Read O Debleskro Drom - I Bibla an o Romano Rakepen 2021 Mateo 25 Bible Online

Mateo 25 - O Debleskro Drom - I Bibla an o Romano Rakepen 2021 bible

Mateo 25

¹Un o Jesus penas: Ap ko tsiro, kai wella o Menshengro Tchawo pale, djal kowa jaake har kol deesh terne tchentsa, kai djan ap i bijab. Jon lan pengre momlia an o wast, un djan ap o drom, kai o bijabeskro hunte wella.

²Pantch lendar his dinelo, un pantch lendar his gosewo.

³Kolla pantch dinele lan kek djet peha.

⁴I gosewe tchen his djet an pengre khore.

⁵Un ko bijabeskro was gar jaake sik. Doleske wan lauter khino un sowan dren.

⁶His deesh-te-dujenge an i rati, kote das jek bari gole: O bijabeskro wella! Djan win pash leste!

⁷Koi stan i tsele terne tcha pre, un kran i jag an pengre momlia bareder.

⁸Un kol dinele tcha penan ap kolla gosewe tchende: Denn men djet! Mare momlia djan win.

⁹Penan i gosewe: Na-a! Maro djet hi gar doha menge un tumenge. Djan pash i bikepangre, un ginenn tumenge djet!

¹⁰Har jon kote djan, te ginenn le penge djet, koi was o bijabeskro. Un kolen, kai len djet his, djan leha an o kheer, kai i bijab hi. Un o wudar was pal lende pandlo.

¹¹Un pal i tikno tsiro wan ninna kolla wawar terne tcha glan o wudar, un penan: Rai, rai, kre menge o wudar pre!

¹²Penas lo ap lende: Tchatchepah, me prindjrau tumen gar.

¹³Doleske penau me tumenge: Rikrenn tumare jaka pre! Tumer djinenn gar ko diwes, kai o rai pale wella!

¹⁴Kowa hi jaake har pash o mursheste, kai kamas an i wawar them te djal. Dran kowa das lo peskre budepangren gole, un das len peskro tselo brawlepen an i wast.

¹⁵Hakeneste das lo jaake bud lowe, har kowa haiwas, te ginell un te bikrell kolla lowentsa. Ko jekeste das lo pantch gone pherdo rup, un ko wawareste das lo dui gone, un pale i wawareste jek gono. Un palle djas lo an o wawar them.

¹⁶Un ko mursh, kai kol pantch gone pherdo rup las, kowa djas sik pash i bikepangre, ginas un bikras bud koowa, un anas pantch wawar gone pherdo rup khetne pashel.

¹⁷Un ninna kowa, kai kol dui gone peskro rajestar las, kowa las dui wawar gone pashel.

¹⁸Ko mursh, kai jek gono peskro rajestar las, djas ap i kotar phub un khatras ko rup an i phub.

¹⁹Un pal i rah tsiro was lengro rai pale un mukas peskre budepangren glan leste te anell, te lell lo lendar kol lowe, hoi jon leske khetne anan.

²⁰Un ko budepaskro, kai las lestar pantch gone pherdo rup, djas pash leste, un penas: Mo rai, pantch gone dal man. Un dik, me lom pantch wawar gone pashel.

²¹Penas o rai ap leste: Kowa kral tu mishto. Tu hal i latcho budepaskro. Me dom tut i tikni budi, un tu kral kai budi mishto. Doleske dau me kanna bud koowa an tire wasta. Ab an miro kheer dren, te wess tu mantsa bachteles!

²²Un ko budepaskro, kai las lestar dui gone pherdo rup, kowa djas ninna pash leste, un penas: Mo rai, dui gone dal man. Un dik, me lom dui wawar gone pashel.

²³Penas o rai ap leste: Kowa kral tu mishto. Tu hal i latcho budepaskro. Me dom tut i tikni budi, un tu kral lat mishto. Doleske dau me kanna bud koowa an tire wasta. Ab an miro kheer dren, te wess tu mantsa bachteles!

²⁴Un ko budepaskro, kai jek gono pherdo rup las, kowa djas pash leste, un penas: Mo rai, me djinom, tut hi i dji dran bar. Tu leh tuke o djob, hoi i wawar an i phub tchiwas, te was kowa baro. Tu leh kote tuke khetne, kai budral gar.

²⁵Doleske darom tutar, djom win, un khatrom tiro gono pherdo rup an i phub. Un dik, kate hi lo.

²⁶Penas peskro rai ap leste: I tchilatcho budepaskro hal tu. Tu kral tiri budi gar mishto. Tu djinal, te lap mange o djob, hoi me gar an i phub tchiwom, un lap mange kote khetne, kai budrom gar.

²⁷Tu hunte dals mire lowe kolende, kai patsenn i lowen win. Un te woms pale, palle loms budeder lowe pale, har tu len dal.

²⁸Un palle penas o rai ap i wawarende, kai koi tardo hi: Lenn ko jek gono lestar, un denn les koleste, kai hi les kolla wawar deesh gone!

²⁹Hakeno, kai hi les bud, kowa lell budeder. Jaake well les bud brawlepen. Un kowa, kai hi les gar bud, kolestar well ninna kowa krik lino, hoi les hi.

³⁰Ko budepaskro, kai tchi moldo hi, witsrenn les an i kali rat win! Kote rowenn le, un dandrenn i danda i dukatar khetne.

³¹Un o Jesus penas: Ap ko diwes, kai well o Menshengro Tchawo an peskro tselo railepen, un leha wenna i tsele bolepangre, palle hi lo o rai pral halauter, un rakrell o tchatchepen win pral i tsele menshende ap i phub.

³²Un glan leste wenn i tsele menshe dran hake themma khetne. Un job tchiwell len ap dui rigja, jaake har i bakrengro rai tchiwell i bakre ap jek rig un i busja[80] ap i wawar rig.

³³I latche menshen tchiwell lo ap peskri tchatchi rig, un i wawar ap peskri serwi rig.

³⁴Un palle penell o baro rai ap kolende, kai ap leskri tchatchi rig tardo hi: Ap tumende well i bacht miro dadestar an o bolepen. Awenn un djiwenn mantsa khetne an miri harmenatsjona. Kowa kamas o Dewel jaake rah har o bolepen un i phub koi hi.

³⁵Man his bok. Un tumer dan man te chal. Man his trush. Un tumer dan man te pijell. Me homs kek tumendar. Un tumer lan man an tumare khera.

³⁶Man his kek ripen ap mande. Un tumer dan man i ripen. Me homs nasselo. Un tumer wan pash mande. Me homs an o stilepen. Un tumer wan ninna pash mande.

³⁷Palle putchenn lestar i latche menshe, kai ap peskri tchatchi rig tardo hi: Rai, kaana his tut bok, un mer dam tut te chal? Un kaana his tut trush, un mer dam tut te pijell?

³⁸Un kaana hals tu kek mendar, un mer lam tut an mare khera? Un kaana his tut kek ripen, un mer dam tut jek?

³⁹Un kaana hals tu nasselo un stildo, un mer wam pash tute?

⁴⁰Un o baro rai penell lenge: Tchatchepah, me penau tumenge: Ko latchepen, hoi tumer jekeske mire tchorwele phralendar kran, ko latchepen kran tumer mange.

⁴¹Un palle penell job kolenge, kai ap leskri serwi rig tardo hi: Tumer han tel o Debleskro praassepen tardo! Djan tumenge! Djan an koi jag, hoi chatchella hako tsiro, un hoi hi o bengeske un leskre kurepangre kerdo!

⁴²Man his bok. Tumer dan man tchi te chal. Man his trush. Tumer dan man tchi te pijell.

⁴³Me homs kek tumendar. Un tumer lan man gar an tumare khera dren. Man his kek ripen, un tumer dan man kek. Me homs nasselo un stildo, un tumer wan gar pash mande.

⁴⁴Un palle penenn jon ap leste: Rai, kaana his tut bok un trush? Kaana hals tu kek mendar? Kaana his tut kek ripen? Kaana hals tu nasselo un stildo, un mer hams gar tuke koi?

⁴⁵Palle penell lo ap lende: Tchatchepah, me penau tumenge: Ko latchepen, hoi tumer gar jekeske mire tchorwele phralendar kran, ko latchepen kran tumer mange ninna gar.

⁴⁶Un kol tchilatche len i phagi hako tsireske. I latche lenn o djipen, hoi gar pre-herella.