Read O Debleskro Drom - I Bibla an o Romano Rakepen 2021 Mateo 14 Bible Online

Mateo 14 - O Debleskro Drom - I Bibla an o Romano Rakepen 2021 bible

Mateo 14

¹Ap ko tsiro his o Herodes o baro rai pral o them Galilea. Un job shunas, hoi pral o Jesuseste rakedo was.

²Un job penas ap peskre pralstune budepangre: “Kawa mursh hi o Johanni, kowa, kai taufras i menshen. Job stas i mulendar pre. Doleske hi les sawi soor, te nai krell lo ko baro koowa.” O Johanni his mulo. Doleske penas o Herodes kowa.

³Glan ko tsiro las o Herodes koi romjat peskro phralestar Filip. Lakro lab his Herodia. Un o Johanni penas leske: “Kowa hi gar mishto, kai tu lal tiro phraleskri romjat.” Doleske penas o Herodes ap peskre lurdende, te taprenn le o Johannes, te pandenn le les, un te witsrenn le les an o stilepen.

⁵Job marals les, te wans gar kol bud menshe koi, kai patsan, te hi o Johanni i Debleskro rakepaskro. Kolendar daras o Herodes.

⁶Koi was ko diwes, kai was o Herodes i bersh phureder. Un job mukas i baro chapen te krell. Un i Herodiakri tchai was, un khelas glan leste un glan kolende, kai pash leste hi. Un lakro khelepen his jaake shukar an leskre jaka,

⁷te das lo pes sowel, te dell lo lat lauter, hoi joi lestar mangella.

⁸Un joi djas pash peskri date un putchas latar, hoi joi nai lestar mangella. Un koja penas ap late, hoi joi hunte leske penella. Un jaake penas li ap leste: “De man kate ap i tcharo o shero o Johannestar, kowa kai taufras i menshen!”

⁹Har o Herodes kowa shunas, khaitas les, hoi job lake penas. Palle dikas lo ap kol tsele menshende, hoi shunan, har job pes sowel das. Doleske penas lo ap peskre lurdende, te denn le lat, hoi joi kamas.

¹⁰Dran kowa was o Johanneske leskro shero tele dino an o stilepen.

¹¹Un jon tchiwan leskro shero ap i tcharo, un dan les i tchate. Un koja anas les pash lakri date.

¹²Un o Johanneskre mala wan, lan o mules, un paskran les. Un palle djan le pash o Jesuseste, un penan les leske.

¹³Un har o Jesus kowa shunas, djas lo an i bero, un uleras kote, kai hi lo kokres. Bud menshe shunan, kai job djas peske. Un jon wan dran i forja, te djan le ap o them pash leste.

¹⁴Un har o Jesus dran o bero djas, dikas lo kal bud menshen, un les khaitan le. Un job kras kolen sasto, kai mashkral lende nasselo hi.

¹⁵Har o kham tele djas, wan leskre mala pash leste, un penan ap leste: “Kate, kai mer ham, della tchi te chal, un i rati wella. Bitche kal menshen tutar, te djan le an i gaba, te ginenn le penge tchomone te chal!”

¹⁶Penas o Jesus ap lende: “Jon nashte atchenna kate. Denn tumer len te chal!”

¹⁷“Men hi gar budeder har pantch mare un dui matche,” penan le.

¹⁸Penas lo ap lende: “Anenn len pash mande!”

¹⁹Palle penas lo ap kol tsele menshende, te beshenn le pen. Un job las kol pantch mare un kol dui matche, dikas pre, parkras pes pash peskro dadeste an o bolepen, un phagas kol mare an kotja, un das len peskre malende. Un kalla dan len i tsele menshende te chal.

²⁰Un jon chan lauter, un wan tchalo. Un pal o chapen hadan le kol kotja mare pre, hoi pral atchan. Un deesh-te-dui marengre gone wan pherdo.

²¹Kolla, kai chan, his nai jaake pantch serja (5.000) mursha. Ninna bud djuwja un tchawe his kote pashel.

²²Un sik pal kowa tradas o Jesus peskre malen, te djan le an o bero, un te ulerenn le glan leste ap o wawar panjeskri rig. Job atchas pash i menshende, te bitchrell lo len khere.

²³Palle djas job peske kokres ap i berga, te rakrell lo peskro dadeha an o bolepen. Har i rat was, his lo kote kokres.

²⁴O Jesuseskre mala his an o bero dur win ap o baro pani. Kote phurdas i sorelo ducho pral o pani. Un o pani djas pral, un witsras o bero pral un tele.

²⁵Starenge taissarlake djas o Jesus ap o baro pani pash lende.

²⁶Un har peskre mala les dikan ap o pani te djal, trashan le un penan: “Kawa hi i mulo!” Un jon dan gole i darjatar.

²⁷Koi penas lo sik ap lende: “Ma darenn! Me hom. Lauter hi mishto!”

²⁸Penas o Petro ap leste: “Rai, tu te hal kowa, pen mange, te djap ap o pani pash tute!”

²⁹“Ab!” penas lo. Un o Petro djas dran o bero, un djas ap o pani pash o Jesuseste.

³⁰Ap jek kopo haiwas lo, har sorelo o ducho pral o baro pani phurdas. Un i daar tapras les. Koi djas lo lokes tele, un das i darjatar gole: “Rai, ma muk man te tassell!”

³¹O Jesus rikras leske o wast koi, tapras les, un penas ap leste: “Tiro patsepen hi tikno. Hoske patsal man gar?”

³²Un jon djan an o bero, un ko sorelo ducho phurdas buder gar.

³³Kolla, kai an o bero his, witsran pen glan o Jesuseste tele, un penan: “Tchatchepah, tu hal o Debleskro tchawo.”

³⁴Un jon uleran wergel un wan an o them Genezaret.

³⁵Un har i menshe kote dikan, te was o Jesus pash lende, mukan le kowa an kol tsele gaba un forja trujel te penell. Un kote anan le i tsele nasselen pash leste,

³⁶un mangan lestar, te mukell lo len i kotar leskro ripen an-taprell. Un hakeno, kai les an-tapras, was sasto.