Read O Debleskro Drom - I Bibla an o Romano Rakepen 2021 Mateo 24 Bible Online

Mateo 24 - O Debleskro Drom - I Bibla an o Romano Rakepen 2021 bible

Mateo 24

¹Un o Jesus mukas o Debleskro baro kheer. Har job peske djas, wan peskre mala pash leste, te sikrenn le leste o tselo Debleskro baro kheer.

²Koi penas lo ap lende: “Kowa, hoi tumer kote lauter dikenna, kowa lauter djal paash. Kate atchell kek bar ap i wawareste.”

³Pale djas lo ap i djeteskri berga un beshas pes. Leskre mala kokres his pash leste un putchan lestar: “Ap hawo tsiro well o Debleskro baro kheer tele phagedo? Har nai dikas mer, te was ko tsiro, kai tu pale weh, un o Dewel o rai hi pral halauter?”

⁴Penas o Jesus: Denn jak, ma mukenn tumen kekestar o Debleskro dromestar tele te anell!

⁵Bud mursha wenna un penenna: Me hom o Kristo, ko baro rai, kolestar o Dewel penas, te well job! Un bud menshe patsenn ap lengro chochepen.

⁶Baro kurepen wella an kol themma, kai hi dur tumendar un ninna an kolla themma, kai hi gar dur tumendar. Te shunenn tumer kowa, ma trashenn! Ko hunte well jaake. Ko tsiro, kai o Dewel o rai hi pral halauterende, well gar jaake sik.

⁷I pralstune pral bare themma kurenn pen i wawar pralstunentsa. Un i menshe dran jek them marenn kolen an i wawar them. An bud themma hi i menshen gar doha te chal. Un kate un kote well i phub trisslemen[76].

⁸Kowa lauter wella jaake pral i phub, har i duka wenn pral i djuwjate, kai lell i ternepen.

⁹Palle taprenn le tumen, denn tumen dawa, un marenn tumen. Un i menshe an i tsele themma wenna chojedo ap tumende doleske, kai patsenn tumer ap mande.

¹⁰Un bud denn pengro patsepen ap mande pre, un phukrenn ninna ap i wawarende, kai ap mande patsenna, un jek krell o wawareske tchilatchepen.

¹¹Ninna wenna bud chochene rakepangre un penenna, te hi le bitchedo o Deblestar. Kolla anenn bud menshen o tchatcho dromestar tele.

¹²O tchilatchepen well jaake baro ap i phub, te denn bud patsle pengro kamlepen i wawarenge pre.

¹³Kowa, kai atchell soreles tardo an o patsepen, jaake rah, har job djiwella, kowa lell o Debleskro djipen.

¹⁴Ap i tseli phub well i menshenge ko latcho lab penlo, kai o Dewel kamell len dran o tchilatchepen te lell un kamell lengro rai te well. I menshe an hake themma hunte shunenn ko lab. Un palle well ko tsiro, kai hi o Dewel o rai pral lauterende.

¹⁵Glan i rah tsiro rakras o Debleskro rakepaskro Daniel pral koi djungeli tchilatchi figura[77]. Koon kawa drawerella[78], kamaus, te haiwell lo les ninna. Ap ko diwes, kai dikenn tumer koi djungeli tchilatchi figura an o Debleskro baro kheer tardo,

¹⁶hunte nashenn kolla, kai an o them Judea djiwenna, sik ap i berga.

¹⁷Kowa, kai pral ap o kheer hi, hunte djal buder gar an peskro kheer dren, te lell lo peskro koowa win.

¹⁸Un kowa, kai ap i kotar phub budrella, kowa hunte djal buder gar khere, te lell lo peskri baja.

¹⁹Koi bibacht hi bari kol djuwjenge, kai hi an wawar koowa, ninna kol djuwjenge, kai hi len i ternepen.

²⁰Mangenn o Deblestar, te hunte nashenn gar krik an o wend, witar gar ap o Debleskro diwes!

²¹Ko tsiro wella djungleder har halauter, hoi ap i menshende was, jaake rah, har i phub tardo hi. Un ko tsiro, hoi well pal kowa, well witar gar jaake tchilatcho.

²²Te krals o Dewel o tchilatcho tsiro gar tikneder, palle wals kek mensho dran o tchilatcho tsiro win. Kolen, kai o Dewel peske win rodas, kolenge krell lo o tchilatcho tsiro tikneder.

²³Te penell jek ap tumende: Dikenn, kate hi o baro rai, kolestar o Dewel penas, te well job! palle patsenn les gar! Un te penell i wawar ap tumende: Ake, kote hi lo! palle patsenn les witar gar!

²⁴Bud chochene mursha penenn ap tumende: Me hom ko baro rai, kolestar o Dewel penas, te well job. Un chochene rakepangre penenna: Me hom o Debleskro bitchedo. Un jon krenna baro un sorelo koowa, hoi i mensho nashte krell gar dran peskri soor. Kowa krenn le, te anenn le i menshen o tchatcho dromestar tele. Te djals kowa, anans le ninna kolen o Debleskro dromestar tele, kolen o Dewel peske win rodas.

²⁵Ma bistrenn, hoi me tumenge penom!

²⁶Jon te penenn tumenge: O baro rai, kolestar o Dewel penas, te well job, kowa hi an o mulo them! ma djan kote win! Un jon te penenn: Job hi an ko kheer! ma patsenn len!

²⁷Ap ko diwes, kai o Menshengro Tchawo pale wella, dikenn les i tsele menshe, jaake har i Debleskri jag ap o bolepen diklo well, hoi djal jek rigjatar ap i wawar rig an o bolepen.

²⁸Kote, kai i mulo mass tchiddo hi, kote wenn i bare diwje tchirkle khetne te chan le.

²⁹Un sik pal kol tchilatche diwessa, well o kham kalo har i rat, un o moonto dikell kek buder. Un i bare momlia ap o bolepen perenn tele. Un i bolepaskri soor perell khetne.

³⁰Palle dikenn le o Menshengro Tchawes, har job dran o bolepen wella. An hake themma dikenn le les, har job wella ap i wolke bari sorjah un railepen. Un jon rowenna un penenna: Patsams mer ap leste!

³¹Un job bitchrell peskre bolepangren pral i tseli phub. Un kolla phurdenn an i bashepangre[79], te anenn le dran hako them kolen khetne, kai o Dewel peske win rodas.

³²Me kamau te sikrap tumende tchomone. Dikenn ap o faigetikro ruk! Te wenn leskre kashta senelo, un i patria wenn dran lende win, palle djinenn tumer, te well sik o nijal.

³³Jaake hi kowa ninna koleha, pral kowa rakrom. Te dikenn tumer, har kowa lauter wella, palle djinenn tumer, kai o Debleskro tsiro was.

³⁴Tchatchepah, me penau tumenge: Kol menshe, kai an ko tsiro djiwenna, dikenna kowa lauter pengre jakentsa.

³⁵O bolepen un i phub atchenna gar. Mire laba atchenna hako tsiro.

³⁶Kek djinell ko tsiro, kaana kowa lauter wella. I bolepangre an o bolepen djinenn les gar, witar gar o Debleskro tchawo. Miro dad an o bolepen kokres djinell les.

³⁷Jaake har i menshe djiwan an ko tsiro, kai o Noah djiwas, jaake djiwenn le an ko tsiro, kai o Menshengro Tchawo pale wella.

³⁸Glan ko tsiro, har o baro pani was, chan un pijan le, romedineran le, un wan romedino. Har o Noah an o panjeskro kheer djas,

³⁹haiwan le gar, hoi koi djas. O baro pani was pral lende, un jon lauter tassan. Jaake djal kowa ninna ap ko diwes, kai well o Menshengro Tchawo pale.

⁴⁰Dui budrenn ap i kotar phub. Ko jek well krik lino, ko wawar atchell koi.

⁴¹Dui djuwja krenn jarro dran djob. Koi jek well krik lino, koi wawar atchell koi.

⁴²Rikrenn tumare jaka pre! Tumer djinenn gar ko diwes, kai tumaro rai pale wella.

⁴³Haiwenn: Te djinals o rai pral i kheer ko tsiro an i rati, kaana o tchorepaskro wella, palle sowals lo gar, un mukals kekes an peskro kheer dren te phagell.

⁴⁴Doleske penau tumenge: Denn garda! Me, o Menshengro Tchawo, wau pale an i tsiro, kai tumer gar djinenna.

⁴⁵I latcho budepaskro della mishto garda ap peskro rajeskro kheer, un sowella gar. Leskro rai das peskre tsele budepangren an leskre wasta. Un ko latcho budepaskro dell len hako diwes kowa, hoi len hunte well djipaske.

⁴⁶Bachtelo hi lo, te well leskro rai pale, un dikell, kai job peskri budi mishto kras.

⁴⁷Tchatchepah, me penau tumenge: Leskro rai dell peskro tselo brawlepen an leskre wasta.

⁴⁸Job te hi i tchilatcho budepaskro un penell ap peste: Miro rai well gar jaake sik pale,

⁴⁹un job dell kol wawar budepangren dawa, un chal un pijell pes mato kolla matentsa,

⁵⁰palle well leskro rai pale ap i diwes, kai o budepaskro gar patsell, te well job. Ap jek kopo hi lo koi,

⁵¹un dell ko budepaskres khetne, un anell les kote, kai i chochene hi. Kote rowenn le, un dandrenn i danda khetne i dukatar.