Read O Debleskro Drom - I Bibla an o Romano Rakepen 2021 Mateo 7 Bible Online

Mateo 7 - O Debleskro Drom - I Bibla an o Romano Rakepen 2021 bible

Mateo 7

¹Ma sikrenn ap i wawarengri doosh! Un o Dewel dikell gar ap tumari doosh.

²Te hi tumen i baro dji i wawarenge, hi o Debles ninna i baro dji tumenge. Hi tumen kek baro dji lenge, hi o Debles witar gar i baro dji tumenge.

³Hoske kameh tu i tikno kasht dran tiro phraleskro jak win te tserdell, un tu dikeh gar o baro kasht an tiro jak?

⁴Har nai peneh tu ap leste: Miro phraal, am kai! Me kamau ko tikno kasht dran tiro jak win tserdell. Un tu dikeh gar o baro kasht an tiro jak.

⁵Tu chocheno! Tu kreh, har te wals tu latcheder har job. Le ko baro kasht dran tiro jak win, palle nai leh tu o tikno kasht dran tiro phraleskro jak win!

⁶Ma witsrenn gar o Debleskro brawlepen glan i djuklende, te djan jon gar ap tumende pre! Ma witsrenn gar i kutch barra glan i balende, te stakrenn le len gar i pirentsa khetne.

⁷Mangenn o Debles! Un o Dewel dell tumen! Rodenn les! Un tumer hatsenn les. Denn ap o wudar, un kowa well tumenge pre kerdo!

⁸Koon mangella, kowa lella. Koon rodella, kowa hatsella. Un koon ap o wudar della, koleske well pre kerdo.

⁹Mashkral tumende hi kek mursh, kai dell peskro tchawes i bar, te mangas job lestar i kotar maro.

¹⁰Witar gar dell kek dad peskro tchawes i sap an o wast, te mangas job lestar i matcho.

¹¹Ninna te han tumer tchilatche menshe, denn tumer tumare tchawen latcho koowa. Har bud budeder dell tumaro dad an o bolepen latcho koowa kolen, kai les mangenna.

¹²Lauter, hoi tumer kamenna, te krenn i menshe tumenge, kowa krenn tumer lenge ninna! Te krenn tumer kowa, jaake krenn tumer lauter kowa, hoi o Mose un i Debleskre rakepangre penan.

¹³Djan an o tikno wudar dren! Nashedo hi kolla, kai djan an o baro wudar ap o buchlo drom. Un bud djan koi.

¹⁴Tikno hi ko wudar un gar buchlo hi ko drom, kai i menshe hatsenn o djipen. Un gar bud hi kolla, kai ap ko drom djana.

¹⁵Denn jak, te patsenn gar kol chochene rakepangren, kai penenn, te wans le o Deblestar bitchedo! Jon krenn, har te wans le tumare phrala. An lengro dji hi le diwje djukle, kai marenna.

¹⁶Ap kowa, hoi jon krenna, dikenn tumer, har jon hi. Ap i subjengro ruk wenna kek drake baro. Witar gar wenna faige baro ap subjengre burra.

¹⁷Jaake well latcho koowa dran i latcho ruk, un djungelo koowa dran i nasselo ruk.

¹⁸Dran i latcho ruk well kek djungelo koowa. Un dran i nasselo ruk well kek latcho koowa.

¹⁹Hako ruk, kai well kek latcho koowa dran leste, well tele dino, un an i jag witsedo.

²⁰Ap kowa, hoi dran lende wella, dikenna, har jon hi.

²¹Kolen, kai penenn ap mande Rai, rai lell o Dewel gar lauter pash peste an o bolepen. Na-a! Kolla kokres, kai krenna, hoi miro dad an o bolepen kamella, kolen lell lo an o bolepen.

²²Well ko diwes, kai o Dewel o tchatchepen pral i tsele menshende wi-rakrella. Ap ko diwes penenna bud ap mande: Rai, rai, an tiri soor penam mer i menshenge, hoi o Dewel menge penas. An tiri soor tradam i bengen[29] win, un kram bud baro sorelo koowa.

²³Palle penau lenge: Me prindjrau tumen gar. Djan mandar, tumer tchilatche!

²⁴Hakeno, kai mire laba shunella un kowa krella, hoi me penau, kowa hi jaake har i gosewo mursh, kai peskro kheer ap i sorelo baro bar kras.

²⁵Har das sorelo brishin, un bud pani was, un i sorelo ducho phurdas ap ko kheer, koi peras o kheer gar khetne. Kowa his ap i sorelo baro bar tardo.

²⁶Hakeno, kai mire laba shunella un kowa gar krella, hoi me penau, kowa hi har i dinelo, kai peskro kheer ap i tchik kras.

²⁷Har das sorelo brishin, un bud pani was, un i sorelo ducho phurdas ap ko kheer, koi peras ko tselo kheer khetne.”

²⁸Un har o Jesus kowa lauter penas, kran kol bud menshe, kai trul leste his, bare jaka.

²⁹Job rakras bari sorjah, un gar jaake har lengre tchatchepangre rakran.