Read O Debleskro Drom - I Bibla an o Romano Rakepen 2021 Mateo 27 Bible Online

Mateo 27 - O Debleskro Drom - I Bibla an o Romano Rakepen 2021 bible

Mateo 27

¹Sik taissarlake wan i tsele bare rashaja un i biboldengre phureder khetne. Un khetne kran le win, te marenn le o Jesuses.

²Un jon pandan les, un anan les pash o themeskro rajeste. Leskro lab his Pilato. Job his i Remari. An leskre wasta dan le o Jesuses.

³O Judas, ko phukepaskro, har haiwas lo, te kran le win, te well o Jesus maredo, khaitas kowa les. Doleske anas job kol trijanda rupene beme pale pash i bare rashajende un pash i biboldengre phureder.

⁴Un job penas ap lende: “Me anom doosh ap mande. Me phukrom ap koleste, kai kek doosh ap peste anas.” Penan le: “Kowa hi gar maro koowa. Kowa hi tiro koowa.”

⁵Koi witsras lo kol trijanda rupene beme an o Debleskro baro kheer, nashas lendar, tchiwas i dori trul peskri meen, un tassras pes.

⁶Kol bare rashaja lan kol rupene beme, un penan: “Ap kal lowe hi o rat pre. Mer nai tchiwah kal lowe gar pash o brawlepen an o Debleskro baro kheer. Kowa djal gar pal o biboldengro tchatchepen.”

⁷Un jon rakran khetne, hoi nai krans le kol lowentsa. Un jon penan: “Mer ginah i kotar them, te nai paskrah kote kolen, kai kek bibolde hi.” [87] Un jon ginan ko kotar them ko romestar, kai krell pirja dran lolo tchik.

⁸Doleske dan le ko kotar them o lab ratli phub. Ninna kau diwes kharell kowa jaake.

⁹Un jaake was kowa tchatcho, hoi o Debleskro rakepaskro Jeremia glan i rah tsiro penas: Jon lan i trijanda rupene beme. Kowa his kol lowe, kai i Israeleskre menshe win kran, te plaissrenn le leske. Kol lowentsa ginan le i kotar them kolestar, kai krell pirja dran lolo tchik, jaake har o Dewel mange kowa penas.[88]

¹⁰

¹¹Un o Jesus his glan o themeskro rajeste, o Pilato tardo. Un kowa putchas lestar: “Hal tu o baro rai pral i biboldende?” Koi penas o Jesus: “Awa, hi jaake, har tu penal.”

¹²Un i bare rashaja un i biboldengre phureder anan doosh ap leste pre. O Jesus penas tchi.

¹³Koi penas o Pilato ap leste: “Shuneh tu gar, hoi jon lauter ap tute pre anenna?”

¹⁴O Jesus penas tchi, kek lab. Un o Pilato kras tchatchepah bare jaka.

¹⁵Ap ko tsiro his jaake, te mukas o themeskro rai ap o Passa jekes dran o stilepen win. Koles nai rodan i bibolde penge win.

¹⁶An ko bersh his i mursh kote stildo, leskro lab his Barabas. Hakeno djinas, te hi job i tchilatcho mursh.

¹⁷Un har jon lauter khetne his, putchas o Pilato lendar: “Kones mukap dran o stilepen win: O Barabes? O Jesuses, kai ninna o Kristo kharella?”

¹⁸O Pilato djinas mishto, te silwerenn le ap o Jesuseste. Un dran kowa dan le les an leskre wasta.

¹⁹Har o Pilato ap o tchatchepaskro beshepaskro beshdo his, te rakrell lo o tchatchepen pral leste win, mukas leskri romni leske te penell: “Ko mursh anas kek doosh ap peste. Muk les te djal! Taissar rati his man i tchilatchi suni, un man his bare duka dran leste.”

²⁰I bare rashaja un i biboldengre phureder rakran bud ap kol tsele menshende kote dren, te penenn jon, te well o Barabas dran o stilepen win, un te well o Jesus maredo.

²¹Un o Pilato putchas lendar: “Kones kol dui murshendar mukap dran o stilepen win?” “O Barabes!” penan le.

²²Koi penas o Pilato ap lende: “Hoi krap o Jesuseha, kai kharella ninna o Kristo?” Penan le halauter: “De les ap o trushel!”

²³Putchas lo lendar: “Hawo tchilatcho koowa kras job?” Kote dan le bari gole: “De les ap o trushel!”

²⁴Har o Pilato dikas, te nai krell lo tchi, un te wenn le diwjeder, las lo pani, thowas peskre wasta glan i tsele menshende, un penas: “Me anau kek doosh ap mande, te well lo maredo. Koi doosh well ap tumende.”

²⁵Un kol tsele menshe penan: “Koi doosh well ap mende un ap mare tchawende!”

²⁶Palle mukas lo o Barabes dran o stilepen win. Un o Jesuses mukas lo i tchupnijah dawa te dell, un das les an i lurdengre wasta, te denn le les ap o trushel.

²⁷Palle anan o Pilateskre lurde o Jesuses an o baro kheer o themeskro rajestar. Un jon dan i tsele lurden gole, te wenn le kote khetne.

²⁸Un jon riwan leske leskre koola win, un tchiwan leske i loli rajeskri plaashka trujel.

²⁹Un jon pandan subjengre kashta khetne, un tchiwan len leske ap o shero, jaake har i baro rai hidjrell shereskro sonakai ap peskro shero. Ninna tchiwan le leske i kasht an leskro tchatcho wast. Un jon mukan pen glan leste ap i tchanga[89] te perell, un kran jaake, har te mangans le i baro rajes an. Jon san pral leste, un penan: “Sharedo wess tu, tu baro rai pral i bibolde!”

³⁰Un jon tchungran ap leste, lan leske o kasht dran o wast, un dan les leske ap o shero.

³¹Har jon san pral leste, riwan le leske koi loli plaashka pale win, un riwan leske leskre koola pale an. Un jon anan les win, te denn le les ap o trushel.

³²Har jon dran o foro win djan, dikan le i murshes dran o foro Kirene. Leskro lab his Simon. Koles tapran le i sorjah, un kran, te hidjrell lo o Jesuseskro trushel.

³³Un har jon ap ko kotar them wan, hoi kharella Golgata, — kowa kharella Muleskro Shero,

³⁴— dan le les mool te pijell, kai tchomone dren hi, hoi kharella Galle. Har job kowa haiwas, kamas lo gar te pijell.

³⁵Un jon dan les ap o trushel. Un palle khelan le pral leskre koola, te dikenn le, hoi hakeno lella.

³⁶Un jon beshan pen kote tele, un dan ap leste jak.

³⁷Ap o trushel pral leskro shero tchiwan le i kotar kasht, kai tchinlo hi, hoske job hunte meras. Un koi pre his tchinlo: Kawa hi o Jesus, o baro rai pral i biboldende.

³⁸Leha dan le dui marepangren ap o trushel. Ko jekeskro trushel his tchatches lestar, ko wawareskro trushel his serwes lestar.

³⁹Un kolla, kai kote pashel wan, sikran i gushteha ap o Jesuseste, un praassan les.

⁴⁰Un jon penan ap o Jesuseste: “Tu kamal o Debleskro baro kheer tele te phagell, un an triin diwessa pale pre te tchiwell. Tu te hal o Debleskro tchawo, kre tuke, hoi kral i wawarenge un ab kau trushelestar tele!”

⁴¹Un ninna i bare rashaja, i biboldengre tchatchepangre un phureder san pral leste, un penan:

⁴²“Wawaren las job dran o merepen win. Pes kokres nai lell lo gar dran o merepen win. Te hi lo o baro rai pral o Israel, palle well lo kanna o trushelestar tele. Palle patsah ap leste.

⁴³Job patsas o Debles, un penas: Me hom o Debleskro tchawo. Te kamell o Dewel les o djijestar, mu well lo, un lell les kanna kau trushelestar tele!”

⁴⁴Ninna kol dui marepangre praassan les, kolla kai langs leste ap pengro trushel dino wan.

⁴⁵His deesh-te-dujenge, koi was o diwes kalo har i rat an o tselo them. Un kowa atchas jaake bis trinenge.

⁴⁶Un har trinenge his, das o Jesus bari gole: Eli, Eli, lema sabachtani? Kowa kharella: Miro Dewel, miro Dewel, hoske mukal man tu?

⁴⁷Un kolendar, kai kote tardo his, un kowa shunan, penan: “Kawa dell ap o Elija gole.”

⁴⁸Un jek kol lurdendar anas sik tchomone har i kotar than[90], kras les pherdo shutli mool, tchiwas les ap i kasht, un das les o Jesuses te pijell.

⁴⁹Wawar penan: “Muk les, dikas, te well o Elija, un lell les tele.”

⁵⁰O Jesus das pale bari gole, un meras.

⁵¹Un ko wudar an o Debleskro baro kheer, hoi his kerdo dran kutch pesso than, kowa djas paash an dui kotja fun pral bis tele. Un i phub was trisslemen[91]. Un i bare barra phagan an kotja.

⁵²I mulengre khera phagan pre. Un bud kolendar, kai ap o Debles patsan un meran, wan djido,

⁵³un djan dran pengre mulengre khera win. Pal kowa, har o Jesus ninna i mulendar djido was, djan le an o Debleskro foro Jerusalem. Un bud menshe dikan len kote.

⁵⁴Ko pralstuno lurdo un kol wawar, kai khetne leha ap o Jesuseste jak dan, kolla dikan, te was i phub trisslemen, un hoi lauter koi djas. Koi tapras len i bari daar. Un jon penan: “Kau mursh his tchatchepah o Debleskro tchawo.”

⁵⁵Bud djuwja his i kotar krik tardo un dikan kowa lauter. Kolla wan o Jesuseha dran o them Galilea, te denn le les chapen un pipen.

⁵⁶Mashkral lende his i Maria Magdalena, un koi Maria, kai hi o Jakobeskri un o Josefeskri dai. Un o Zebedeskri romni, lakre tchawe his o Jakobo un o Johanni, joi his ninna kote pash lende.

⁵⁷Har i rat was, was i brawelo mursh dran o foro Arimatia. Leskro lab his Josef. Kowa patsas ninna ap o Jesuseste.

⁵⁸Job djas pash o Pilateste un mangas les, te dell lo les o mulo Jesuses. Un o Pilato penas i lurdenge, te denn le les leste.

⁵⁹Un o Josef las o mulo Jesuses, tchiwas les an i djudji plachta,

⁶⁰un tchiwas les an peskro newo mulengro kheer, hoi job das peske an i baro bar. Palle tchiwas job i baro bar glan o wudar an ko mulengro kheer, un djas peske.

⁶¹Kote his ninna i Maria Magdalena un i wawar Maria. Kolla beshan wergel ko mulengro kheer.

⁶²O wawar diwes his o Debleskro diwes. Un i bare rashaja un i Farisarja wan pash o Pilateste khetne,

⁶³un penan ap leste: “Rai, menge djas an maro shero trujel, te penas ko chocheno, har job djiwas: Pal triin diwessa krell o Dewel man djido.

⁶⁴Dran kowa pen tire lurdenge, te denn le kol triin diwessa ap ko mulengro kheer jak! Jaake te nai tchorenn leskre mala les gar, un te penenn le i menshenge gar: Job stas i mulendar pre. Kowa wals i bareder chochepen har lauter kowa, hoi job penas.”

⁶⁵Koi penas o Pilato ap lende: “Ake, lenn lurden tumentsa un denn jak ap ko mulengro kheer, jaake har tumer patsenn, te hunte well kowa!”

⁶⁶Un jon djan pash o mulengro kheer, un kran i sikepen ap ko bar, te dikenn le, te las jek o bar krik. Un kol lurde dan jak ap ko mulengro kheer.