Read O Debleskro Drom - I Bibla an o Romano Rakepen 2021 Mateo 12 Bible Online

Mateo 12 - O Debleskro Drom - I Bibla an o Romano Rakepen 2021 bible

Mateo 12

¹Ap jek Debleskro diwes djas o Jesus peskre malentsa ap i tikno kotar them, kai o djob baro was. Un leskre malen his bok. Un jon lan o djob an i wasta, te chan le.

²Kowa dikan i Farisarja un penan ap o Jesuseste: “Dik, tire mala krenn ap o Debleskro diwes, hoi hi gar pal o biboldengro tchatchepen.”

³Penas lo ap lende: Hoi kras o baro rai David un peskre mala, har jon bokan? Draweran[44] tumer kowa gar an o Debleskro lab?

⁴Job djas an o Debleskro kheer, un chas o Debleskro maro, job un kolla, kai pash leste hi. Pal i biboldengro tchatchepen his i mare i rashajenge kokres koi.[45]

⁵Un tumer djinenn ninna, hoi an o Moseskre lila tardo hi, te krenn i rashaja ap o Debleskro diwes pengri budi an o Debleskro baro kheer. Un jaake krenn le o Debleskro diwes praassedo. Ninna te krenn le kowa, anenn le kek doosh ap pende.

⁶Kanna penau me tumenge: Kowa, kai glan tumende tardo hi, kowa hi bareder har o Debleskro baro kheer.

⁷Tumer haiwan kol laba gar, hoi o Dewel penas: Me kamau, te han tumer latcho ap i wawarende. Me kamau gar, te marenn tumer mange viechen.[46] Te haiwans tumer, hoi kowa kharella, palle anans tumer kek doosh ap mire malende. Jon anan kek doosh ap pende.

⁸Me, o Menshengro Tchawo, hom ninna o rai pral o Debleskro diwes.

⁹Un job djas peske, un djas an i biboldengri kangri.

¹⁰Koi his i mursh, koles his i bango wast. Jon kaman i doosh ap o Jesuseste pre te anell, te anenn le les nai glan i tchatchepangre. Doleske putchan le lestar: “Nai krah mer jekes ap o Debleskro diwes sasto?”

¹¹Penas lo ap lende: “Te hi jekes tumendar i bakro, un kowa perell ap o Debleskro diwes an i cheb an i phub, kek tumendar mukals les kote. Na-a, job djals kote, taprals les, un lals les kote win.

¹²I mensho hi budeder moldo har i bakro. Jaake hi kowa tchatcho, te krah mer i menshes ap o Debleskro diwes sasto.”

¹³Un ap ko mursheste penas lo: “Hade tiro wast pre!” Un job hadas peskro wast pre. Un leskro wast was sasto, har ko wawar wast.

¹⁴Koi djan i Farisarja win, un rakran khetne, har jon les nai marenna.

¹⁵Un o Jesus haiwas kowa, un djas peske. Un bud menshe djan leske palla. Un job kras hakenes lendar sasto.

¹⁶Un job penas soreles ap lende, te penenn le kowa kekeske.

¹⁷Un jaake was kowa tchatcho, hoi o Debleskro rakepaskro, o Jesaja, glan i rah tsiro penas:

¹⁸O Dewel penella: Dik, kowa hi miro budepaskro, kai me mange win rodom. Koles kamau o djijestar. Pral leste hom bachtelo. Me tchiwau miro Ducho ap leste. Un job penell i tsele menshenge, hoi me lendar kamau.

¹⁹Job tchingrell pes gar, un dell gar bari gole. Un job krell kek baro rakepen ap o drom.

²⁰Job hi latcho ap koleste, kai hi les buder gar bud soor. Job phagell les gar har i kasht, kai hi an-phagedo. Ninna i momeli, hoi gomme i tikno kotar chatchella, krell lo gar win. Jaake hi lo, bis te hi peskro tchatchepen pral halauter tardo.

²¹Un i tsele menshe ap i phub dikenn ap leste.[47]

²²Palle anan le i murshes pash o Jesuseste. Kowa his korelo, un nashte rakras gar. Un i beng his an leste. Un o Jesus kras o murshes sasto, jaake te nai rakras lo, un dikas lo pale.

²³Un i tsele menshe, kai trul leste tardo his, kran bare jaka. Un jon penan: “Hi kawa nai o Davideskro tchawo?”

²⁴Har i Farisarja kowa shunan, penan le: “O pralstuno beng das les i soor. Dran kowa nai tradell job i bengen win.”

²⁵O Jesus haiwas, hoi an lengro shero trujel djas. Un job penas ap lende: Hako them un hako foro djal paash, kai dui bare raja kurenn pen. Un an jek kheer nashte wenn gar dujen penepaske. Kowa djal gar.

²⁶Te tradell o beng i wawar benges win, hi kowa jaake, har te kurell pes ko jek o wawareha. Palle nashrenn jon pengri soor.

²⁷Te dals o pralstuno beng mande peskri soor, te nai tradoms i bengen win, koon dals tumare menshen i soor, te tradenn le i bengen win? Well jek diwes, kai jon penenn tumenge, kai kowa gar tchatcho hi, hoi tumer pral mande rakran.

²⁸Na-a, gar o beng das man koi soor. O Debleskro Ducho das man koi soor, te nai tradap i bengen win. Koi pre dikenn tumer, kai ko tsiro was, kai o Dewel i menshen dran o tchilatchepen win lella, un leskri soor mank tumende hi.

²⁹Kowa, kai kamell an o kheer i sorelo murshestar dren phagell, te lell lo leskro brawlepen, kowa hunte pandell ko sorelo murshes. Un palle randell lo leskro tselo brawlepen.

³⁰Koon gar ap miri rig hi, kowa hi ap ko wawareskri rig. Un koon gar i menshe pash mande anella, kowa tradell len mandar.

³¹Tchatchepah, me penau tumenge kanna: O Dewel nai bistrell hako tchilatcho koowa, hoi i menshe kran. Un jon te rakrenn djungele laba pral leste, jaake nai bistrell lo kowa ninna. Jek penell djungele laba pral o Debleskro Ducho, palle bistrell lo kowa gar.

³²Un jek te penell djungele laba pral o Menshengro Tchaweste, jaake nai bistrell lo kowa. Jek te rakrell djungele laba pral o Debleskro Ducho, kowa bistrell lo an kek tsiro, gar an kau tsiro, un witar gar an ko tsiro, kai wella.

³³Te hi tumen i latcho phabjengro ruk, hi tumen ninna latche phabja. Te hi tumen i phabjengro ruk, kai gar latcho hi, hi tumen ninna phabja, kai gar latcho hi. Ap kowa, hoi o rukestar wella, dikenn tumer, har ko ruk hi.

³⁴Tumer han sapa! Tumer han tchilatcho un nai rakrenn gar latcho koowa. I mensho penell kowa, hoi an leskro dji dren hi.

³⁵Dran i latcho mensheskro dji wella latcho koowa. Dran i tchilatcho dji wella tchilatcho koowa.

³⁶Me penau tumenge: Well ko diwes, kai rakrell o Dewel o tchatchepen pral i tsele menshende ap i phub win. Kote putchell lo lendar pal hako tchilatcho lab, hoi jon penan.

³⁷Tu te penal i latcho un tchatcho koowa, leh tu kek phagi. Tu te penal kowa, hoi gar latcho un tchatcho hi, leh tu i phagi.

³⁸Palle penan i biboldengre tchatchepangre un i Farisarja ap leste: “Sikepaskro, kre menge i baro koowa, hoi sikrell mende, te well tiri soor o Deblestar!”

³⁹Kote penas lo ap lende: Har tchilatcho hi kol menshe, kai djiwenn an kau tsiro. Jon mukan o Debles, un kamenn i baro Debleskro koowa te dikell. Un o Dewel sikrell len tchi wawar har kowa, hoi i menshe ninna ap o Debleskro rakepaskro, o Jona, dikan.

⁴⁰O Jona atchas triin diwessa un triin rati an o baro matcheskro per.[48] Un jaake hunte atchell o Menshengro Tchawo triin diwessa un triin rati an i phub paskedo.

⁴¹Ap ko diwes, kai o Dewel o tchatchepen pral i tsele menshende wi-rakrella, stenna ninna i menshe dran o foro Ninive pre. Un jon penenna, te hi kol menshe tchilatcho, kai kanna djiwenna. Glan i rah tsiro penas o Jona i menshenge an o foro Ninive o Debleskro lab. Un jon mukan pengro tchilatcho drom, un djan ap o Debleskro drom. Kowa, kai glan tumende tardo hi, kowa hi bareder har o Jona.

⁴²Ap ko diwes, kai rakrell o Dewel o tchatchepen win pral i tsele menshende, stella ninna i bari rani[49] dran o foro Saba pre. Un joi penella, te hi kol menshe tchilatcho, kai kanna djiwenna. Glan i rah tsiro, was joi dran i dur them, un was pash o baro rai Salomo, te shunell li leskre gosewe laba. Kawa, kai glan tumende tardo hi, kawa hi bareder har o baro rai Salomo.

⁴³Te djas i beng dran i mensheste win, nashell job an i them trujel, kai kek djipen hi, un rodell peske, kai atchell job nai, un hatsell tchi.

⁴⁴Palle penell lo ap peste: Me kamau pale an miro kheer te djal, dran hoi me win djom. Un te well lo pale, hi ko kheer djudjo un shukar, un kek djiwell kote.

⁴⁵Koi rodell lo peske wawar efta benga, kai tchilatcheder hi har job. Un jon djan an ko mensheste dren, un djiwenn an leste. Jaake hi ko mensheha djungleder har glan kau tsiro. Un jaake djal ninna kal tchilatche menshenge, kai kanna djiwenna.

⁴⁶Un har job kowa kol menshenge penas, kai trul leste tardo his, koi was leskri dai un leskre phrala. Jon his win tardo, un kaman leha te rakrell.

⁴⁷Un jek penas ap leste: “Shun, tiri dai un tire phrala hi win tardo un kamenn tuha te rakrell.”

⁴⁸Penas lo ap koleste: “Me kamau tuke te sikrell, koon miri dai un mire phrala hi.”

⁴⁹Un palle sikras lo ap peskre malende un penas: “Dik, kalla hi miri dai un mire phrala!

⁵⁰Kowa, kai krella, hoi miro dad an o bolepen kamella, kowa hi miro phraal, un miri pheen, un miri dai.”