Read O Debleskro Drom - I Bibla an o Romano Rakepen 2021 Marko 14 Bible Online

Marko 14 - O Debleskro Drom - I Bibla an o Romano Rakepen 2021 bible

Marko 14

¹His dui diwessa glan kol bare diwessa, kai kharenna Passa un glan kol diwessa, kai chan i bibolde kek shutlo maro.[53] Un kol bare rashaja un kol biboldengre tchatchepangre rodan i latcho tsiro, te taprenn le o Jesuses tchorchanes, te marenn le les.

²Jon penan mashkral pende: “Mer taprah les gar ap o Passa, te wenn i menshe gar diwjo un chojedo ap mende.”

³Un o Jesus his an o gab Betani, an o Simoneskro kheer. Kowa hi ko Simon, kai his les i djungelo nasslepen ap peskro mass.[54] Har o Jesus kote chas, was i djuwel pash leste. Kolat his i tushni an o wast. Koi his djudjo un kutch djet dren, kerdo dran ko kasht, hoi kharella Narde. Un joi phagas koi tushni pre, un tchoras ko djet ap leskro shero, te makell li les dren.

⁴Mank kolende, kai koi pashel his, his sawe, kai choiran pen un penan mashkral pende: “Hoske tchoras li ko djet tchitcheske win?

⁵Te bikrams ko djet, lams budeder har triin-sheel rupene beme. Un kol lowe nai dams mer i tchorwelende.” Un jon tchingran ap late.

⁶Penas o Jesus ap lende: “Mukenn lat! Hoske tchingrenn tumer ap late? Hoi joi mange kras, his mishto.

⁷I tchorwele hi hako tsiro pash tumende. Un te kamenn tumer, nai krenn tumer lenge latcho koowa. Me hom gar hako tsiro pash tumende.

⁸Koja kras, hoi nai kras li, un makas man kanna dren ko diweske, kai wau paskedo.

⁹Tchatchepah, me penau tumenge: Ap i tseli phub, kai penenn le o latcho lab mandar i menshenge, koi well ninna penlo, hoi koi djuwel mange kras. Joi wella gar bistedo.”

¹⁰O Judas Iskariot, jek kol deesh-te-dujendar, djas pash kol bare rashajende, te phukrell lo ap o Jesuseste.

¹¹Har jon kowa shunan, his le bachtelo, un penan: “Mer dah tut lowe!” Un job rodas i latcho tsiro, te dell lo les an lengre wasta.

¹²His jek diwes glan kol diwessa, kai chan i bibolde o maro, kai kek shutlo jarro dren hi. Ap ko diwes marenn le i bakren, te chan le len ap ko baro diwes Passa. Koi penan o Jesuseskre mala ap leste: “Kai djas mer, te kras o chapen tuke?”

¹³Un job bitchras dui peskre malendar un penas ap lende: “Djan an o foro. Koi dikenn tumer i murshes, ko hidjrell i khoro pani. Djan leske palla!

¹⁴An ko kheer, kai job dren djal, penenn o rajeske an ko kheer: Maro sikepaskro putchell tutar: Kai hi koi isema, kai nai chau me o bakro mire malentsa?

¹⁵Un job sikrell tumende i bari isema pral an ko kheer. Kote hi beshepangre un lauter hoi men hunte well. Kote krenn menge o chapen!”

¹⁶Un kol mala djan koi, un wan an ko foro un hatsan kowa jaake, har job lenge penas. Un jon kran o chapen.

¹⁷Un ap i rati was job kol deesh-te-dujentsa.

¹⁸Un har jon pash i chapaskri beshdo his un chan, penas o Jesus: “Tchatchepah, me penau tumenge: Jek tumendar, kai chal mantsa, kowa phukrella ap mande.”

¹⁹Ko dukas len. Un jon putchan lestar, jek pal o wawar: “Hom me kowa?”

²⁰Koi penas job ap lende: “Kowa hi jek kol deesh-te-dujendar, kai tchiwell peskro kotar maro mantsa an jek tcharo.

²¹O Menshengro Tchawo hunte merella jaake, har hi lestar tchinlo an o Debleskro lab. Hawi bibacht well ap koleste, kai ap leste phukrella! Koleske wals feteder, te wals lo gar boldo.”

²²Har jon chan, las o Jesus o maro, parkras pes pash o Debleste, phagas ko maro, das les peskre malende, un penas: “Lenn ko maro un chan les! Kau maro hi miro mass!”

²³Palle las lo o khoro, parkras pes pash o Debleste, das len o khoro, un jon pijan halauter lestar.

²⁴Un job penas ap lende: “Kai mool hi miro rat, hoi me ratau budenge. Jaake krau i drom, kai o Dewel un i menshe mala wenna.

²⁵Tchatchepah, me penau tumenge: Me pijau buder gar i mool, bis te well ko diwes, kai hi o Dewel o rai pral halauter. Palle pijau newi mool pash leste an o bolepen.”

²⁶Palle giwan le o Debleske i gili, un djan win pash o djeteskri berga.

²⁷Un o Jesus penas ap lende: “Tumer halauter mukenn man. Hi tchinlo an o Debleskro lab: O Dewel penas: Me dau o bakrengro rajes. Un i bakre nashenn penge.[55]

²⁸Pal kowa krell o Dewel man i mulendar djido. Un te djan tumer an o them Galilea, palle djau glan tumende.”

²⁹O Petro penas ap leste: “Ninna te nashenn halauter tutar krik, me mukau tut gar.”

³⁰Penell o Jesus ap leste: “Tchatchepah, me penau tuke: Kai rati dell o bashno gar o duito kopo gole jaake rah, har tu gar triin kope penal, te prindjreh man gar.”

³¹Penell o Petro soreles: “Ninna te hunte meroms tuha, doms tut gar buchoste.” Ninna kol tsele wawar penan kowa.

³²Un jon wan an i baar[56], koi kharas Getsemani. Un o Jesus penas ap peskre malende: “Beshenn tumen kate jaake rah, har rakrau o Debleha.”

³³Un job las o Petres peha, ninna o Jakobes un o Johannes. Un i bari daar was ap leste, un job trissas[57].

³⁴Un job penas ap lende: “Miro dji rowella un dukell, har te merap. Atchenn kate un sowenn gar!”

³⁵Un job djas i kotar drom dureder, witsras pes ap i phub un mangas o Debles, te well ko pharo tsiro gar ap leste.

³⁶Un o Jesus mangas o Debles: “Tata, halauter nai kreh tu. Muk, te wenn kol duka gar ap mande! Ninna te mangau tut kowa, ma kre, hoi me kamau! Kre jaake, har tu kameh!”

³⁷Un job djas pale pash peskre malende un dikas, har sowan le, un penas ap o Petreste: “Simon, soweh tu? Nai rikreh tu gar tire jaka i tikno tsiro pre?

³⁸Ma sowenn dren! Mangenn o Deblestar, te perenn gar miro dromestar tele! Tumen kokres hi kek soor, te atchenn pash mande, ninna te kamell kowa tumaro dji.”

³⁹Un job djas pale koi, mangas o Debles un penas kol emlige laba.

⁴⁰Palle djas lo pale pash lende un dikas, te sowenn le. Jon rikran nai lengre jaka gar pre. Un jon djinan gar, hoi te penenn le ap leste.

⁴¹Un job was o triinto kopo un penas ap lende: “Kamenn tumer dureder sowell un kate tchiddo atchell? Kanna hi doha! O tsiro hi kai, kai denn le o Menshengro Tchawes an i wasta i tchilatche menshendar.

⁴²Stenn pre! Djas menge! Dikenn, ko phukepaskro wella.”

⁴³Un har job jaake rakras, was o Judas, ko jek kol deesh-te-dujendar. Pash leste his bud wawar mursha. Len his chare un kashta an i wasta. Kolen bitchran i bare rashaja, un i biboldengre tchatchepangre un phureder.

⁴⁴O Judas, ko phukepaskro, kras lentsa win: “Koles, kai tchumrau, kowa hi lo. Koles taprenn, anenn les krik un denn garda ap leste!”

⁴⁵Un o Judas was pash leste, un penas: “Mo rai!” un tchumras les.

⁴⁶Un kolla tapran les, un rikran les.

⁴⁷Un jek kolendar, kai koi pashel tardo hi, las peskro charo, un das jek klisteske o kand tele. Kowa his i klisto, kai budrell o baro rashajeske.

⁴⁸Un o Jesus penas ap lende: “Tumer wan i charentsa un i kashtentsa pash mande, har te woms i marepaskro.

⁴⁹Hako diwes homs pash tumende an o Debleskro baro kheer un sikrom i menshende o Debleskro drom. Un tumer tapran man gar. Kau koowa well jaake, te well tchatcho, hoi o Debleskre rakepangre glan i rah tsiro an pengre lila tchinan.”

⁵⁰Har peskre mala kowa shunan, mukan le les lauter un nashan penge.

⁵¹I terno mursh djas o Jesuseske palla. Koles his kokres i laintikro kotar trul peste. Un jon tapran pal leste.

⁵²Koi mukas lo ko laintikro kotar an lengre wasta, un nashas nanges lendar.

⁵³Un jon anan o Jesuses pash o baro rashajeste. Un i tsele bare rashaja un i biboldengre phureder un tchatchepangre wan khetne.

⁵⁴Dur pal leste djas o Petro leske palla, un was glan o shukar kheer o baro rashajestar. Un job djas an o baro wudar dren un beshas pes pash i lurdende pash i jag un tatsras pes.

⁵⁵Un i bare rashaja un i tsele pralstune bibolde rodan tchomone, hoi anenn le nai ap o Jesuseste, te nai marenn le les. Un jon hatsan tchi.

⁵⁶Bud anan ap leste chochepen pre. Un har jek rakras jaake un o wawar jaake, rakran le gar dran jek mui.

⁵⁷Palle stan mursha pre un anan chochepen ap leste pre un penan:

⁵⁸“Mer shunam, har job penas: Me phagau kau Debleskro baro kheer tele, hoi i menshe pengre wastentsa kran. Un an triin diwessa krau i wawar Debleskro baro kheer, hoi kek menshe pengre wastentsa kran.”

⁵⁹Ninna kowa, hoi kolla penan, rakran le gar dran jek mui.

⁶⁰Un o baro rashai stas pre, djas mashkral lende, un putchas o Jesusestar: “Peneh tu tchi ap kowa, hoi jon ap tute pre anan?”

⁶¹Un o Jesus penas tchi. Pale putchas o baro rashai lestar: “Hal tu ko baro rai, kolestar o Dewel penas, te well job? Hal tu o tchawo o baro Deblestar?”

⁶²“Me hom kowa,” penas o Jesus, “un ko diwes wella, kai dikenn tumer o Menshengro Tchawes, har hi lo beshdo ap i tchatchi rig o sorelo Deblestar, un har well lo an i wolke dran o bolepen.”

⁶³Koi kras o baro rashai peskre koola paash, te sikrell lo peskri choli, un penas ap i wawar pralstunende: “Kek hunte penell menge budeder.

⁶⁴Tumer shunan: Job krell pes har o Dewel. Hoi kamenn tumer leha te krell?” Un jon penan halauter: “Job hunte well maredo!”

⁶⁵Koi wan mursha un tchungran leske an o mui, pandan leske tchomone trul leskre jaka, dan les un penan ap leste: “Pen menge, koon das tut?” Un i lurde dan les an o mui.

⁶⁶O Petro his glan o kheer beshdo. Koi was i budepaskretsa o baro rashajestar.

⁶⁷Un har dikas li o Petres, har tatsras pes lo pash i jag, dikas li ap leste, un penas: “Tu hals ninna o Jesuseha dran Nazaret khetne!”

⁶⁸Un o Petro penas: “Na-a, kowa hi gar tchatcho! Me djinau gar un haiwau gar, hoi tu peneh!” Un job djas win pash o baro wudar glan ko kheer. Un o bashno das gole.

⁶⁹Un koi budepaskretsa dikas les, un penas pale ap kolende, kai koi pashel tardo his: “Kawa hi jek kolendar!”

⁷⁰Un job penas pale: “Na-a, me hom kek lendar!” Pal i tikno tsiro penan kolla, kai kote tardo hi, pale ap o Petreste: “Tchatchepah, tu hal ninna jek kolendar. Tu hal dran o them Galilea.”

⁷¹Koi tchingras lo, das pes sowel, un penas ap lende: “Me prindjrau ko murshes gar, kolestar rakrenna!”

⁷²Un sik koi pre das o bashno o duito kopo gole. Un o Petreske wan o Jesuseskre laba an o shero, hoi job leske penas: “O bashno dell gar o duito kopo gole jaake rah, har tu gar triin kope penal, te prindjreh man gar.” Kowa djas an leskro dji, un job rowas.