Read O Debleskro Drom - I Bibla an o Romano Rakepen 2021 Mateo 11 Bible Online

Mateo 11 - O Debleskro Drom - I Bibla an o Romano Rakepen 2021 bible

Mateo 11

¹Un har o Jesus peskre deesh-te-dui malenge penas, hoi hunte krenn le, djas lo dureder an i wawar biboldengre forja, te sikrell lo kote i menshende o Debleskro drom.

²Ap ko tsiro his o Johanni an o stilepen. Kote shunas lo, hoi o Jesus Kristo lauter kras. Un job bitchras peskre malen pash leste,

³un mukas lestar te putchell: “Hal tu kowa, kai hunte well? Hunte dikas mer ap i wawareste, te well lo?”

⁴Penas o Jesus ap lende: “Djan pash o Johanneste, un penenn leske, hoi tumer shunan un dikan:

⁵I korele dikenna pale un i bange nashenna pale. I nassele, kai lengro mass ap lende tele merell, kolla wenna sasto. Kolla, kai nai shunan gar, shunenna kanna. I mule wenna djido. I tchorwele shunenn o Debleskro latcho lab.[42]

⁶Un bachtelo hi kowa, kai choirell pes gar pral mande!”

⁷Un har o Johanneskre mala penge djana, rakras o Jesus ap kol bud menshende pral o Johanneste, un penas: Hoske djan tumer an o mulo them? Kaman tumer i murshes te dikell, kai hi har i patri, hoi i sorelo ducho pral i phub phurdella? Na-a, sawo mursh hi lo gar!

⁸Koon kaman tumer te dikell? Kaman tumer i murshes te dikell, kai an kutch koola rido hi? Na-a, sawo mursh hi lo witar gar! Kolla, kai riwenna kutch koola, djiwenn an i rajengre khera.

⁹Hoske djan tumer an o mulo them? Kaman tumer i Debleskro rakepaskro te dikell? Awa, kowa hi o Johanni. Un me penau tumenge: Job hi bareder har i Debleskro rakepaskro.

¹⁰Lestar hi tchinlo an o Debleskro lab: O Dewel penas ap peskro tchaweste: Me bitchrau i murshes glan tute ap o drom, te krell lo tuke i drom, te nai wess pash i menshende.[43]

¹¹Tchatchepah, me penau tumenge: Kek was boldo ap kai phub, kai hi bareder har o Johanni. Me penau tumenge ninna: O tikneder kolendar, kai mukenn man pengro rai te well, kowa hi bareder har o Johanni.

¹²Har o Johanni was un i menshen taufras, was o Debleskro newo tsiro. An kau tsiro dell o Dewel i menshen pash peste gole, te djan le ap leskro drom. Un bis kau diwes kamenn tchilatche menshe i sorjah o Debleskri budi paash te krell. Jon kamenn te well len penepaske koi pral.

¹³Un i tsele Debleskre rakepangre un o Mose rakran glan i rah tsiro pral kau newo tsiro. Kanna hi o Johanni koi, un ko newo tsiro was.

¹⁴Patsenn mange, o Johanni hi o Elija, kolestar penlo was, te well lo.

¹⁵Mukenn kowa an tumaro shero trujel te djal!

¹⁶I menshe an kau tsiro hi har tchawe, kai khelenn an o foro. Un jon denn gole jek ap o wawareste:

¹⁷Mer bashram tumenge. Tumer khelan gar. Mer giwam mulengre gilja. Tumer rowan gar.

¹⁸O Johanni chas un pijas gar. Un jon penenna: “I beng hi an leste.”

¹⁹Un me, o Menshengro Tchawo, me wom, chom un pijom, un mandar penenn le: “Kowa hi i baro chapaskro un i pipaskro. Kowa hi i maal kolendar, kai lenn i biboldendar lowe i Remarjenge dren. Un kowa hi i maal kolendar, kai tchilatcho koowa kran un doleske pale-tchiddo hi.” Ninna te rakrenn le jaake, dikenn le ap o Debleskre menshende, kai kowa tchatcho hi, hoi o Dewel krella.

²⁰Palle tchingras lo pral kol forja, kai job bud baro koowa kras an o Debleskri soor. I menshe kote mukan gar pengro tchilatcho drom, te djan le ap o Debleskro drom.

²¹Un job penas: Bibachtelo wenna tumer menshe an o foro Korazin! Bibachtelo wenna tumer menshe an o foro Betsaida! Te krals jek an i forja Tirus un Sidon sawo baro koowa an o Debleskri soor, har me pash tumende krom, riwans i menshe kote i gono trul pende, un tchiwans jagakri tchik ap pengre shere, te sikrenn le, kai lengro tchilatchepen khaitell len. Un jon mukans pengro tchilatcho drom, un djans ap o Debleskro drom.

²²Ap ko diwes, kai rakrell o Dewel o tchatchepen win pral i tsele menshende ap i phub, djal kol menshenge an i forja Sidon un Tirus feteder har tumenge kate.

²³Un tumer menshe an o foro Kapernaum, patsenn tumer, kai wenn tumer an o bolepen hadedo? Na-a! Tumer djan an o mulengro them tele. O baro koowa, hoi krom an o Debleskri soor pash tumende, te kroms kowa an o foro Sodom, palle wals ko foro gomme kau diwes.

²⁴Me penau tumenge: Ap ko diwes, kai rakrell o Dewel o tchatchepen pral i tsele menshende win, lenn tumer i bareder phagi, har kol menshe an o foro Sodom.

²⁵Un ap kau tsiro penas o Jesus: Tata, tu hal o rai pral o bolepen un i phub. Me sharau tut. Kowa, hoi tu kreh, sikral tu kolende, kai gar bud djinenna. Kolla, kai gosewo hi un bud djinenna, kolla haiwenn kowa gar.

²⁶Awa tata, jaake kamal tu kowa.

²⁷Lauter das miro dad an mire wasta. Kek djinella, koon o tchawo hi, har kokres o dad. Un kokres o tchawo djinella, koon o dad hi. Un o tchawo sikrell kolen, kai patsenn ap leste, koon o dad hi.

²⁸Tumer marenna tumen tele, te krenn kowa, hoi tumare phure ap tumende penan. Awenn pash mande! Me lau ko pharo koowa tumendar, te lenn tumer pale newi soor.

²⁹Me hom tumenge i latcho rai, un dikau ap kekeste tele. Shunenn ap mande un krenn, hoi me tumenge penaua! Un tumaro dji well pale sorelo.

³⁰Kowa, hoi me tumenge penaua, hi tumenge latcho. Un tumer hunte marenn tumen gar tele.