Read O Debleskro Drom - I Bibla an o Romano Rakepen 2021 Mateo 6 Bible Online

Mateo 6 - O Debleskro Drom - I Bibla an o Romano Rakepen 2021 bible

Mateo 6

¹Denn jak, har krenn tumer latcho koowa! Ma krenn les jaake, te dikenn i menshe kowa un sharenn tumen! Koon tumendar kowa krella, koles dell tumaro dad an o bolepen kek latchepen pale.

²Tu te deh i tchorweles lowe, palle ma pen kowa hakeneske! Ma kre har kolla, kai hi len dui djia, un penenn an i biboldengre kangria un ap o drom, hawo latchepen jon kran, te wenn le i menshendar sharedo. Tchatchepah, me penau tumenge: Kolla lenna buder tchi o Deblestar. Jon anan pengro latchepen kokres dren.

³Tu te deh i tchorweles lowe, palle kre les tchorchanes, te djinell les kek! Muk tiro serwo wast gar te djinell, hoi tiro tchatcho wast kras! O Dewel, kai hi tiro dad an o bolepen, dikell ninna kowa, hoi tu tchorchanes kral. Un job dell tut ko latchepen pale, hoi tu kral.

⁵Tu te rakreh o Debleha, palle ma kre kowa har kolla, kai hi len dui djia. Jon kamenn, te dikenn len i menshe, har jon an i biboldengre kangria un ap o drom tardo hi, un o Debleha rakrenna. Tchatchepah, me penau tumenge: Kolla lenna tchi o Deblestar. Jon anan pengro latchepen kokres dren.

⁶Tu te rakreh o Debleha, palle dja an tiri isema[28], klide o wudar pal tute, un kote rake o Debleha! Un o baro Dewel, kai hi tiro dad an o bolepen, dikell tut kote. Un job dell o latchepen pale, hoi tu kral.

⁷Tumer te rakrenn o Debleha, palle penenn leske gar bud laba, jaake har kolla krenna, kai prindjrenn o tchatcho Debles gar. Jon patsenna, te rakrenn le bud, palle shunell len lengro dewel.

⁸Ma krenn kowa jaake har jon! Un o baro Dewel, kai hi tumaro dad an o bolepen, djinella, hoi hunte well tumen djipaske. Job djinella kowa glan ko tsiro, kai tumer les mangenna.

⁹Tumer te rakrenn o Debleha, penenn: Maro dad an o bolepen. Tiro lab well sharedo!

¹⁰Te well ko tsiro sik, kai tu o rai hal pral i tseli phub! Te krenn i menshe ap i phub kowa, hoi tu kameh, jaake har ninna kolla an o bolepen krenn, hoi tu kameh!

¹¹De men maro maro hako diwes!

¹²Un biste mari doosh, hoi mer ap mende anam! Un ninna mer bistrah o tchilatchepen, hoi i wawar ap mende kran.

¹³Ma muk men tiro dromestar tele te djal! Le men dran o bengeskro wast win!

¹⁴Tumer te bistrenn o tchilatcho koowa, hoi i wawar ap tumende kran, palle bistrell tumaro dad an o bolepen ninna o tchilatchepen, hoi tumer kran.

¹⁵Tumer te bistrenn gar o tchilatcho koowa, hoi i wawar ap tumende kran, palle bistrell tumaro dad an o bolepen witar gar o tchilatchepen, hoi tumer kran.

¹⁶Te chan tumer i tikno tsiro tchi, te mangenn o Debles an, palle krenn kowa gar jaake, te dikenn i menshe kowa! Ma krenn har kolla, kai hi len dui djia! Jon sikrenn ap pengro mui, te bokenn le pengro Debleske. Tchatchepah, me penau tumenge: Kolla lenna tchi o Deblestar. Jon anan pengro latchepen kokres dren.

¹⁷Tu te chah tchi an ko tsiro, kai tu o Debleha rakreh, palle thob tiro mui, mak tire balla har hako diwes,

¹⁸te dikenn i menshe gar, kai tu bokeh o Debleske. Un o baro Dewel, kai hi tiro dad an o bolepen, djinella, hoi tu leske kreh. Job dikell tut, un dell tut o latchepen pale, hoi tu leske kral.

¹⁹Anenn tumenge kek brawlepen ap i phub khetne! Kote hi i kirme, hoi i ripja chana. Koi krell o pani o saster paash. Kote hi i tchorepangre, kai tchorenn tumaro brawlepen.

²⁰Anenn tumenge brawlepen an o bolepen khetne, kai kek tchorepaskro tumaro koowa hatsella! Un kek kirme, witar kek pani krell les paash.

²¹Kote, kai tiro brawlepen hi, kote hi ninna tiro dji.

²²O mensheskro jak hi har i momeli an i kheer. Te dikeh kokres ap o Debleste, hi kowa jaake, har te chatchell koi momeli mishto.

²³Te dikeh ap o wawar koowa, un gar ap o Debleste, hi kowa jaake, har te chatchell kek momeli an kau kheer. Te chatchell tiri momeli buder gar, djiweh tu har an i kali rat.

²⁴Kek budrell nai dui rajenge. Te wals kowa jaake, budrals lo ko jekeske mishto, un ko wawareske gar mishto. Ko jekes kamals job gar, kol wawares kamals job o djijestar. Tu nai budreh gar o Debleske un rodeh tiro brawlepen.

²⁵Doleske penau me tumenge: Ma darenn tumaro djipaske! Ma darenn, te well tumen tchi te chal un tchi te pijell, witar gar, te well tumen tchi an-ripaske! O djipen hi budeder moldo har o chapen. Un o mensho hi budeder moldo har o ripen.

²⁶Dikenn ap i tchirkle! Jon witsrenn kek djob an i phub, te well lo baro. Witar gar anenn le o baro djob dren, te tchiwenn le les an o djobeskro kheer. Tumaro dad an o bolepen dell len te chal. Tumer han budeder moldo har jon.

²⁷Kek tumendar nai tchiwell jek diwes budeder pash peskro djipen pashel!

²⁸Hoske trashenn tumen, te well tumen tchi an-ripaske? Dikenn, har ap o senlepen shukar blume baro wenna! Jon budrenna gar un krenn penge kek ripja.

²⁹O baro rai Salomo an peskro tselo railepen his gar jaake shukar an-rido har jek lendar.

³⁰O Dewel kras o senlepen jaake shukar, hoi kau diwes win tardo hi, un o wawar diwes an o bob witsedo wella. Kitse kope budeder nai dell lo tumen an-ripaske! Hoske hi tumaro patsepen jaake tikno?

³¹Ma darenn un ma penenn: Hoi chas? Hoi pijas? Hoi riwas?

³²Kowa krenn kol menshe, kai prindjrenn o Debles gar. Tumaro dad an o bolepen djinella, hoi tumen hunte well djipaske.

³³Mukenn o Debles o rai pral tumende te well, un krenn lauter, hoi job kamella! Un o Dewel dell tumen lauter, hoi tumen hunte well djipaske.

³⁴Doleske penau tumenge: Ma darenn glan kowa, hoi taissar wella! Mukenn o wawar diwes ap tumende te well, un palle dikenna, hoi te krenn! Hako diwes hi tumen doha, hoi krell tumaro djipen phares.