krell i baro djungelo koowa, penell o baro Dewel, ko rai pral o bolepen un i phub. Doleske denn jak an tumare djia: Ma phagenn ko lab, hoi lake dan, har penan: ‘Me mukau tut gar.’

¹⁷Tumer choirenn o baro Debles tumaro rakepah! Tumer penenna: ‘Har choiram mer les?’ Tumaro rakepen hi: ‘An o baro Debleskre jaka hi i tchilatche latcho. Job kamell len.’ Tumer penenn ninna: ‘Kai hi o Dewel, kai men i phagi della?’