Read O Debleskro Drom - I Bibla an o Romano Rakepen 2021 Marko 10 Bible Online

Marko 10 - O Debleskro Drom - I Bibla an o Romano Rakepen 2021 bible

Marko 10

¹Un o Jesus djas dureder un was an ko them Judea un an o them ap i wawar rig o panjestar Jordan. Un pale nashan bud menshe pash leste khetne. Un jaake har job bud kope kras, kras lo kote ninna, un penas lenge o Debleskro lab.

²Un i Farisarja wan pash leste, un kaman les leskre labentsa te taprell. Un jon putchan lestar: “Nai mukell i mursh peskri romjat pal maro tchatchepen?”

³Penas lo lenge: “Hoi penas o Mose tumenge?”

⁴Penan le: “O Mose penas, te tchinell o rom i liil, kai tchinlo hi, kai job mukas lat. Un palle nai mukell lo lat.[35]”

⁵O Jesus penas ap lende: “Tumaro dji hi har bar. Doleske tchinas o Mose, kai nai mukenn tumer tumari romjat.

⁶Kowa his gar jaake, har o Dewel lauter kras. Ap ko tsiro kras lo o murshes un i djuwjat.

⁷Doleske mukell o mursh peskro dades un peskri dat, te djiwell lo peskri romjah khetne. Un kol dui wenna har jek.[36]

⁸Jaake hi le har jek un buder gar dui.

⁹Un kowa, hoi o Dewel khetne anas, kowa hunte krell i mensho gar paash!”

¹⁰Un khere putchan leskre mala lestar pale pral kowa.

¹¹Un job penas ap lende: “Koon peskri romjat mukella un romedinerell i wawar djuwjat, kowa chochell peskri ersti romjat un anell doosh ap peste.

¹²Un te mukell i djuwel peskro romes, un romedinerell i wawares, chochell li peskro ersto romes un anell doosh ap peste.”

¹³Un jon anan tchawen pash leste, te tchiwell lo peskre wasta ap lende. Leskre mala tchingran ap kolende, kai anan len pash leste.

¹⁴Har o Jesus kowa dikas, was lo chojedo, un penas ap lende: “Mukenn kol tchawen pash mande te well! Ma rikrenn len pale! Sawe har jon, kolen das o Dewel gole, te djiwenn le khetne leha an o bolepen.

¹⁵Tchatchepah, me penau tumenge: Koon gar ap mande patsella har kal tchawe, kowa nai well gar ap o Debleskro drom.”

¹⁶Un job las len an i mussi, tchiwas i wasta ap lende, un rakras o Debleskri bacht[37] pral lende win.

¹⁷Har djas o Jesus dureder ap o drom, nashas jek pash leste, peras glan leste tele ap i phub, un putchas lestar: “Latcho sikepaskro, hoi hunte krap, te dell man o Dewel o djipen, hoi gar pre-herella?”

¹⁸Penas o Jesus ap leste: “Hoske peneh tu Latcho sikepaskro ap mande? Kek mensho hi latcho. O Dewel kokres hi latcho.

¹⁹Tu djineh, kai o Dewel penas: De kekes mulo! Romeha, ma choche tiri romjat i wawar djuwjah! Romnija, ma choche tiro romes i wawar mursheha! Ma tchore! Ma pen chochepen pral i wawarende! Ma rande tchi i wawarestar! Dik ap tiro dadeste un ap tiri date, te djal lenge mishto!”

²⁰Penas ko mursh ap o Jesuseste: “Me krom kowa lauter fun tiknes pre.”

²¹Un o Jesus dikas kamles ap leste un penas: “Jek hunte kress tu budeder. Bike lauter, hoi tut hi, un de kol lowe i tchorwelende! Palle hi tut i brawlepen an o bolepen. Un dja mantsa!”

²²Kol murshes his bud brawlepen. Har job kowa shunas, dukras les kowa. Un job djas bibachteles peske.

²³Un o Jesus dikas trul peste un penas ap peskre malende: “Har pharo hi i brawelenge, te wenn le ap o Debleskro drom!”

²⁴Pral kal laba atchas o Jesuseskre malenge o rakepen krik. Koi penas o Jesus pale ap lende: “Mire tchawe, har pharo hi i menshenge, te wenn le ap o Debleskro drom!

²⁵Hi gar jaake pharo, te djal i baro viecho an i subjakro kand[38] dren, har te well i brawelo ap o Debleskro drom.”

²⁶Jon kran gomme bareder jaka un penan mank pende: “Te hi kowa jaake, koon nai lell o Debleskro djipen?”

²⁷Koi dikas o Jesus ap lende un penas: “Kowa, hoi nashte krenn i menshe gar, kowa nai krell o Dewel. O Dewel nai krell halauter.”

²⁸Koi penas o Petro ap o Jesuseste: “Djineh, mer mukam lauter, un djam tuha.”

²⁹Un o Jesus penas: “Tchatchepah, me penau tumenge: Hakeno, kai mukell mange un mire labenge peskro kheer, peskre phralen, peskre phenjen, peskri dat, peskro dades, peskre tchawen, peskro kotar phub,

³⁰kowa lell sheel kope jaake bud pale. Kanna, an kau tsiro lell lo khera un phralen un phenjen un daja un tchawen, un i kotar phub. Ninna well lo palla lino. An ko tsiro, hoi wella, lell lo o djipen, hoi gar pre-herella.[39]

³¹Un bud, kai kanna glan tardo hi, kolla hi ap ko diwes palla tardo. Un bud, kai kanna palla tardo hi, kolla hi ap ko diwes glan tardo.”

³²Jon his ap o drom an o foro Jerusalem. Un o Jesus djas glan peskre malende. Kolla his dareno. Un kol wawar, kai djan lenge palla, trashan. Un job las pale kol deesh-te-dujen pash peste, un penas lenge, hoi leha djala:

³³“Shunenn, mer djah kanna an o foro Jerusalem. Kote denn le o Menshengro Tchawes an i wasta kol bare rashajendar un tchatchepangre murshendar. Kolla krenn win, te well lo maredo. Un jon denn les an i wasta kolendar, kai kek bibolde hi.

³⁴Kolla praassenn les, tchungrenn ap leste, denn les i tchupnijah[40], un marenn les. Pal triin diwessa stell lo pale i mulendar pre.”

³⁵Koi djan o Jakobo un o Johanni, — lengro dad hi o Zebedeo, — pash o Jesuseste un penan ap leste: “Rai, mer kamah, te kress menge kowa, hoi mer tutar mangah.”

³⁶Penas lo ap lende: “Hoi kamenn tumer, te krap tumenge?”

³⁷Koi penan le ap leste: “Ap ko diwes, kai tu hal o rai pral i tsele menshende, muk men te beshas ap tiri rig: jek ap tiri tchatchi rig un ko wawar ap tiri serwi rig.”

³⁸Koi penas o Jesus ap lende: “Tumer djinenn gar, hoi tumer mangenna mandar. Nai lenn tumer kol duka ap tumende, hoi me hunte lap ap mande? Nai djan tumer jaake an o merepen, har me djau?”

³⁹Penan le: “Awa, kowa nai krah mer.” Penas o Jesus ap lende: “Tumer hunte lenna bud duka ap tumende, jaake har me hunte lap len ap mande. Un tumer hunte djan an o merepen, jaake har me hunte djap.

⁴⁰Ninna te hi jaake, nai penap tumenge gar, koon beshell ap miri tchatchi rig un ap miri serwi rig. Kowa hi gar an miro wast. O Dewel rodas kolen win, kai ap miri rig beshenna.”

⁴¹Un har kol deesh kowa shunan, wan le chojemen ap kol dujende, ap o Jakobeste un o Johanneste.

⁴²Koi das len o Jesus pash peste gole, un penas ap lende: “Tumer djinenna, i bare rajen hi penepaske pral i menshende an lengre themma. Un i pralstune rikrenn pengre menshen sorjah tele.

⁴³Mank tumende hunte well kowa gar jaake! Koon tumendar kamell, te well lo baro, kowa hunte well tumaro budepaskro.

⁴⁴Un koon tumendar kamell o pralstuno te well, kowa hunte well hakeneskro budepaskro.

⁴⁵Ninna o Menshengro Tchawo was gar ap i phub, te budrenn i menshe leske. Na-a, job was ap i phub, te well lo lenge koi, un te merell lo lenge. Un jaake plaissrell lo peskro djipah, te lell lo bud menshen dran o tchilatchepen un o merepen win.”

⁴⁶Un jon wan an o foro Jericho. Un har job peskre malentsa un bud wawar menshentsa dran o foro Jericho win djas, his i mangepaskro pash o drom beshdo. Kowa his korelo. Leskro lab his Bartimeo. Leskro dad his o Timeo.

⁴⁷Un har job shunas, kai kowa o Jesus dran o foro Nazaret hi, kai well kate, das lo gole: “Jesus, tu Davideskro tchawo, kre tiro dji mange pre!”

⁴⁸Un bud tchingran ap leste, un penan: “Atch! Muk!” Koi das job budeder gole: “Tu Davideskro tchawo, kre tiro dji mange pre!”

⁴⁹Un o Jesus atchas tardo un penas: “Denn les gole, te well lo kai!” Un jon dan les gole un penan ap leste: “Ma traash! Ste pre! Job dell tut gole!”

⁵⁰Un job witsras peskri plaashka pestar, stas sik pre, un was pash o Jesuseste.

⁵¹Un o Jesus penas ap leste: “Hoi kameh, te krap tuke?” Ko korelo penas ap leste: “Mo rai, te dikap nai pale.”

⁵²Penas o Jesus ap leste: “Dja koi! Tiro patsepen kras tut sasto.” Un ap jek kopo dikas job nai pale, un djas leha ap o drom.