Read O Debleskro Drom - I Bibla an o Romano Rakepen 2021 Marko 13 Bible Online

Marko 13 - O Debleskro Drom - I Bibla an o Romano Rakepen 2021 bible

Marko 13

¹Har o Jesus dran o Debleskro baro kheer win djas, penas jek peskre malendar ap leste: “Sikepaskro, dik, sawe bare barra un sawe shukar khera!”

²Penas o Jesus ap leste: “Kal bare khera, hoi tu dikeh, djan paash. Kek bar atchell ap o wawareste!”

³Un job djas ap o djeteskri berga, hoi hi wergel o Debleskro baro kherestar, un beshas pes kote. Un har jon kokres his, putchan lestar o Petro, un o Jakobo, un o Johanni, un o Andreas:

⁴“Pen menge, kaana well kowa? Har nai dikas mer, kai kowa lauter glan o wudar tardo hi, hoi wella?”

⁵Un o Jesus penas ap lende: Denn jak! Ma mukenn tumen kekestar o Debleskro dromestar tele te anell!

⁶Koi wenna bud mursha, kai penenna: Me hom o Kristo, ko baro rai, kolestar o Dewel penas, te well job. Un bud menshe patsenn ap lengro chochepen.

⁷An ko tsiro hi kurepen an kol themma, kai hi dur tumendar un ninna an kol themma, kai hi gar dur tumendar. Tumer te shunenn kowa, ma trashenn! Kowa hunte well jaake. Ko tsiro, kai i phub paash djala, well gar jaake sik.

⁸I pralstune pral bare themma kurenn pen i wawar pralstunentsa. Un i menshe dran jek them marenn i menshen an i wawar them. Un kate un kote well i phub trisslemen[49]. Bud menshen hi gar doha te chal. Kowa lauter wella jaake pral i phub, har i duka wenna pral i djuwjate, kai lell i ternepen.

⁹Denn jak ap tumende! Tumer wenn glan i tchatchepangre anlo, un chan dawa an i biboldengre kangria. Tumer patsenn ap mande. Doleske anenn le tumen glan i pralstune un glan i bare rajende, te rakrenn jon i phagi win pral tumende. Te han glan lende tardo, palle nai rakrenn tumer mandar, te shunenn jon pral mande o tchatchepen.

¹⁰Glan ko tsiro, kai i phub paash djala, hunte well o latcho lab mandar penlo an i tsele themma.

¹¹Te taprenn le tumen, te anenn le tumen glan i tchatchepangre, ma darenn, hoi hunte penenna! Ap ko diwes, kai han glan lende tardo, sikrell o Dewel tumen, hoi te penenn lenge. Kowa rakrenna! Ma bistrenn, tumer han gar kolla, kai rakrenna. Kowa hi o Debleskro Ducho, kai dran tumende rakrella.

¹²An kol diwessa phukrell o phraal ap peskro phraleste, te well job maredo. Un ninna o dad krell kowa peskro tchaweha. Un i tchawe hadenn pen pral pengre dadende un pral pengre dajende, un denn len an i wasta kolendar, kai marenn len.

¹³Tumer patsenn ap mande. Doleske wenn i tsele menshe chojedo ap tumende. Kowa, kai atchell soreles tardo an o patsepen, jaake rah, har job djiwella, kowa lell o Debleskro djipen.

¹⁴An o Debleskro lab hi tchinlo pral koi djungeli tchilatchi figura[50]. Koon kawa drawerella[51], kamaus, te haiwell lo les ninna. Ap ko diwes, kai dikenn tumer koi djungeli tchilatchi figura kote tardo, kai hunte well li gar tardo, palle hunte nashenn kolla, kai hi an o them Judea, sik ap i berge!

¹⁵Kowa, kai hi pral ap o kheer, hunte djal buder gar an peskro kheer dren, te lell lo peske tchomone.

¹⁶Un kowa, kai budrell ap i kotar phub, kowa hunte djal buder gar khere, te lell lo peskri baja.

¹⁷Koi bibacht hi bari kol djuwjenge, kai hi an wawar koowa, ninna kol djuwjenge, kai hi len i ternepen.

¹⁸Mangenn o Deblestar, te well kowa lauter gar an o wend.

¹⁹Kowa, hoi an kol diwessa pral i menshende wella, hi djungleder har ko tselo tchilatcho koowa, hoi ap i menshende was jaake rah, har o Dewel i phub kras. Un ko tsiro, hoi well pal kowa, well witar gar jaake tchilatcho.

²⁰Te krals o Dewel ko tchilatcho tsiro gar tikneder, wals kek mensho dran o tchilatcho tsiro win. Kolen, kai o Dewel peske win rodas, kolenge kras lo o tchilatcho tsiro tikneder.

²¹Te penell jek ap tumende: Dikenn, kate hi o Kristo[52]! — palle patsenn les gar! Un te penell i wawar: Ake, kote hi lo! — palle patsenn les witar gar!

²²Chochene mursha wenna un penenna ap tumende: Me hom o Kristo. Un i chochene rakepangre penenna: Me wom o Deblestar bitchedo. Un jon krenna baro un sorelo koowa, hoi i mensho nashte krell gar dran peskri soor. Te djals kowa, anans le kolen o Debleskro dromestar tele, kolen o Dewel peske win rodas.

²³Denn jak ap tumende! Me penom tumenge kowa lauter, te djinenn les ap ko tsiro, kai kowa wella.

²⁴An kol diwessa pal ko tchilatcho tsiro, well o kham kalo har i rat, un o moonto dikell kek buder.

²⁵Un i bare momlia ap o bolepen perenn tele. Un o bolepaskri soor perell khetne.

²⁶Palle dikenn le o Menshengro Tchawes, har well lo an i wolke bari sorjah un railepen.

²⁷Palle bitchrell lo i bolepangren pral i tseli phub, te anenn le dran hako them kolen khetne, kai len o Dewel peske win rodas.

²⁸Me kamau te sikrap tumende tchomone. Dikenn ap o faigetikro ruk! Te wenn leskre kashta senelo, un i patria wenn dran lende win, palle djinenn tumer, te well sik o nijal.

²⁹Jaake hi kowa ninna koleha, pral kowa rakrom. Te dikenn tumer, har kowa lauter wella, palle djinenn tumer, kai job glan o wudar tardo hi.

³⁰Tchatchepah, me penau tumenge: Kol menshe, kai an ko tsiro djiwenna, dikenna kowa lauter pengre jakentsa.

³¹O bolepen un i phub atchenna gar. Mire laba atchenna hako tsiro.

³²Kek djinell ko diwes un ko tsiro, kai kowa lauter wella. I bolepangre an o bolepen djinenn les gar, witar gar o Debleskro tchawo. Miro dad an o bolepen kokres djinell les.

³³Denn jak! Rikrenn tumare jaka pre! Tumer djinenn gar, kaana hi ko tsiro kai.

³⁴Kowa hi jaake har pash i mursheste, kai djas ap o them. Job mukas peskro kheer un das peskre budepangren lauter an o wast, hakeneste das lo leskri budi. Un penas ap koleste, kai pash o wudar beshdo hi: De garda ap miro kheer! Ma sob!

³⁵Jaake penau tumenge: Rikrenn tumare jaka pre! Tumer djinenn gar o tsiro, kai o rai pral o kheer pale wella. Job nai well ap i rati, nai well mashkral an i rati, nai well ap ko tsiro, kai dell o bashno gole, nai well taissarlake.

³⁶Jaake denn garda, te hatsell lo tumen gar ap o sopen, te well lo ap jek kopo.

³⁷Kowa, hoi me tumenge penaua, ko penau lauterenge: Denn jak un sowenn gar!