Read O Debleskro Drom - I Bibla an o Romano Rakepen 2021 Maleachi 3 Bible Online

Maleachi 3 - O Debleskro Drom - I Bibla an o Romano Rakepen 2021 bible

Maleachi 3

¹O baro Dewel, ko rai pral o bolepen un i phub penell: Denn jak, me bitchrau miro bitchepaskres! Job krell glan mande o drom jaake, har mange mishto hi. Un ko rai, kolestar tumer penenn, te rodenn les, kowa well sik pash peskro kheer. Ko bitchepaskro, kai tumentsa pral kowa rakrell, hoi tumentsa win krom, ap koleste tumer tumaro tselo djijeha dikenna, job hi gar dur.

²Koon tumendar nai rikrell ko diwes win, job te wella? Un koon tumendar nai atchell glan leste tardo, job te mukell pes te dikell? Job hi har i soreli sapuni un har i jag, hoi chatchell i tchik an o saster krik.

³Job krell har jek, kai krell o rup djudjo an i jag. Job krell i rashajen dran o kheer Levi jaake djudjo, har sonakai un rup djudjo kerdo wenna. An ko tsiro anenn jon o baro Debleske sawe viechen, hoi tchatcho hi glan leskre jaka.

⁴Un o baro Dewel dikell latches ap kowa, hoi i menshe dran Juda un dran Jerusalem leske anenna, jaake har kowa his glan bud bersha.

⁵Un me kamau pash tumende te well, te wap tumaro tchatchepaskro rai. Un mange nai patsenna, me rakrau o tchatchepen win pral i menshende, kai hadenn man gar: kolla, kai durkrenna, kol mursha, kai chochran pengri romjat, un kol djuwja, kai chochran pengri romes, kolla, kai phagenn pengri sowel, un kolla, kai djan djungeles kolentsa trujel, kai budrenn lenge, un kolla, kai chochenn kol djuwjen, kolengro rom meras, un kolla, kai chochenn kol tchawen, kolen buder kek dad hi, un kolla, kai rikrenn kol wi-themarjen tele, kai djiwenn mashkral tumende. Ko penell o baro Dewel, ko rai pral o bolepen un i phub.

⁶Me, o baro Dewel, atchau har hom. Un tumer, o Jakobeskre tchawe, atchan ninna har hans:

⁷Tumer mukan miro drom har tumare phure ninna kran, un rikran tumen gar ap mire laba. Mukenn kanna tumaro tchilatcho drom! Un awenn pash mande pale! Un me kamau pash tumende te well. Ko penell o baro Dewel, ko rai pral o bolepen un i phub. Tumer penenn: ‘Hoi kram mer, hoi tchilatcho hi?’

⁸Me putchau tumendar: Hi mishto i menshestar, te tchorell lo o Deblestar har tumer mandar tchorenna? Koi pre penenn tumer: ‘Hoi kram, har tchoram tutar?’ Tumer denn man gar o deshto halauterestar, hoi dren lan, witar gar kowa, hoi hunte dans i rashajende.

⁹Doleske han praassedo! Halauter tumendar tchoran mandar.

¹⁰Anenn o deshto kotar halauterestar, hoi dren lan, an miro kheer, te well doha chapen an miro kheer. Un dikenn, hoi me palle tumenge krau: Me krau miri wochni an o bolepen pre, un dau tumen bud latcho koowa, budeder har tumen hunte well. Ko penell o baro Dewel, ko rai pral o bolepen un i phub.

¹¹Un me rikrau i stepangren dur krik tumari phubjatar, te chan le gar kowa pre, hoi kote baro was. Un tumare drakengre ruka wenn pherde drake. Ko penell o baro Dewel, ko rai pral o bolepen un i phub.

¹²Un i menshe an i tsele themma penenn pral tumende: “Dikenn, har bachteles jon hi! Hawo shukar them len hi!” Ko penell o baro Dewel, ko rai pral o bolepen un i phub.

¹³Tumer rakrenn djungelo koowa pral mande, penell o baro Dewel. Tumer putchenn: ‘Hoi penam pral tute?’

¹⁴Tumer penenn: ‘Dineles hi, te das maro djipen an o Debleskro wast. Hoi anell menge kanna, te rikrah leskre laba, un mangah men tele glan o baro Debleste, ko rajeste pral o bolepen un i phub?

¹⁵Doleske sharas mer kolen, kai phurdenn pen pre pral o baro Debleste. Kol tchilatchenge djal mishto. Ninna te krenn le, hoi o Dewel gar kamell, krell lo lenge tchi. Kek bibacht well pral lende.’

¹⁶Koi rakran kolla mank pende, kai djiwenn o baro Debleha. Un o baro Dewel das jak ap lengre laba un shunas, hoi le penenn, un mukas len an i liil dren te tchinell, te wenn le gar bistedo. An kau liil hi kolla dren tardo, kai djiwan leha, un hadan leskro lab.

¹⁷Un pral lende penell o baro Dewel, ko rai pral o bolepen un i phub: Ap ko diwes, kai me wau, sikrell pes, kai hi le mire. Un me krau miro dji lenge jaake pre, har i mursh peskro dji pre krell peskro tchaweske, kai leske koi hi.

¹⁸Palle dikenn tumer pale, kai djal gar emliges kolenge, kai an o tchatchepen tardo hi un kolenge, kai krenn o tchilatchepen. Djal wawartchandes koleske, kai mangell o Debles an, har koleske, kai mangell les gar an.

¹⁹Doleske denn garda, ko diwes wella, un an ko diwes chatchella har i jag an i bob. Un i tsele tchilatche un kolla, kai phurdan pen pre pral mande, jon hi har phuss, hoi i jag chatchrell. Tchi atchell lendar pral, halauter wenn krik lino. Ko penell o baro Dewel, ko rai pral o bolepen un i phub.

²⁰Tumenge penau kowa, tumenge, kai mantsa djiwenn: Tumenge djal o kham pre un anell tumenge o tchatchepen. Un leskro tatepen krell tumare duka sasto. Un tumer stenna i bachtjatar har terne grumja, hoi wenn win dran i stanja.

²¹Ap ko diwes, kai me wau, stakrenn tumer kol tchilatchen khetne. Jon wenn har tchik tel tumare pire. Kowa penell o baro Dewel, ko rai pral o bolepen un i phub.

²²Mukenn tumenge mire tchatchepaskre laba an o shero te well, hoi penas tumenge o Mose, koles miro wast his. Leske penom ap i berga Horeb, hoi kamau tumendar, i tsele Israelendar, te krenn tumer.

²³Denn garda, me bitchrau tumenge miro rakepaskres, o Elija, glan te well ko baro diwes, kai miri choli pral i menshende well.

²⁴Job lell o tchingepen krik mank i dadende un lengre tchawende. O djijestar rodell jek i drom pash o wawareste. Jaake hunte wap me gar, te tchiwap i praassepen pral o tselo them.