Read O Debleskro Drom - I Bibla an o Romano Rakepen 2021 Mateo 22 Bible Online

Mateo 22 - O Debleskro Drom - I Bibla an o Romano Rakepen 2021 bible

Mateo 22

¹Un o Jesus rakras pale sawe laba ap lende, kai i khatedo tchatchepen dren hi. Un job penas:

²“Te dell o Dewel i menshen gole, te wenn le pash leste, hi kowa jaake har pash i baro rajeste, kai kras peskro tchaweske i bari bijab.

³Ap ko tsiro, kai i bijab his, bitchras lo peskre budepangren pash i menshende, te denn le len pash i bijab gole. Un jon kaman gar te well.

⁴Un pale bitchras lo wawar budepangren pash kolende, te penenn le ap lende: Shunenn, me krom i chapen tumenge, un marom thulle grumja. Un wawar latcho chapen un pipen hi lauter koi. Awenn ap i bijab!

⁵Un kolla shunan gar ap lende un djan penge. Ko jek djas ap peskro kotar phub, ko wawar ap o mangepen.

⁶Un pale wawar tapran kol budepangren, praassan len, un maran len.

⁷O baro rajes tapras i bari choli, un job bitchras peskre lurden, te marenn le kol marepangren, un te chatchrenn le lengro foro.

⁸Palle penas lo ap peskre budepangren: Kanna hi i bijab. Un kol menshe, kai me ap o chapen gole dom, hi gar moldo, te wenn le ap i bijab.

⁹Djan kanna ap i dromma, kai bud menshe hi! Un penenn lauterenge, kai tumer kote hatsenna, te wenn le ap i bijab!

¹⁰Un kol budepangre djan ap kol tsele dromma, un anan lauteren khetne, i tchilatchen un i latchen. Un jaake bud menshe wan ap i bijab, te was o kheer pherdo.

¹¹Un o baro rai was an o kheer, te dikell lo kolen, kai kote hi. Koi dikas lo kote i murshes, kai kek bijabeskro ripen ap leste hi.

¹²Un job penas ap leste: Miro maal, tut hi kek bijabeskro ripen ap tute, te nai djah tu ap i bijab. Hoi kreh tu kate? Un kowa nashte penas leske tchi.

¹³Penas o baro rai ap peskre budepangre: Pandenn les ap i pire un ap i wasta, un witsrenn les win an i kali rat! Un kote rowenn le un dandrenn i danda i dukatar khetne.”

¹⁴Palle penas o Jesus ap kolende, kai trul leste tardo hi: “Bud menshen dell o Dewel gole. Kolla kokres, kai pash leste wenna, mukell lo dren te djal.”

¹⁵Un pal kowa wan i Farisarja khetne, un rakran mank pende, har jon nai taprenn o Jesuses an leskre laba.

¹⁶Un jon bitchran pengre murshen pash leste. Lentsa djan ninna wawar mursha. Kolla his o Herodeskre mala. Un jon penan ap leste: “Sikepaskro, mer djinah, tu peneh o tchatchepen, un sikreh mishto i menshende o Debleskro drom. Tu rakreh kekeske pal o mui, ninna te hi len bud penepaske.

¹⁷Pen menge kanna: Hi mishto pal maro tchatchepen, te das mer o themeskre lowe o baro rajeste an o foro Rom?”

¹⁸O Jesus haiwas lengro tchilatchepen un penas ap lende: “Tumer rakrenn dui tchipjentsa. Hoske kamenn tumer man an mire laba te taprell?

¹⁹Denn man i rupeni bema!” Un jon dan les jek bema.

²⁰Koi putchas lo lendar: “Koneskro shero un lab hi ap kai bema?”

²¹Penan le: “O shero un o lab o baro rajestar an o foro Rom!” Penas lo ap lende: “Jaake denn leste, hoi leskro hi! Un denn o Debleste, hoi leskro hi!”

²²Un har jon kol laba lestar shunan, kran le bare jaka. Un jon mukan les, un djan penge.

²³Ap ko diwes wan i Sadduzarja pash leste. Jon hi kolla, kai penenna: O Dewel krell i mulen gar djido.

²⁴Jon penan ap leste: “Sikepaskro, o Mose penas: Te merell i romedino mursh, un les his kek tchawe, palle hunte romedinerell peskro phraal koi romjat, te well peskro phraleske i ternepen boldo.

²⁵Koi his pash mende efta phrala. Un o phurester, kai romedino his, meras. Les his kek tchawe. Doleske las peskro phraal koi romjat.

²⁶Un ko duito meras, un les his kek tchawe. Un ko triinto romedineras lat un meras. Un les his kek tchawe. Un jaake djas kowa bis ap o eftato. Jek pal o wawar romedineran lat un meran. Un lauteren his kek tchawe.

²⁷Un har i tsele phrala mulo his, meras koi romni ninna.

²⁸Kanna putchah tutar: Ap ko tsiro, kai krell o Dewel i mulen djido, koneskri romni hi li? Hake efta his lah romedino.”

²⁹Penas o Jesus ap lende: “Tumer prindjrenn gar o Debleskro lab un o Debleskri soor witar gar. Doleske haiwan tumer tchi.

³⁰Kol mulen, kai o Dewel djido krella, kolla romedinerenn buder gar, un wenna gar romedino. Jon hi har i bolepangre an o bolepen.

³¹An o Debleskro lab hi tchinlo, te wenn i mule djido. Kote penell o Dewel:

³²Me hom o Abrahameskro Dewel un o Isaakeskro Dewel un o Jakobeskro Dewel.[69] Un me penau tumenge: Job hi gar o Dewel kolenge, kai mulo hi. Na-a, job hi o Dewel i djidenge.”

³³Kolla bud menshe, kai trul o Jesuseste tardo his, kolenge atchas o rakepen krik, har jon kowa lestar shunan.

³⁴O Jesus rakras jaake, te nashte penan leske i Sadduzarja tchi buder. Har i Farisarja kowa shunan, wan le khetne.

³⁵Un jek lendar, i biboldengro tchatchepaskro, kamas te taprell lo les an leskre laba un putchas lestar:

³⁶“Sikepaskro, kol tsele labendar, kai penenna, hoi o Dewel mendar kamella, hawo lab hi o bareder lendar?”

³⁷Penas o Jesus ap leste: “Tu kamess tiro Debles o tselo djijestar an tiro tselo djipen, an lauter, hoi tu djineh.[70]

³⁸Kowa hi o bareder lauterestar, hoi o Dewel tutar kamella.

³⁹Ninna kamell lo tutar, te wess jaake latches ap koleste, kai pash tute hi, har hal latches ap tute kokres.[71]

⁴⁰Kowa, hoi o Mose un i tsele Debleskre rakepangre menge penan, hoi o Dewel mendar kamella, kowa hi an kolla dui bare Debleskre laba penlo.”

⁴¹I Farisarja his gomme khetne pash o Jesuseste. Un job putchas lendar:

⁴²“Hoi penenn tumer pral ko baro rajeste, kolestar o Dewel penas, te well job? Koneskro tchawo hi lo?” Penan le: “O Davideskro tchawo.”

⁴³Penas o Jesus: “Te hi kowa tchatcho, har nai penas o David ap leste: Mo rai? Kau lab tchiwas o Debleskro Ducho an o Davideste,

⁴⁴har job penas: O Dewel penas ap miro rajeste: Besh tut ap miri tchatchi rig, te tchiwap kolen tel tire pire, kai hi chojedo ap tute.[72]

⁴⁵Kate penas o David ap leste: Mo rai. Har well lo nai leskro tchawo?”

⁴⁶Un kek lendar nashte penas o Jesuseske jek lab koi pre. Un pal ko diwes trashan le, te putchenn le lestar budeder.