Read O Debleskro Drom - I Bibla an o Romano Rakepen 2021 Mateo 13 Bible Online

Mateo 13 - O Debleskro Drom - I Bibla an o Romano Rakepen 2021 bible

Mateo 13

¹Pal i tsiro djas o Jesus dran o kheer, un beshas pes pash o baro pani.

²Un bud menshe wan kote pash leste. Doleske djas lo an i bero, un beshas pes kote. Un i tsele menshe his pash o pani tardo.

³Un o Jesus rakras ap lende bud sawe laba, kai hi i khatedo tchatchepen dren. Un job penas: I hacho djas win, te witsrell lo o tikno djob ap peskro kotar them, te well ko djob bares.

⁴Un i tikne kotja peran ap o drom, un i tchirkle chan len pre.

⁵Un wawar djob peras ap i barra, kai gar bud phub his. Dran kowa was ko djob sik dran i phub win.

⁶Un har o kham djas pre, was ko djob, kai gar dur an i phub his, chatchedo un meras tele.

⁷Wawar djob peras mank i subjengre burra, un kol burra wan jaake baro, te las o djob kek ducho buder, un job meras.

⁸Wawar djob peras ap i latchi phub, un was baro, un hidjras sheel kope jaake bud. Wawar djob hidjras shob-deesh kope jaake bud, un wawar djob trijanda kope jaake bud.

⁹Mukenn kowa an tumaro shero trujel te djal!

¹⁰Un leskre mala wan pash leste un putchan lestar: “Hoske rakreh tu sawe laba ap lende, kai i khatedo tchatchepen dren hi?”

¹¹Penas lo ap lende: O Dewel mukell tumen te haiwell, har kote djal, kai dell lo menshen pash peste gole, te djan le ap leskro drom. I wawar menshe haiwenn kowa gar.

¹²Koon o Debleskro lab an peskro dji rikrella, kowa haiwell les bud un budeder. Koon o Debleskro lab gar an peskro dji rikrella, koleske well ninna kowa krik lino, hoi job patsell, te hi les.

¹³Doleske rakrau sawe laba ap lende, kai hi i khatedo tchatchepen dren. Kal menshe dikenn, hoi krau. Un jon krenna, har te dikans le les gar. Un jon shunenn, hoi penau, un haiwenn kowa gar.

¹⁴Ap kolende well kowa tchatcho, hoi penas o Debleskro rakepaskro, o Jesaja, glan i rah tsiro: Tumer shunenn un haiwenn tchi. Un tumer dikenn un haiwenn witar tchi.[50]

¹⁵O Dewel penas: Kalla menshe kamenn gar te haiwell, hoi shunenn le. Jon kamenn gar te shunenn, hoi me penau. Witar gar kamenn le te dikell, hoi tchatcho hi. Te kamans le kowa te dikell, shunans le. Un te shunans le, haiwans le, un wans pash mande. Un me nai kroms len sasto.

¹⁶Bachtele han tumer, kai dikenna un shunenna, hoi me tumenge penau un sikrau.

¹⁷Tchatchepah me penau tumenge: An o phuro tsiro his bud Debleskre rakepangre un wawar menshe, kai kran, hoi o Dewel kamella. Kolla kaman te dikell, hoi tumer dikenna, un dikan les gar. Un jon kaman te shunell, hoi tumer shunenna, un shunan les gar.

¹⁸Shunenn kanna, hoi kamenn kol laba pral o djob tumenge te penell:

¹⁹Ko djob, hoi peras ap o drom, sikrell tumende jekes, kai shunas ko lab, te dell les o Dewel pash peste gole. Un job haiwas ko lab gar. Un o beng was, un las ko lab dran leskro dji win.

²⁰Wawar menshe hi har ko kotar phub, kai o djob ap i barra peras. Jon shunenn ko lab, len les sik bachteles pre,

²¹un bistrenn les ninna pale sik. Jon mukenn les gar an pengro dji soreles te well. Te well i pharo tsiro ap lende, un jon wenn mange palla lino, palle witsrenn le pengro patsepen ap i rig.

²²Wawar menshe hi har ko kotar phub, kai o djob tel i subjengre burra peras. Jon shunan ko lab. Palle dikenn le ap i phubjakro koowa un kamenn brawele te well. Un o brawlepen chochell i menshen. Un ko lab, hoi shunan le, well tassedo, un nai rakrell buder gar an lengro dji.

²³Pale wawar menshe hi har koi latchi phub, kai o djob peras. Kolla shunan un haiwan ko lab. An lende well ko patsepen baro. Un lengro djipen sikrella, te kamenn le o Debles, un shunenn le ap leste. Pash kolende hi ko lab har o djob, kai baro wella, un pash jekeste hidjrell lo sheel kope jaake bud. Un pash i wawareste hidjrell lo shob-deesh kope jaake bud. Un pale pash i wawareste hidjrell lo trijanda kope jaake bud.

²⁴Un job penas lenge pale, har kote djal, kai dell o Dewel i menshen pash peste gole, te djan le ap leskro drom. Un job penas: I hacho witsras o latcho djob ap peskro kotar them, te well ko djob baro.

²⁵An i rat, har i tsele menshe sowan, djas i tchilatcho ap ko kotar them, witsras o djungelo senlepen mashkral o djob, un djas peske.

²⁶Un o tsiro was, te well o latcho djob win, un was bares. Un koi was ninna ko djungelo senlepen bares.

²⁷Un i budepangre djan pash o hacheste, un putchan lestar: Rai, tu witsral o latcho djob ap tiro kotar them. Kai was o djungelo senlepen?

²⁸Un job penas ap lende: Kawa kras i tchilatcho, kai man gar kamella. Koi putchan le lestar: Kameh tu, te djas kote, te tserdas ko djungelo senlepen win?

²⁹Penas lo: Na-a! Tumer te tserdenn o djungelo senlepen win, palle tserdenn tumer o latcho djob ninna win.

³⁰Mukenn kowa lauter khetne baro te well, bis te anah mer o djob an o djobeskro kheer! Un ap ko tsiro penau me ap kolende, kai ko djob tchinenna: Anenn o djungelo senlepen khetne, un pandenn les khetne, te chatchrenn les! Un palle anenn o djob khetne, un anenn les an o djobeskro kheer!

³¹Un pale penas o Jesus lenge laba, kai i khatedo tchatchepen dren hi: Un job penas: Kote, kai o Dewel i menshen pash peste gole della, te djan le ap leskro drom, hi kowa jaake har pash o djob dran i senftikro ruk, hoi witsras i mursh an i phub ap peskro kotar them.

³²O senftikro djob hi tikneder har ko tselo wawar djob. Job te well baro, well lo bareder har i tsele wawar burra. Dran leste well i ruk. Un i tchirkle wenna, un djiwenn ap leste.

³³Un pale penas o Jesus lenge laba, kai i khatedo tchatchepen dren hi: Un job penas: Kote, kai o Dewel i menshen pash peste gole della, te djan le ap leskro drom, hi kowa jaake har pash i kotar shutlo jarro, hoi las i djuwel un tchiwas les mashkral an i baro tcharo parno jarro. Un ko tikno kotar shutlo jarro kras ko tselo jarro shutlo.

³⁴Kowa lauter rakras o Jesus ap lende sawe labentsa, kai i khatedo tchatchepen dren hi. Wawartchandes rakras lo gar ap lende.

³⁵Un jaake was kowa tchatcho, hoi o Debleskro rakepaskro glan i rah tsiro penas: O Dewel penas: Me rakrau ap lende sawe labentsa, kai i khatedo tchatchepen dren hi. Me penau lenge kowa, hoi kek mensho djinas, jaake rah har i phub tardo hi.[51]

³⁶Un o Jesus bitchras kol tsele menshen khere, un djas an o kheer. Kote wan leskre mala pash leste, un putchan lestar: “Hoi sikrell men ko lab pral o djungelo senlepen, hoi ap o kotar them baro was?”

³⁷Penas lo ap lende: Kowa, kai o latcho djob ap i kotar them win witsrella, kowa hom me, o Menshengro Tchawo.

³⁸Un ko kotar them, kolla hi i tsele menshe ap i phub. Un o latcho djob, kolla hi kol menshe, kai mukenn o Debles pengro rai te well. Un ko djungelo senlepen, kolla hi i tchilatche, pral kolende o beng o rai hi.

³⁹Un kowa, kai hi chojedo ap o Debleste un witsrell o djungelo senlepen ap i phub, kowa hi o beng. Un ko tsiro, kai anenn le o djob an o djobeskro kheer, kowa hi ko tsiro, kai o Dewel o tchatchepen pral i tsele menshende wi-rakrella. Un kol tchinepangre, kai tchinenn o djob tele, kolla hi bolepangre.

⁴⁰Un jaake har ko djungelo senlepen khetne lino wella, un an i jag witsedo wella, jaake well kowa ap ko tsiro, kai o Dewel o tchatchepen pral i tsele menshende wi-rakrella.

⁴¹O Menshengro Tchawo bitchrell peskre bolepangren ap i phub. Un jon lenn kolen glan leskre jaka krik, kai kran, hoi o Dewel gar kamella, ninna kolen, kai anan i wawaren ap o tchilatcho drom.

⁴²Un i bolepangre witsrenn len an i bobeskri jag. Kote rowenn le, un dandrenn i danda i dukatar khetne.

⁴³Palle hi kolla, kai kran, hoi lengro dad an o bolepen kamas, har i bari momeli an leskro railo them. Mukenn kowa an tumaro shero trujel te djal!

⁴⁴Kowa, kai hatsas o drom pash o Debleste, koleske hi kowa har i kutch brawlepen, hoi an i kotar phub khatedo hi. Un i mensho hatsell les, un khatrell les pale. Un job hi jaake bachtelo koi pral, te bikrell lo lauter, hoi les hi, un ginell ko kotar phub.

⁴⁵Kowa, kai hatsas o drom pash o Debleste, kowa hi har i bikepaskro, kai raile un kutch barra rodas.

⁴⁶Un har job i railo un kutch bar hatsas, bikras lo lauter, hoi les his, un ginas les.

⁴⁷Ap ko diwes, kai o Debleskri harmenatsjona wella, well kowa jaake har pash i matchepangre, kai witsran pengre matchengre gone an o baro pani, un tapran bare un tikne matche.

⁴⁸Un har kol gone pherdo matche his, tserdan le kolen ap o them, beshan pen tele, un tchiwan i latche matchen an i tcharo. Un i djungele matchen witsran le ap i rig.

⁴⁹Jaake djal kowa ninna ap ko tsiro, kai o Debleskri harmenatsjona wella. I bolepangre wenna, un lenn kol tchilatchen mashkral i latchendar win.

⁵⁰Un jon witsrenn i tchilatchen an i bobeskri jag. Un kote rowenn le, un dandrenn i danda i dukatar khetne.

⁵¹Haiwan tumer kawa lauter? Un jon penan ap leste: “Awa.”

⁵²“Tumer dikenn,” penas lo, “hako tchatchepaskro, koon djinell o phuro biboldengro tchatchepen, un ap mande patslo was, kowa haiwell kanna o newo un o phuro koowa pral o Debleste, un nai penell kowa i menshenge.”

⁵³Un har o Jesus i menshenge kol tsele laba penas, kai i khatedo tchatchepen dren hi, stas lo pre un djas peske.

⁵⁴Un job djas an peskro dadeskro foro, un penas i menshenge o Debleskro lab an lengri kangri. Un jon kran bare jaka un penan: “Koon das les ko goswepen un koi soor, te nai krell lo sawo baro koowa?

⁵⁵Hi kowa gar o tchawo kolestar, kai budrell i kashtentsa. Hi leskri dai gar i Maria? Un hi o Jakobo, o Josef, o Simon, un o Judas gar leskre phrala?

⁵⁶Un djiwenn leskre phenja gar pash mende? Koon das les ko goswepen un koi soor?”

⁵⁷Un jon wan chojedo ap leste, un kaman gar te patsell, kai o Dewel les bitchras. Koi penas o Jesus ap lende: “Kek Debleskro rakepaskro well kote sharedo, kai job khere hi. An i wawar forja un gaba well lo sharedo.”

⁵⁸Un jon patsan gar ap leste. Doleske kras job gar bud baro koowa an o Debleskri soor.