Read O Debleskro Drom - I Bibla an o Romano Rakepen 2021 Mateo 1 Bible Online

Mateo 1 - O Debleskro Drom - I Bibla an o Romano Rakepen 2021 bible

Mateo 1

¹Kawa hi o liil, hoi sikrella, koon o Jesus Kristeskre phure his. Mank lende his o David un o Abraham.

²O Abrahameskro tchawo his o Isaak. Leskro tchawo his o Jakob. Koleskre tchawe his o Juda un leskre phrala.

³O Juda las tchawen. Kolla his o Perez un o Serach. Lengri dai his i Tamar. O Perez las i tchawes. Kowa his o Esrom. Koleskro tchawo his o Aram.

⁴Koleskro tchawo his o Amminadab. Koleskro tchawo his o Nason. Koleskro tchawo his o Salmon.

⁵Koleskro tchawo his o Boas. Koleskri dai his i Rahab. O Boas las i tchawes. Kowa his o Obed. Koleskri dai his i Rut. O Obed las i tchawes. Kowa his o Isai.

⁶Koleskro tchawo his o David, ko baro rai. Koleskro tchawo his o Salomo. Koleskri dai his i romni fun o Urija.

⁷O Salomo las i tchawes. Kowa his o Rehabeam. Koleskro tchawo his o Abia. Koleskro tchawo his o Asaf.

⁸Koleskro tchawo his o Josafat. Koleskro tchawo his o Joram. Koleskro tchawo his o Usija.

⁹Koleskro tchawo his o Jotam. Koleskro tchawo his o Ahas. Koleskro tchawo his o Hiskija.

¹⁰Koleskro tchawo his o Manasse. Koleskro tchawo his o Amos. Koleskro tchawo his o Josia.

¹¹Koleskre tchawe his o Jojachin un leskre phrala. Ap ko tsiro wan i Israelitarja pandlo, un wan an o them Babilonia anlo.[1]

¹²Un har jon an o them Babilonia djiwan, was o Shealtijel boldo. Leskro dad his o Jojachin. Un o Shealtijel las i tchawes. Kowa his o Serubbabel.

¹³Koleskro tchawo his o Abihud. Koleskro tchawo his o Eljakim. Koleskro tchawo his o Azor.

¹⁴Koleskro tchawo his o Zadok. Koleskro tchawo his o Achim. Koleskro tchawo his o Eliud.

¹⁵Koleskro tchawo his o Eleasar. Koleskro tchawo his o Mattan. Koleskro tchawo his o Jakobo.

¹⁶Koleskro tchawo his o Josef. Koleskri romni his i Maria. Lakro tchawo hi o Jesus. Kowa kharella Kristo[2].

¹⁷Kol tsele phure, kai djiwan jek pal o wawar pal o Abraham un glan o David, his deesh-te-star phure. Un kol tsele phure, kai djiwan jek pal o wawar pal o David un glan ko tsiro, kai wan i Israelitarja an o them Babilonia anlo, his deesh-te-star phure. Un kol tsele phure, kai djiwan jek pal o wawar pal ko tsiro, un glan o Jesus Kristo, his ninna deesh-te-star phure.

¹⁸Un jaake his kowa, har o Jesus Kristo boldo was. Leskri dai his i Maria. Lakro pirno his o Josef. Har jon gomme gar romedino his, was i Maria wawartchandes dran o Debleskro Ducho.

¹⁹O Josef his i latcho mursh. Un job kamas kek ladj ap late anell. Doleske kamas lo lat tchorchanes te mukell.

²⁰Har leske kowa an o shero trujel djas, was o Debleskro bolepaskro pash leste an i suni, un penas: “Josef, tu Davideskro tchawo, ma traash, te less i Mariat pash tute, te romedineress lat! O ternepen was dran o Debleskro Ducho an late.

²¹Un joi lella i tchawes. Tu deh les o lab Jesus. Job lella i doosh peskre menshendar ap peste.

²²Kowa lauter was jaake, te well ko lab tchatcho, hoi o Dewel ap peskro rakepaskro penas:

²³I terni tchai, kai gomme kek murshestar an tapedo was, lella i ternepen. Un jon denn les o lab Emmanuel[3]. Kowa kharella: O Dewel hi mentsa.”

²⁴Un o Josef stas pre, un kras jaake, har o Debleskro bolepaskro leske penas. Un job las i Mariat pash peste.

²⁵Jaake rah, har ko ternepen gar boldo was, tchiwas lo pes gar pash late. Un har o tchawo boldo was, das job les o lab Jesus.