Read O Debleskro Drom - I Bibla an o Romano Rakepen 2021 Marko 12 Bible Online

Marko 12 - O Debleskro Drom - I Bibla an o Romano Rakepen 2021 bible

Marko 12

¹Un o Jesus penas lenge laba, kai i khatedo tchatchepen dren hi. Un job penas: His i mursh, koles his i kotar them. Kote tchiwas lo drakengre ruka an i phub. Trul ko kotar them tchiwas lo barra. Un kote kras lo ninna i platsa an i phub, kai nai stakrenn le ap i drake, te well i mool win[42]. Mashkral kol ruka kras lo i kheer, kai kowa beshdo hi, kai dell garda ap i drake. Palle patsas lo ko kotar phub ap i hachende, te budrenn le kote leske. Un job djas peske an i wawar them.

²Har ko tsiro was, te anenn le i drake dren, bitchras lo peskro budepaskres pash i hachende, te lell lo lendar kol drake, hoi leske hi.

³Un i hache dan les kek drake. Jon tapran les, dan les dawa un bitchran les krik.

⁴Un ko mursh bitchras pale i wawar budepaskres pash lende. Un koles dan jon ap o shero, un praassan les.

⁵Un job bitchras i wawares, koles maran jon. Un bud wawaren bitchras lo pash lende. Bud lendar dan jon, kol wawaren maran le.

⁶Les his jek wawar, leskro tchawo, koles kamell job o djijestar. Koi penas ko mursh peske: Miro tchawestar darenn le. Un jaake bitchras lo pal kol tsele wawarende peskro tchawes pash lende.

⁷Kol hache rakran mashkral pende: Kowa hi leskro tchawo, kai lauter lella pal peskro dadeskro merepen. Awenn, maras les, te well kau kotar them menge, hoi leske hunte wals!

⁸Un jon tapran les, maran les, un witsran les win glan ko drakengro them.

⁹Hoi krell kanna ko rai pral ko drakengro them? Job wella, un marell kol hachen, un dell ko drakengro them i wawaren.

¹⁰Djinenn tumer gar, hoi an o Debleskro lab tchinlo hi? Kote hi tardo: His i bar, kai i budepangre lestar penan: Kowa hi tchi moldo. Ko bar las o Dewel un tchiwas les jaake an o kheer, te rikrell lo ko tselo kheer khetne.

¹¹O Dewel kras kowa, un kowa hi i baro koowa menge.[43]

¹²Un jon haiwan, te rakras o Jesus lendar, un kaman les te taprell. Un har trashan le i menshendar, tapran le les gar, un djan krik.

¹³I Farisarja kran pen khetne kolentsa, kai shunenn ap o Herodes, un bitchran murshen pash o Jesuseste, te taprenn le les an peskro rakepen.

¹⁴Un jon wan pash leste, un penan: “Sikepaskro, mer djinah, tu peneh o tchatchepen, un rakreh kekeske pal o mui, ninna te hi les bud penepaske. Awa, tu sikreh mishto i menshende o Debleskro drom. Pen menge, hi mishto pal maro tchatchepen, te das mer o themeskre lowe o baro rajeste an o foro Rom? Plaissras len? Plaissras len gar?”

¹⁵Job haiwas, te rakran le dui tchipjentsa, un penas ap lende: “Hoske kamenn tumer man mire labentsa te taprell? Anenn mange i rupeni bema, te dikap lat!”

¹⁶Un jon anan jek. Koi penas job: “Koneskro shero un lab hi ap kai bema?” Penan le: “O shero un o lab o baro rajestar an o foro Rom.”

¹⁷Un o Jesus penas ap lende: “Jaake denn leste, hoi leskro hi, un denn o Debleste, hoi leskro hi!” Un jon kran bare jaka pral leste.

¹⁸Palle wan i Sadduzarja pash leste. Jon hi kolla, kai penenna: I mule wenna buder gar djido. Kolla putchan lestar:

¹⁹“Sikepaskro, o Mose tchinas an peskre lila: Te merell i rom, kai romedino hi, un les hi kek tchawe, palle hunte romedinerell lat leskro phraal, te well leskro phraleske tchawen boldo.[44]

²⁰Koi his efta phrala. Un o phureder las i romjat, un meras. Les his kek tchawe.

²¹Un ko duito las lat un meras ninna. Un les his witar kek tchawe. Un ko triinto phraleske djas kowa ninna jaake.

²²Un hake efta murshen his kek tchawe. Palle meras ninna koi romni.

²³Kanna putchah tutar: Ap ko tsiro, kai krell o Dewel i mulen djido, koneskri romni hi li? Hake efta his lah romedino.”

²⁴Koi penas o Jesus ap lende: “Tumer prindjrenn gar o Debleskro lab, un o Debleskri soor witar gar. Doleske haiwan tumer tchi.

²⁵Kol mulen, kai o Dewel djido krella, romedinerenn buder gar un wenna gar romedino. Jon hi har i bolepangre an o bolepen.

²⁶Djinenn tumer gar, har an o Moseskro liil tardo hi, te wenn i mule pale djido. O Dewel penas ap o Moseste, har his job tardo pash o bur, hoi chatchas: Me hom o Abrahameskro Dewel un o Isaakeskro Dewel un o Jakobeskro Dewel.[45]

²⁷Un me penau tumenge: Job hi gar o Dewel kolenge, kai mulo hi. Na-a, job hi o Dewel kol djidenge. Tumer haiwan tchi!”

²⁸Jek biboldengro tchatchepaskro his koi pashel un shunas, har kol Sadduzarja leha rakran. Har job dikas, kai das o Jesus lenge i mishto lab pale, was lo pash leste un putchas lestar: “Kol tsele laba, kai penenna, hoi o Dewel mendar kamella, hawo lab hi o bareder lendar?”

²⁹Penas o Jesus leske: “O bareder lab hi kowa: Shun tu, Israel! Maro Dewel hi o rai, hi kek wawar.

³⁰Tu kamess tiro Debles o tselo djijestar an tiro tselo djipen, an lauter, hoi tu kreh un djineh.[46]

³¹O duito Debleskro lab hi kowa: Te wess jaake latches ap koleste, kai pash tute hi, har hal latches ap tute kokres.[47] Kek wawar lab, hoi penell, hoi o Dewel mendar kamella, hi bareder har kolla dui.”

³²Un ko biboldengro tchatchepaskro penas ap leste: “Sikepaskro, tu rakral tchatchepah mishto. Hi jek Dewel kokres un kek wawar.

³³Te kamah mer les o tselo djijeha, an lauter hoi krah un djinah, un te ham jaake latcho ap koleste, kai pash mende hi, har ham latcho ap mende kokres, palle hi kowa feteder, har i tsele bakre un grumja, hoi mer marah un chatchrah o Debleske.”

³⁴Har o Jesus dikas, kai job mishto rakras, penas lo ap leste: “Tu hal gar dur o Debleskro dromestar.” Un jon trashan, te putchenn le lestar budeder.

³⁵Un har o Jesus an o Debleskro baro kheer i menshenge o Debleskro lab penas, putchas lo i menshendar: Hoske penenn kol biboldengre tchatchepangre, kai ko baro rai, koles o Dewel bitchrell, o Davideskro tchawo hi?

³⁶O David penas lestar, har o Debleskro Ducho ap leste was: O Dewel penas ap miro rajeste: Besh tut ap miri tchatchi rig, bis te tchiwau kolen tel tire pire, kai hi chojedo ap tute.[48]

³⁷Koi penell o David mo rai ap leste. Har well lo nai leskro tchawo? Un i tsele menshe kaman, te shunenn le o Jesuseskro rakepen.

³⁸Un job rakras ap lende un penas: Denn jak ap tumende! Kowa, hoi kol biboldengre tchatchepangre krenna, hi gar mishto. Len hi lengste koola ap lende, te sikrenn le, te hi le o Debleskre menshe. Te djan le an o foro, kamenn le, te penenn i menshe “Latcho diwes, mo rai” ap lende.

³⁹An i biboldengre kangria kamenn le ap i pralstune beshepangre te beshenn. Un pash i baro chapen kamenn le ap i feteder beshepangre te beshenn.

⁴⁰Jon lenn i khera kol djuwjendar krik, kolengre romma meran. Jon rakrenn o Debleha i rah tsiro, te dikenn i menshe, har patslo jon hi. Ap ko diwes, kai rakrell o Dewel o tchatchepen pral lende win, lenn le i sorleder phagi har kol wawar.

⁴¹An o Debleskro baro kheer his i lowengri piri tardo, kai i menshe lowe o Debleske dren tchiwan. Un o Jesus beshas pes pashel un dikas, har kol menshe lowe dren tchiwan. Un bud brawele tchiwan bud dren.

⁴²Koi was i tchorweli djuwel, kolakro rom meras. Joi tchiwas dui tikne kotja dren. Kowa his jaake bud har jek bema.

⁴³Koi das job peskre malen pash peste gole, un penas ap lende: “Tchatchepah, me penau tumenge: Koi romni das budeder o Debleske, har kol tsele wawar, kai tchiwan lowe dren.

⁴⁴Kol tsele wawar dan lowe dran pengro brawlepen. Kai tchorweli romni das halauter, hoi lat his, halauter, hoi lat his djipaske.”