Read O Debleskro Drom - I Bibla an o Romano Rakepen 2021 Mateo 19 Bible Online

Mateo 19 - O Debleskro Drom - I Bibla an o Romano Rakepen 2021 bible

Mateo 19

¹Un har o Jesus kowa lauter peskre malenge penas, djas lo lentsa dran o them Galilea win, un was an o them Judea wergel o pani Jordan.

²Un bud menshe djan leske palla. Un job kras i nasselen kote sasto.

³Un i Farisarja wan pash leste, un kaman les leskre labentsa te taprell. Un jon putchan lestar: “Nai tradell i mursh peskri romjat pestar, ninna te kras li kek tchilatchepen?”

⁴Penas lo: “Tumer djinenn, hoi hi an o Debleskro lab tchinlo: O Dewel kras o murshes un i djuwjat.

⁵Un job penas: Doleske mukell i mursh peskro dades un peskri dat, te djiwell lo peskri romjah khetne. Un kol dui wenna har jek.[61]

⁶Jaake hi le har jek un buder gar dui. Un kowa, hoi o Dewel khetne anas, kowa hunte krell i mensho gar paash!”

⁷Penan le ap leste: “Te hi kowa jaake, hoske tchinas o Mose an peskro liil: Te kamell i mursh peskri romjat te mukell, palle hunte dell lo lat i liil, kai tchinlo hi, kai job mukas lat?”

⁸Penas lo ap lende: “Tumaro dji hi dran bar, kai o Debleskro lab gar dren djal. Doleske tchinas o Mose, kai nai mukenn tumer tumari romjat. Ap ko tsiro, kai o Dewel i murshes un i djuwjat kras, his kowa gar jaake.

⁹Me penau tumenge: Te hi jekes i romni, kai chochras les gar i wawar mursheha, un job mukell lat, un romedinerell i wawar djuwjat, kowa anell doosh ap peste, te las lo i wawar romjat.”

¹⁰Penan leskre mala ap leste: “Te hi kowa jaake, palle hi i mursheske feteder, te romedinerell lo gar.”

¹¹Penas lo: “Kau lab, hoi me penom, haiwell gar hakeno. Kolen, kai o Dewel kau lab an o dji tchiwas, kolla haiwenn les.

¹²Della menshe, kai wan jaake boldo, kai hi lenge kowa gar mishto, te romedinerenn le. Un wawar wan jaake ap o mass tchinlo, te romedinerenn le nai gar. Wawar kamenn o tselo djijestar o Debleske te budrell. Doleske romedinerenn le gar. Koneske kau lab mishto hi, kowa te krell jaake.”

¹³Koi anan le tchawen pash o Jesuseste, te tchiwell lo peskre wasta ap lende, te mangell lo o Debles, te dikell job latches ap lende. Har peskre mala kowa dikan, tchingran le ap kol menshende.

¹⁴Koi penas o Jesus ap lende: “Mukenn kol tchawen pash mande te well! Ma rikrenn len pale! Sawe har jon, kolen das o Dewel gole, te djiwenn le khetne leha an o bolepen.”

¹⁵Un job tchiwas peskre wasta ap lende, un djas peske.

¹⁶Un i mursh was pash leste un penas: “Sikepaskro, hawo latcho koowa hunte krap, te well man o djipen, hoi gar pre-herella?” [62]

¹⁷Penas o Jesus: “Hoske putcheh tu mandar, hoi latcho hi? O Dewel kokres hi latcho. Tu te kameh o Debleskro djipen, palle kre kowa, hoi job penas!”

¹⁸Koi putchas lo lestar: “Hoi hunte krap?” Penas o Jesus: “Ma mare kekes! Ma choche tiri romjat i wawar djuwjah! Ma tchore! Ma pen chochepen pral jekeste!

¹⁹Dik ap tiro dadeste un ap tiri date, te djal lenge mishto! Un ap koleste, kai pash tute hi hunte wess jaake latches, har hal latches ap tute kokres.”

²⁰Koi penas ko terno mursh ap leste: “Kowa lauter krom. Hoi hunte krap budeder?”

²¹Penas o Jesus ap leste: “Te kameh tu o tselo Debleskro kamlepen te krell, palle bike lauter, hoi tut hi! Un de kol lowe i tchorwelende! Palle hi tut i brawlepen an o bolepen. Un am un dja mantsa!”

²²Ko terno murshes his bud brawlepen. Har job kal laba shunas, dukas kowa les. Un job djas peske.

²³Un o Jesus penas ap peskre malende: “Tchatchepah, me penau tumenge: Pharo hi i braweleske, te well lo ap o Debleskro drom.

²⁴Me penau tumenge ninna: Hi gar jaake pharo, te djal i baro viecho an i subjakro kand[63] dren har te well i brawelo ap o Debleskro drom.”

²⁵Har leskre mala kowa shunan, tapras len i daar. Un jon putchan lestar: “Te hi kowa jaake, koon lell nai o Debleskro djipen?”

²⁶Un o Jesus dikas ap lende, un penas: “Hoi i menshe nai gar krenna, nai krell o Dewel halauter.”

²⁷Koi penas o Petro ap leste: “Djineh, mer mukam lauter un djam tuha. Hoi lah mer?”

²⁸Penas o Jesus ap lende: “Tchatchepah, me penau tumenge: Ko tsiro wella, kai o Dewel lauter newes krella. Ap ko tsiro hi o Menshengro Tchawo o rai pral lauterende, un job hi beshdo ap peskro rajeskro beshepaskro. Un tumer, kai mantsa djana, tumer wenn ninna raja, un han beshdo ap deesh-te-dui rajeskre beshepangre, un rakrenn o tchatchepen win pral i tsele menshende, kai wenna i deesh-te-dui Israeleskre tchawendar.

²⁹Un hakeno, kai mukas peskro kheer, peskre phralen, peskre phenjen, peskro dades, peskri dat, peskre tchawen un peskro kotar them, te djal lo mantsa, kowa lell sheel kope pale, hoi job mukas. Un o Dewel dell les o djipen, hoi gar pre-herella.

³⁰Un bud, kai kanna glan tardo hi, kolla hi ap ko diwes palla tardo. Un bud, kai kanna palla tardo hi, kolla hi ap ko diwes glan tardo.”