Read O Debleskro Drom - I Bibla an o Romano Rakepen 2021 Mateo 21 Bible Online

Mateo 21 - O Debleskro Drom - I Bibla an o Romano Rakepen 2021 bible

Mateo 21

¹Ap o drom an o foro Jerusalem wan le an o gab Betfage, kai pash o djeteskri berga tchiddo hi. Un kote penas o Jesus ap dujende peskre malendar:

²“Djan an o gab koi wergel! Kote hatsenn tumer i esla pandlo un lakro ternepen pash late. Pandenn len tele, un anenn len pash mande!

³Jon te putchenn tumendar, hoi tumer lentsa kamenn te krell, palle penenn lenge: Hi maro rajeske, te beshell job koi pre. Un jon denn len tumende.”

⁴Un kowa djas jaake, har o Dewel kowa glan i rah tsiro ap o Debleskro rakepaskro penas:

⁵Penenn i menshenge an o foro Jerusalem: Dik, tiro baro rai well pash tute. Job hi latcho un krell pes gar bares. Job hi beshdo ap i esla, ap i terni esla.[64]

⁶Un o Jesuseskre mala djan an o gab, un kran jaake, har o Jesus ap lende penas.

⁷Un jon anan koi esla un lakro ternepen pash leste, un tchiwan pengre ripja koi pre. Un o Jesus beshas pes pral pre.

⁸Un bud bud menshe, kai leha djan, tchiwan pengre ripja ap o drom. Un wawar dan i bare patria i rukendar tele, un tchiwan len ap o drom.

⁹Un kol bud menshe, kai djan glan leste un pal leste, dan bari gole: “Sharas o Davideskro tchawes! Sharedo well kowa, koles o Dewel bitchras. Sharas o Debles an o bolepen!”

¹⁰Un har o Jesus an o foro Jerusalem was, wan kote i tsele menshe diwjo, un jon putchan: “Koon hi kowa?”

¹¹Un kol bud menshe, kai leha djan, penan lenge: “Kawa hi o Debleskro rakepaskro, o Jesus, kai was dran o foro Nazaret, hoi an o them Galilea tchiddo hi.”

¹²Un o Jesus djas an o Debleskro baro kheer, un tradas lauteren win, kai kote bikran un ginan. Un job witsras i lowengre stamja kolendar trujel, kai kol menshenge lowe paran. Ninna i stamja kolendar, kai tchirkle bikran, witsras lo trujel.

¹³Un job penas ap kol tsele menshende: “O Dewel penas: Miro kheer te well i kheer, kai sharenn man i menshe un mangenn man an.[65] Tumer kran lestar i kheer, kai i menshe chochenna un randenna.”

¹⁴Koi wan korele un bange an o Debleskro baro kheer pash o Jesuseste, un job kras len sasto.

¹⁵Un i bare rashaja un i biboldengre tchatchepangre dikan ko baro koowa, hoi o Jesus kote kras an o Debleskri soor. Un jon shunan, har i tchawe an o Debleskro baro kheer bari gole dan un penan: “Sharas o Davideskro tchawes!” Un jon wan chojedo ap o Jesuseste,

¹⁶un penan ap leste: “Shuneh tu, hoi kol tchawe kote penenna?” “Awa,” penas o Jesus ap lende, “me shunau len. Djinenn tumer gar, hoi an o Debleskro lab tchinlo hi: Tu, o Dewel, kral, te sharenn tut i tchawe un i terne.[66]”

¹⁷Un job mukas len, djas dran o foro win, un was an o gab Betani. Un kote atchas lo pral i rat.

¹⁸Un o wawar diwes taissarlake, djas job an o foro pale. Ap o drom las lo bok.

¹⁹Un har job i faigetikro ruk dikas, djas lo kote un hatsas tchi har i patria kokres ap leste. Koi penas lo ap ko ruk: “Kek tsireske wenna pale faige ap tute!” Un ap jek kopo meras kau ruk tele.

²⁰Un har leskre mala kowa dikan, kran le bare jaka, un putchan lestar: “Har nai meras kau ruk jaake sik tele?”

²¹Penas o Jesus: “Tchatchepah, me penau tumenge: Tumer te patsenn ap o Debleste, te krell lo nai hako koowa, palle nai krenn tumer ninna budeder, har me krom kau rukeha. Tumer penenn nai ap koi berga: Hade tut un witse tut an o baro pani! Un kai berga krell kowa.

²²Te patsenn tumer, te lenn kowa, hoi mangenna o Deblestar, palle lenn tumer kowa lauter ninna.”

²³Un har o Jesus an o Debleskro baro kheer was, ap i menshende rakras, un len o Debleskro drom sikras, koi wan i bare rashaja un i biboldengre phureder pash leste, un putchan lestar: “Koon penas tuke, te kress tu kowa lauter? Koon bitchras tut?”

²⁴Koi penas o Jesus ap lende: “Ninna me kamau tumendar tchomone te putchell. Tumer te penenn les mange, palle penau me tumenge ninna, koon man bitchras, te krap me kowa lauter.

²⁵Kanna putchau me tumendar: Bitchras o Dewel o Johannes, te taufrell lo i menshen? Bitchran i menshe o Johannes?” Un jon rakran mashkral pende, un penan: “Te penah mer leske: O Dewel bitchras o Johannes, palle penell lo menge: Hoske patsan tumer les gar?

²⁶Te penah mer leske: I menshe bitchran o Johannes, palle hunte trashas i menshendar. Jon patsenna, te hi o Johanni i Debleskro rakepaskro.”

²⁷Un jaake penan le ap o Jesuseste: “Mer djinah les gar.” Koi penas lo ap lende: “Jaake penau tumenge witar gar, koon man bitchras, te krap me kowa.”

²⁸“Kanna kamau tumenge tchomone te penell: His i dad. Koles his dui tchawe. Un job djas pash ko phureder tchaweste, un penas ap leste: Mo tchawo, dja ap ko kotar them, kai hi i drakengre ruka tardo, un bude kote!

²⁹Penas kowa: Na-a, me kamau gar. Pal i tikno tsiro, khaitas les kowa, hoi job penas. Un job djas, te budrell lo kote.

³⁰Un o dad djas ninna pash o terneder, un penas leske i emlige laba. Un ko terneder penas: Awa, mo rai, me djau kote. Un job djas gar.

³¹Koon kol dujendar kras kowa, hoi o dad kamas?” Penan le ap leste: “O phureder.” Penas o Jesus: “Tchatchepah, me penau tumenge: Kol bibolde, kai i lowe i Remarjenge dren lenna un hi tumenge pale-tchiddo, un i lubja wenna sikeder ap o Debleskro drom har tumer.

³²Har o Johanni pash tumende was, te sikrell lo tumende o tchatcho drom, patsan tumer leske gar. I pale-tchidde un i lubja patsan ap leskre laba. Ninna har tumer dikan, te patsan kolla ap leskre laba, mukan tumer gar tumaro tchilatcho drom un patsan leske witar gar.”

³³Un o Jesus penas lenge laba, kai i khatedo tchatchepen dren hi: “Shunenn, hoi me tumenge kanna penau. His i rai. Koles his i kotar them. Kote tchiwas lo drakengre ruka an i phub. Trul ko kotar them tchiwas lo barra. Un kote kras lo ninna i platsa an i phub, kai nai stakrenn le ap i drake, te well i mool win[67]. Mashkral kol ruka kras lo i kheer, kai kowa beshdo hi, kai dell garda ap i drake. Palle patsas o rai ko kotar them ap i hachende, te budrenn le kote leske. Un job djas peske an i wawar them.

³⁴Har ko tsiro was, te anenn le i drake dren, bitchras lo peskre budepangren pash i hachende, te lenn le lendar kol drake, hoi leske hi.

³⁵I hache tapran kol budepangren. Ko jekes dan le dawa, un ko wawares maran le. Un pale i wawares witsran le i barrentsa mulo.

³⁶Job bitchras wawar budepangren pash lende, budeder har job o glanstuno kopo bitchras. Un i hache kran lentsa jaake, har kol wawarentsa.

³⁷Koi penas o rai peske: Miro tchawestar darenn le. Un jaake bitchras lo peskro tchawes pash lende.

³⁸Har i hache leskro tchawes dikan, rakran le mashkral pende: Kowa hi leskro tchawo, kai lauter lella pal peskro dadeskro merepen. Awenn, maras les, te well kau kotar them menge, hoi leske hunte wals.

³⁹Un jon tapran les, tradan les dran ko drakengro them win, un maran les.”

⁴⁰Kanna putchas o Jesus kolendar, kai kote tardo hi: “Hoi krell o rai pral ko drakengro them kol hachentsa, te well lo pale?”

⁴¹Penan le ap o Jesuseste: “Job marell kol tchilatche murshen. Les khaitenn jon gar. Un job dell ko kotar them kol wawarende, kai leske i drake an o tchatcho tsiro dren anenna.”

⁴²Penas o Jesus ap lende: “Djinenn tumer gar, hoi an o Debleskro lab tchinlo hi? Kote hi tchinlo: His i bar, kai i budepangre lestar penan: Kowa hi tchi moldo. Ko bar las o Dewel un tchiwas les jaake an o kheer, te rikrell lo ko tselo kheer khetne. O Dewel kras kowa, un kowa hi i baro koowa menge.[68]

⁴³Awa, me penau tumenge: An ko tsiro, hoi wella, han tumer buder gar o Debleskre menshe. O Dewel dell wawar menshen khetne gole, te djiwenn le leha khetne. Un jon krenna, hoi o Dewel kamella.

⁴⁴Koon ap kau bar perella, kowa merella. Ap koneste kau bar perella, koles dell ko bar khetne.”

⁴⁵I bare rashaja un i Farisarja shunan kol laba un haiwan, te rakras lo lendar.

⁴⁶Un jon kaman les te taprell, un kran kowa gar. Jon daran i menshendar. Kolla patsan, kai hi o Jesus o Debleskro rakepaskro.