Read O Debleskro Drom - I Bibla an o Romano Rakepen 2021 Mateo 15 Bible Online

Mateo 15 - O Debleskro Drom - I Bibla an o Romano Rakepen 2021 bible

Mateo 15

¹Ap ko tsiro wan i Farisarja un i biboldengre tchatchepangre dran o foro Jerusalem pash o Jesuseste, un penan ap leste:

²“Hoske thowenn tire mala pengre wasta gar glan o chapen, jaake har mare phure menge penan?”

³Penas o Jesus ap lende: Tumenge hi kol phurengre laba budeder moldo, har o Debleskre laba. Hoske krenn tumer gar, hoi o Dewel kamella?

⁴O Dewel penas tumenge: Dik ap tiro dadeste un ap tiri date, te djal lenge mishto![52] Un o Dewel penas ninna: Koon ap peskro dadeste un ap peskri date i bibacht anella, kowa hunte merella![53]

⁵Tumer penenn i menshenge: Koon penell ap peskro dadeste un ap peskri date: Kol lowe hoi hunte doms tumende, kol lowe dau o Debleste, ko mensho hunte dikell gar koi pre, te djal leskro dadeske mishto. Me penau tumenge: Jaake kran tumer, te krenn i menshe buder gar, hoi o Dewel penas. Kowa, hoi tumare phure penan, hi tumenge budeder moldo har o Debleskro lab.

⁷Tumer rakrenn dui tchipjentsa. O Debleskro rakepaskro Jesaja penas o tchatchepen pral tumende, har job penas:

⁸O Dewel penas: Kal menshe sharenn man pengre muja. Lengre djia hi dur mandar.

⁹Jon te mangenn man an, hi kowa mange tchi moldo! Jon penenn i menshenge i menshengre laba un gar mire laba.[54]

¹⁰Un o Jesus das kol tsele menshende pash peste gole, kai kote tardo his. Un job penas ap lende: “Shunenn un haiwenn mishto, hoi me tumenge penau!

¹¹O chapen un o pipen, hoi i mensho an peskro mui tchiwella, kowa krell les gar pale-tchiddo. Kol tchilatche laba, hoi i mensho rakrella, kolla krenn les pale-tchiddo.”

¹²Pal kowa wan peskre mala pash leste un penan ap leste: “Djineh tu, kai i Farisarja choiran pen, har jon tire laba shunan?”

¹³Penas lo: “Jon hi har ruka, kolen gar miro dad an o bolepen an i phub tchiwas, un jon wenna dran i phub win tserdedo.

¹⁴Mukenn le te rakrell! Jon hi korele un kamenn i korelen ap o wast te lenn. Un te lell i korelo i koreles ap o wast, perenn hake dui.”

¹⁵O Petro penas leske: “Pen menge, hoi kameh menge te penell kal labentsa pral o pale-tchiddo koowa?”

¹⁶Penas lo: Haiwan tumer kowa witar gar?

¹⁷Haiwenn tumer gar, kai lauter, hoi i mensho chala, djal an o per dren, un palle dran o mensheste win?

¹⁸Te penell i mensho tchilatche laba, wenn kolla dran leskro dji win. Un kol tchilatche laba krenn o menshes pale-tchiddo.

¹⁹Dran o mensheskro dji well o tchilatcho koowa, hoi an leskro shero trujel djal. Dran leskro dji well, te dell lo i wawares mulo. Te chochell i mursh peskri romjat, well kowa dran leskro dji. Te chochell i djuwel peskro romes, well kowa dran lakro dji. Dran o dji wella o wi-ladjedo koowa, o tchorepen, o chochepen, un o praassepen.

²⁰Kowa lauter krell i menshes pale-tchiddo. Job te thowell gar peskre wasta glan o chapen, krell les kowa gar pale-tchiddo.

²¹Un o Jesus djas peske, un was an o them, kai i forja Tirus un Sidon tchiddo hi.[55]

²²Kote djiwas i djuwel, kai kek biboldetsa hi. Joi hi i Kanaanitetsa[56]. Kaja was pash leste, un das ap leste gole: “Mo rai, tu Davideskro tchawo, kre tiro dji mange pre! I beng hi an miri tchate. Un kowa marell lat khetne.”

²³O Jesus penas tchi ap late. Koi wan peskre mala pash leste, un penan ap leste: “Joi dell sawi bari gole pal mende. Bitche lat tutar!”

²⁴Penas lo ap lende: “O Dewel bitchras man pash i Israeleskre menshende kokres. Kolla hi har bakre, kai nashedo hi.”

²⁵Koi witsras li pes glan leste tele ap i phub, un penas: “Rai, kre miri tchai sasto!”

²⁶Penas lo ap late: “Kowa hi gar mishto, te lell jek o tchawengro chapen lendar, un witsrell les glan i djuklende.”

²⁷“Tiro hi tchatcho, miro rai” penas li, “ninna i djukle chan i tikne kotja, hoi mukenn lengre raja ap i phub te perell.”

²⁸Penas lo: “Romnija, tiro patsepen ap mande hi bares. O Dewel krell tuke kowa, hoi tu kameh.” Un ap kau tsiro was lakri tchai sasto.

²⁹Un o Jesus djas peske, un was pash o baro pani an o them Galilea. Un kote djas lo ap i berga, un beshas pes kote tele.

³⁰Un bud menshe anan pengre nasselen pash leste: i bangen, i korelen, kolen, kai nashte rakrenn gar, kolen, kolengre wasta un herja gar sasto hi, un bud wawar nasselen. Un jon tchiwan kolen glan leste. Un job kras len sasto.

³¹Un i tsele menshe, kai trul leste tardo hi, kran bare jaka, har jon dikan, har i nassele sasto wan. Kolla, kai nashte rakran gar, rakrenn nai. Un kolla, kolengre wasta un herja gar sasto his, len hi kanna saste wasta un herja. Un i bange nai djana. Un i korele nai dikenna. Har i menshe kowa dikan, sharan le o Israeleskro Debles.

³²Un o Jesus das peskre malen pash peste gole, un penas ap lende: “Man khaitenn kal menshe. Jon hi kanna triin diwessa pash mande, un len hi tchi te chal. Len hi buder kek soor. Dran kowa kamau len gar khere te bitchrell, te perenn le gar ap o drom khetne.”

³³Un leskre mala putchan lestar: “Kai las mer doha maro an kau mulo them kal bud menshenge, te wenn le tchalo?”

³⁴Penas o Jesus: “Kitse mare hi tumen?” Penan le: “Efta mare, un gar bud tikne matche.”

³⁵Koi penas lo ap kal tsele menshende, te beshenn le pen ap i phub.

³⁶Un job las kol efta mare un kol matche, parkras pes pash o Debleste, un phagas len an kotja. Un job das len peskre malende, un kolla dan len halauterende, kai kote beshdo hi.

³⁷Un jon chan lauter, un wan tchalo. Un pal o chapen hadan le kol kotja maro pre, hoi pral atchan. Un efta marengre gone wan pherdo.

³⁸Un kolla, kai chan, his star serja (4.000) mursha, ninna bud djuwja un tchawe.

³⁹Un job bitchras kol tsele menshen khere, un djas an o bero. Un jon uleran pash o gab Magadan.