Read O Debleskro Drom - I Bibla an o Romano Rakepen 2021 Marko 1 Bible Online

Marko 1 - O Debleskro Drom - I Bibla an o Romano Rakepen 2021 bible

Marko 1

¹Kowa hi o latcho lab o Jesus Kristestar. Job hi o Debleskro tchawo.

²Kowa was jaake har o Debleskro rakepaskro, o Jesaja, glan i rah tsiro an peskro liil tchinas. O Dewel penas ap peskro tchaweste: Shun, me, o Dewel, bitchrau i murshes glan tute ap o drom, te krell lo tuke i drom, te nai wess pash i menshende.[1]

³Koi hi jek an o mulo them, kai dell gole: Krenn maro Debleske o drom, te nai well lo pash i menshende! Lenn halauter krik, hoi o Debleske an o drom tchiddo hi! [2]

⁴Kowa his o Johanni, kowa, kai taufras i menshen. Job his an o mulo them, un penas i menshenge: “Mukenn tumaro tchilatcho drom! Djan ap o Debleskro drom! Un mukenn tumen te taufrell[3]! Un o Dewel lell tumari doosh[4] tumendar krik!”

⁵Un bud menshe djan pash leste. Jon wan dran o tselo them Judea un dran o foro Jerusalem. Un jon penan o tchilatcho koowa, hoi jon kran. Un o Johanni taufras len an o pani Jordan.

⁶O Johanneskri plaashka his dran viechengre balla. Un i ledertikri dori his trul leste. Un leskro chapen his gwin[5] un stepangre[6].

⁷Un job penas i menshenge: “Koi wella i mursh pal mande, kowa hi sorleder har me. Me hom gar moldo, te tchiwap man glan leste tele, te krap leskre kircha pre.

⁸Me tchiwom tumen an o pani, te well diklo, kai mukan tumaro phuro djipen. Kowa, kai well pal mande, tchiwell o Debleskro Ducho ap tumende.”

⁹His an kol diwessa, kai was o Jesus dran o foro Nazaret, hoi an o them Galilea tchiddo hi, un mukas pes o Johannestar an o pani Jordan te taufrell.

¹⁰Un har o Jesus pes dran o pani hadas, dikas lo, kai djas o bolepen pre, un o Debleskro Ducho was har i parno tchirklo ap leste tele.

¹¹Un i rakepen dran o bolepen penas: “Tu hal miro tchawo, koles me kamau. Pral tute hom bachtelo.”

¹²Un sik pal kowa anas les o Debleskro Ducho an o mulo them.

¹³Un kote atchas lo star-deesh diwessa. Un o beng kamas les o Debleskro dromestar tele te anell. Kote his ninna diwje vieche. Un i bolepangre wan un his leske koi.

¹⁴Har o Johanni stildo was, djas o Jesus an o them Galilea, un sikras i menshende o Debleskro drom.

¹⁵Un job penas: “O tsiro was, kai lell o Dewel i menshen dran o tchilatchepen win. Mukenn tumaro phuro djipen! Un djan ap o Debleskro drom! Un patsenn ap kau latcho lab!”

¹⁶Har o Jesus pash o baro pani an o them Galilea djas, dikas lo o Simones un leskro phrales, o Andreas. Kolla his matchepangre, un witsran pengre matchengre gone an o pani, te taprenn le matchen.

¹⁷Un o Jesus penas ap lende: “Awenn mantsa! Me krau tumendar menshen, kai anenn wawaren pash mande.”

¹⁸Koi pre mukan le pengre matchengre gone un djan leha.

¹⁹Un o Jesus djas dureder, un dikas o Jakobes un leskro phrales, o Johanni. Lengro dad hi o Zebedeo. Jon his an o bero[7] beshdo un kran i matchengre gone tseles.

²⁰Har job len dikas, das lo len gole. Un jon mukan pengro dades, o Zebedeo, an o bero, khetne kolentsa, kai budran leske, un djan o Jesuseha.

²¹Un jon djan an o foro Kapernaum. Ap o Debleskro diwes djas o Jesus an i biboldengri kangri un sikras i menshende o Debleskro drom.

²²Un jon kran bare jaka pral kowa, hoi job lenge penas. Job rakras bari sorjah un gar jaake har i biboldengre tchatchepangre rakrenna.

²³An koi kangri his ninna i mursh, kai his an leste i beng. Un kowa das gole:

²⁴“Hoi kameh tu mendar, Jesus dran Nazaret? Wal tu, te maress men? Me djinau, koon tu hal: Tu weh o Deblestar.”

²⁵Un o Jesus das les trad un penas ap leste: “Ma rake un dja dran leste win!”

²⁶Un ko beng, kai an ko mursheste his, tserdas kau murshes kate un kote, das soreles gole, un djas dran leste win.

²⁷Un lenge atchas o rakepen krik. Un jon putchan mank pende: “Hoi hi kowa? I newo drom sikrell lo men i bari sorjah. Les hi ninna penepaske pral i benga. Un jon shunenn ap leste, un wenn dran i menshende win.”

²⁸Un an i tikno tsiro shunas hakeno lestar an kau tselo them Galilea.

²⁹Har jon dran i biboldengri kangri win wan, djan le an ko kheer, kai o Simon un o Andreas djiwenn. Ninna o Jakobo un o Johanni djan lentsa.

³⁰Un i dai o Simoneskri romjatar his tchiddo ap o tchiben, un lakro shero his tato. Un jon penan o Jesuseske latar.

³¹Un job was pash late, tapras lat pash o wast un kras, te stell li pale pre. Un o nasslepen djas latar. Un joi anas lenge i chapen.

³²Ap i rati, har o kham tele djas, anan jon pash leste i tsele nasselen un kolen, kai his benga an lende.

³³Un i tsele menshe dran o foro wan khetne glan o wudar.

³⁴Un job kras bud nasselen sasto, un las bud nasslepen lendar. Ninna bud bengen[8] tradas lo win un mukas len gar rakrell. Jon djinan, koon job hi. Doleske mukas o Jesus len gar te rakrell.

³⁵Un taissarlake, glan o diwes, stas lo pre, un djas kote, kai lo kokres hi. Un kote rakras lo o Debleha.

³⁶Un o Simon un kolla, kai pash leste his, nashan leske sik palla.

³⁷Un har hatsan le les, penan le leske: “Hakeno rodell tut.”

³⁸Penas lo ap lende: “Mer djas ninna an i wawar forja, te penap kote i menshenge o Debleskro lab. Doleske wom kai, te penap kowa lenge.”

³⁹Un job djas an o tselo them Galilea trujel, un rakras an i biboldengre kangria, un tradas i bengen dran i menshende win.

⁴⁰I mursh was pash o Jesuseste. Koles his i djungelo nasslepen, kai leskro mass tele merella. Job peras glan leste tele, un mangas lestar: “Te kameh tu, nai kreh man sasto.”

⁴¹Un o Jesuses khaitas kowa, un job tchiwas peskro wast ap leste, un penas ap leste: “Me kamau, te wess sasto.”

⁴²Un har job kowa penas, djas ko nasslepen lestar, un job was sasto.

⁴³Un o Jesus bitchras les pestar un penas soreles ap leste:

⁴⁴“Shun, pen kekeske, hoi me krom tuke! Dja pash o rashajeste un sike leste, kai tu sasto wal! Un an kowa glan o Debleste, hoi o Mose penas, te wess erligo kerdo[9]. Kre kowa, te djinenn i menshe, kai tu sasto wal.” [10]

⁴⁵Un ko mursh djas peske, un rakras bud pral kowa, hoi o Jesus leske kras. Un bud shunan kowa, jaake, te nai djas o Jesus buder gar an i forja dren, har job kamas. Un job his win, kote, kai kek menshe djiwan. Un kote wan le pash leste dran i tsele gaba un forja.