Read O Debleskro Drom - I Bibla an o Romano Rakepen 2021 Mateo 18 Bible Online

Mateo 18 - O Debleskro Drom - I Bibla an o Romano Rakepen 2021 bible

Mateo 18

¹Ap ko tsiro wan leskre mala pash leste un putchan lestar: “Koon hi o bareder mashkral kolende, kai djan ap o Debleskro drom?”

²Koi das o Jesus i tikno tchawes pash peste gole, un tchiwas les glan lende,

³un penas: Tchatchepah, me penau tumenge: Tumer te mukenn gar tumaro drom, un wenn gar har i tchawe, palle nashte wenn gar ap o Debleskro drom.

⁴Koon krell pes gar bares un well har kau tchawo, kowa hi o bareder mank kolende, kai djan ap o Debleskro drom.

⁵Un kowa, kai lell sawo tchawo pash peste pre, kowa lell man pash peste pre.

⁶Kowa, kai anell jekes kal tiknendar, kai patsenn ap mande, miro dromestar tele, koleske wals feteder, te well leske i pharo bar trul i meen pandlo, un te well lo tassedo an o baro pani.

⁷I bibacht hi kowa, kai della ap kai phub bud koowa, hoi anell i menshen ap o tchilatcho drom. Hawo bibacht well ap koleste, kai anell i wawaren ap o tchilatcho drom!

⁸Te kamell tiro wast, te kress i tchilatcho koowa, de les tele un witse les tutar! Te kamell tut tiro piro ap o tchilatcho drom te anell, de les tele, un witse les tutar! Hi tuke latcheder, te nashreh tu jek wast un jek piro, un leh ko djipen, hoi o Dewel tut della, har te djas tu dui wastentsa un dui pirentsa an i jag, hoi hako tsireske chatchella.

⁹Un te kamell tiro jak tchomone te dikell, hoi anell tut ap o tchilatcho drom, palle tchin les win, un witse les tutar! Hi tuke feteder, te nashress jek jak, un leh o djipen, hoi o Dewel tut della, har te djas dui jakentsa an o bengeskri jag.

¹⁰Ma tchiwenn kol tiknen ap i rig, har te wans le tchi moldo. Me penau tumenge: I bolepangre, kai ap lende jak denna, kolla nai djana hako tsiro glan miro dadeste an o bolepen, te mangenn le les lenge.

¹¹O Menshengro Tchawo was ap i phub, te anell lo kolen ap o Debleskro drom pale, kai nashedo hi.

¹²Kowa hi jaake, har te hi i murshes sheel bakre, un jek lendar djal nashedo. Palle mukell lo kol enja-deesh-te-enja (99) bakre ap i pralstuno them tardo, un rodell ko jek bakres, hoi nashedo hi.

¹³Tchatchepah, me penau tumenge: Un te hatsell lo les, palle hi lo bachtleder pral ko jekeste, har pral kol tsele wawar, hoi khetne atchan.

¹⁴Un jaake kamell miro dad an o bolepen gar, te djal jek kol tiknendar nashedo.

¹⁵Te krell tiro phraal tchilatcho koowa ap tute, palle dja pash leste kokres, un pen leske, kai kowa gar mishto hi, hoi job kras. Un te dikell lo, kai kowa tchatcho hi, hoi tu leske penal, palle anal tu tiro phrales pale ap miro drom.

¹⁶Job te shunell gar ap tute, palle le dui wawar phralen tuha, un dja pash leste, te shunenn le, hoi tu leske peneh. Jaake djinenn dui, triin, hoi job kras.

¹⁷Te shunell lo kau kopo witar gar ap tumende, palle pen les i patslenge an i kangri. Un te shunell lo gar ap kolende, palle well lo tumenge har i mursh, kai prindjrell o Debles gar un har i pale-tchiddo.

¹⁸Tchatchepah, me penau tumenge: Ap koleste, kai tumer penenna: O Dewel las tiri doosh tutar, kolestar hi li krik lino. Ap koleste, kai tumer penenna: Tiri doosh atchell ap tute, ap koleste atchell leskri doosh tchiddo.

¹⁹Me penau tumenge ninna: Te mangenn dui tumendar khetne tchomone o Deblestar, palle dell len miro dad an o bolepen kowa, hoi jon lestar mangan.

²⁰Un kote, kai dui, triin menshe khetne wenna an miro lab, kote hom me mashkral lende.

²¹Koi djas o Petro pash leste, un putchas lestar: “Rai, te hi miro phraal bud kope tchilatcho ap mande, kitse kope hunte bistrap ko tchilatcho koowa, hoi job ap mande kras? Hi efta kope doha?”

²²Penas o Jesus ap leste: Na-a, me penau tuke, efta kope hi gar doha. Tu hunte bistress kowa efta-deesh kope un pale efta-deesh kope, jaake rah har job ap tute tchilatcho koowa krella.

²³Me kamau te sikrap tumende har pash kolende hi, kai djan ap o Debleskro drom. O Dewel an o bolepen hi har i baro rai. Kowa mukell peskre budepangren glan peste te anell, te lell lo lendar kol lowe, hoi jon leske khetne anan dran pengri budi.

²⁴Kote was i mursh glan leste anlo. Koles his deesh serja rupene beme sijaan pash leste.

²⁵Kowa nashte plaissras kowa gar pale. Koi penas o rai: Bikrenn les peskri romjah, un peskre tchawentsa, un lauterentsa, hoi les hi! Un denn man kol lowe, hoi tumer lenge dren lenna!

²⁶Koi witsras pes ko mursh glan leste ap i phub, un penas: Rai, me mangau tut: Ab latches ap mande! De man i tsiro, te nai plaissrap miri sijaan pash tute!

²⁷Un o rajes khaitas kowa, un job mukas leske leskri tseli sijaan te perell, un mukas les te djal.

²⁸Un o mursh djas dran ko kheer win, un tapras i wawar budepaskres ap o drom. Kales his sheel beme sijaan pash leste. Koi tchiwas lo peskre wasta trul koleskri meen, te tassrell lo les, un penas ap leste: De man kanna mire lowe pale!

²⁹Koi witsras pes kau mursh glan o wawareste ap i phub un penas: Me mangau tut: Ab latches ap mande, un de man i tsiro, te nai plaissrap me tuke len pale!

³⁰Ko wawar mursh kamas tchi te shunell, un witsras les an o stilepen, te atchell job kote jaake rah, har job gar koi sijaan pale plaissras.

³¹Un har shunan kowa kol tsele wawar budepangre, kai o rajeske budrenna, dukas kowa len an o dji. Un jon djan pash o rajeste, un penan leske lauter, hoi jon shunan.

³²Koi das o rai ap o mursheste gole, un penas ap leste: Tu hal i tchilatcho budepaskro. Me mukom tiri sijaan tuke te perell, har tu mandar mangal.

³³Jaake har dikom latches ap tute, jaake hunte dikals tu ninna latches ap koleste, kai les hi i sijaan pash tute.

³⁴Un pherdo choli das les o rai an i wasta kolendar, kai denn les dawa an o stilepen. Kote hunte atchell job jaake rah, har job gar koi sijaan pale plaissras.

³⁵Un o Jesus penas dureder: Te bistrenn tumer gar o tselo djijestar o tchilatcho koowa, hoi i wawar phraal ap tumende kras, jaake krell miro dad an o bolepen emligo tumentsa.