Read O Debleskro Drom - I Bibla an o Romano Rakepen 2021 Mateo 26 Bible Online

Mateo 26 - O Debleskro Drom - I Bibla an o Romano Rakepen 2021 bible

Mateo 26

¹Un har o Jesus kowa lauter ap i tsele menshende penas, kai kote his, penas lo peskre malenge:

²“Tumer djinenna, an dui diwessa wenn kol bare diwessa, kai Passa[81] kharenna. Un o Menshengro Tchawes well an i wasta kolendar dino, kai les ap o trushel denna, te merell lo.”

³Ap ko tsiro wan i bare rashaja un i biboldengre phureder khetne an o kheer o baro rashajestar. Koleskro lab his Kajafas.

⁴Un jon rodan i drom, har nai taprans le o Jesuses tchorchanes, te marenn le les.

⁵“Mer taprah les gar ap o Passa,” penan le, “te wenn i menshe gar diwjo un chojedo ap mende.”

⁶Un o Jesus his an o gab Betani, an o Simoneskro kheer. Kowa hi ko Simon, kai his les i djungelo nasslepen ap peskro mass.[82]

⁷Un har o Jesus kote chas, was i djuwel pash leste. Kolat his i tushni[83] an o wast. Kote his kutch djet dren. Ko djet tchoras joi ap leskro shero win, te makell li les dren.

⁸Un har leskre mala kowa dikan, choiran le pen un penan: “Hoske tchoras li ko djet tchitcheske win?

⁹Te bikrams ko djet, lams bud lowe. Un kol lowe nai dams mer i tchorwelende.”

¹⁰Un har o Jesus haiwas, hoi rakran le, penas lo ap lende: “Mukenn koi djuwjat! Joi kras i latcho koowa.

¹¹I tchorwele hi hako tsiro pash tumende. Me hom gar hako tsiro pash tumende.

¹²Kowa, hoi joi kras, kras li, te makell li man dren ko diweske, kai wau paskedo.

¹³Tchatchepah, me penau tumenge: Ap i tseli phub, kai mire laba i menshenge penlo wenna, koi well ninna penlo, hoi koja djuwel mange kras. Joi well gar bistedo.”

¹⁴Pal kowa djas jek kol deesh-te-dujendar, leskro lab hi Judas Iskariot, pash i bare rashajende,

¹⁵un putchas lendar: “Kitse lowe denn man tumer, te dau les an tumare wasta?” Un jon dan les trijanda rupene beme.

¹⁶Un palle rodas o Judas i latcho tsiro, kai nai dals lo les an lengre wasta.

¹⁷O diwes glan ko kurko, kai i bibolde o maro chan, kai kek shutlo jarro dren hi, wan i Jesuseskre mala pash leste, un putchan lestar: “Kai kameh tu, te kras o chapen tuke?”

¹⁸Koi penas job lenge, pash hawo mursheste an o foro Jerusalem jon hunte djan. “Koleske penenn”, penas job, “maro sikepaskro penell tuke: Miro tsiro hi kanna kai. Pash tute kamau te chal o chapen mire malentsa.”

¹⁹Un o Jesuseskre mala djan kote, un kran les jaake, har job kowa penas. Un jon kran o chapen.

²⁰Ap i rati was o Jesus peskre deesh-te-dui malentsa an ko kheer. Un jon beshan pen, te chan le ko chapen.

²¹Pash o chapen penas lo ap lende: “Tchatchepah me penau tumenge: Jek tumendar phukrella ap mande.”

²²Kowa dukas len an o dji. Un jon putchan lestar, jek pal o wawar: “Mo rai, hom me kawa?”

²³Penas lo ap lende: “Ko mursh, kai tchiwell o maro mantsa an jek tcharo, kawa phukrell ap mande.

²⁴O Menshengro Tchawo hunte merella, jaake har hi lestar tchinlo an o Debleskro lab. Hawi bibacht well ap koleste, kai ap leste phukrella! Koleske wals feteder, te wals lo gar boldo.”

²⁵Un o Judas, kai ap leste phukrell kamell, putchas lestar: “Sikepaskro, hom me kowa?” Penas o Jesus: “Awa, tu hal kowa.”

²⁶Har jon chan, las o Jesus o maro, parkras pes pash o Debleste, phagas ko maro, das les peskre malende, un penas: “Ake, lenn ko maro un chan les! Kau maro hi miro mass.”

²⁷Palle las lo i khoro, parkras pes pash o Debleste, das lende ko khoro, un penas: “Pijenn halauter lestar!

²⁸Kai mool hi miro rat, hoi me ratau budenge, te lap lengri doosh lendar. Jaake krau i drom, kai o Dewel un i menshe mala wenna.

²⁹Un me penau tumenge: Me pijau buder gar i mool, bis te well ko diwes, kai me pijau newi mool tumentsa khetne pash miro dadeste an o bolepen.”

³⁰Un palle giwan le o Debleske i gili, un djan win pash o djeteskri berga.

³¹Kote penas o Jesus lenge: “Kai rati nashenn tumer halauter mandar. An o Debleskro lab hi tchinlo: O Dewel penella: Me dau o bakrengro rajes. Un i bakre nashenn penge.[84]

³²Pal kowa krell o Dewel man i mulendar djido. Un te djan tumer an o them Galilea, djau glan tumende.”

³³Koi penas o Petro ap leste: “Ninna te nashenn halauter tutar krik, me mukau tut gar.”

³⁴Penas o Jesus ap leste: “Tchatchepah me penau tuke: Kai rati dell o bashno gar gole jaake rah har tu man gar triin kope buchoste dal[85].”

³⁵Penas o Petro: “Ninna te hunte meroms tuha, doms tut gar buchoste.” Ninna kol tsele wawar penan kowa.

³⁶Un palle djas o Jesus peskre malentsa an i baar[86], hoi kharella Getsemani. Un job penas ap lende: “Beshenn tumen kate! Me djau kote, te rakrap o Debleha.”

³⁷Un job las o Petres un kol dui Zebedeskre tchawen peha, un djas kote. Un leskro dji rowas, un i daar tapras les.

³⁸Koi penas lo ap lende: “Miro dji rowella, un mange hi jaake har te merap. Atchenn kate un sowenn gar dren!”

³⁹Un job djas i kotar drom dureder, witsras pes ap i phub, un mangas o Debles: “Mo dad, te kameh tu, muk kek duka un merepen ap mande te well! Mangau tut: Ma kre, har me kamau! Kre jaake, har tu kameh!”

⁴⁰Un job djas pale pash lende un dikas, har sowan le, un penas ap o Petreste: “Kate dik, kek tikno tsiro nai atchan tumare jaka pre.

⁴¹Ma sowenn dren! Mangenn o Deblestar, te perenn gar miro dromestar tele! Tumen kokres hi kek soor te atchenn pash mande, ninna te kamell kowa tumaro dji.”

⁴²Un palle djas lo i duito kopo kote, te mangell lo o Debles. Un job penas pale: “Mo dad, tu te kameh gar kol duka un merepen mandar te lell, palle muk kowa te well, hoi tu kameh!”

⁴³Un job djas pale pash lende un dikas, te sowan le pale. Jon rikran nai pengre jaka gar pre.

⁴⁴Un job mukas len, un djas pale kote, te mangell lo o Debles, un penas pale kolla laba o Debleske.

⁴⁵Palle djas lo pash peskre malende pale, un penas: “Kamenn tumer dureder sowell un kate tchiddo atchell? O tsiro hi kai, kai denn le o Menshengro Tchawes an i wasta kol tchilatche menshendar.

⁴⁶Stenn pre! Djas menge kanna! Kanna well kowa, kai phukrell ap mande.”

⁴⁷Un har job jaake rakras, was o Judas, ko jek kol deesh-te-dujendar. Pash leste his bud wawar mursha. Len his chare un kashta an i wasta. Kolen bitchran i bare rashaja un i biboldengre phureder.

⁴⁸O Judas kras lentsa win: “Koles, kai tchumrau, kowa hi lo. Koles taprenn!”

⁴⁹Un sik djas lo pash o Jesuseste un penas ap leste: “Latcho diwes, mo rai!” un tchumras les.

⁵⁰Penas o Jesus: “Mo maal, hoske wal tu?” Un palle wan kol wawar mursha, tapran o Jesuses, un pandan les.

⁵¹Un jek kolendar, kai o Jesuseha djas, las peskro charo un das jek klisteske o kand tele. Un kowa his i klisto, kai budrell o baro rashajeske.

⁵²Koi penas o Jesus: “Tchip tiro charo tele! Hakeno, kai i charo lella un dell i wawares, ko well i chareha mulo dino.

⁵³Me nai mangoms miro dadestar an o bolepen, te bitchrell lo mange budeder har efta-deesh-te-dui serja (72.000) bolepangren, te wenn le ap miri rig.

⁵⁴Kowa te kroms, palle nai wals kowa gar tchatcho, hoi an o Debleskro lab tchinlo hi.”

⁵⁵Un koi pre penas lo ap kol tsele murshende, kai trul leste tardo hi: “Tumer wan i charentsa un i kashtentsa pash mande, har te woms i marepaskro. Hako diwes homs an o Debleskro baro kheer un sikrom i menshende o Debleskro drom. Un tumer tapran man gar.

⁵⁶Kawa lauter hunte djas, te well tchatcho, hoi o Debleskre rakepangre glan i rah tsiro an pengre lila tchinan.” Har peskre mala kowa shunan, nashan le penge lauter lestar.

⁵⁷Kolla, kai o Jesuses pandan, anan les pash o baro rashajeste, o Kajafas. Un kote wan i biboldengre tchatchepangre un phureder khetne.

⁵⁸Dur pal leste djas o Petro leske palla, un was glan o shukar kheer o baro rashajestar. Un job djas an o baro wudar dren, un beshas pes pash i lurdende, te nai dikell lo, hoi krenn le o Jesuseha.

⁵⁹Un i bare rashaja un i tsele pralstune bibolde rodan murshen, kai anenn chocheno koowa ap o Jesuseste, te nai marenn le les.

⁶⁰Un jon hatsan tchi, ninna te wan bud mursha pash lende, kai anan chocheno koowa ap leste. Palle wan dui mursha pash lende,

⁶¹un penan: “Kau mursh penas, te nai phagell lo o Debleskro baro kheer tele, un te nai tchiwell lo les an triin diwessa pale pre.”

⁶²Un o baro rashai stas pre un putchas o Jesusestar: “Peneh tu tchi ap kowa, hoi jon ap tute pre anan?”

⁶³O Jesus penas tchi. Pale penas o baro rashai ap leste: “Glan o djido Dewel, pen menge: Hal tu ko baro rai, kolestar o Dewel penas, te well job? Hal tu o Debleskro tchawo?”

⁶⁴Penas o Jesus: “Awa, hi jaake, har tu penal. Un kanna penau tumenge: Ko tsiro well sik, kai dikenn tumer o Menshengro Tchawes, har hi lo beshdo ap i tchatchi rig o sorelo Deblestar, un har well lo ap i wolke dran o bolepen.”

⁶⁵Koi kras o baro rashai peskro ripen paash, te sikrell lo peskri choli, un penas ap i wawar pralstunende: “Job krell pes har o Dewel. Tumer shunan les. Kek hunte penell menge budeder.

⁶⁶Hoi kamenn tumer leha te krell?” Penan le: “Job hunte well maredo.”

⁶⁷Un palle tchungran le leske an o mui, un dan les ap o shero. Wawar dan les an o mui,

⁶⁸un penan ap leste: “Tu, baro rai, pen menge, koon das tut?”

⁶⁹O Petro his win glan o kheer beshdo. Un i budepaskretsa was pash leste, un penas ap leste: “Tu hal ninna jek kolendar, kai o Jesuseha dran o them Galilea was.”

⁷⁰Un job chochras glan kol tsele menshende, kai koi beshdo hi, un penas: “Me haiwau gar, hoi tu peneh.”

⁷¹Un job djas win pash o baro wudar glan ko kheer. Kote dikas les i wawar budepaskretsa. Un koja penas ap kolende, kai kote tardo hi: “Kowa hi ninna jek kolendar, kai his o Jesuseha dran Nazaret khetne.”

⁷²Un pale chochras lo, das pes sowel, un penas ap late: “Me prindjrau kau murshes gar.”

⁷³Un pal i tikno tsiro wan kolla pash o Petreste, kai kote tardo hi, un penan ap leste: “Tchatchepah, tu hal ninna jek kolendar. Tiro rakepen phukrell ap tute.”

⁷⁴Koi tchingras lo, das pes sowel, un penas ap lende: “Me prindjrau kau murshes gar!” Un sik koi pre das o bashno gole.

⁷⁵Un o Petreske wan o Jesuseskre laba an o shero, hoi job leske penas: “O bashno dell gar gole jaake rah, har tu man gar triin kope buchoste dal.” Un o Petro djas dran o baro wudar win, un rowas soreles.