Read O Debleskro Drom - I Bibla an o Romano Rakepen 2021 Marko 15 Bible Online

Marko 15 - O Debleskro Drom - I Bibla an o Romano Rakepen 2021 bible

Marko 15

¹Sik taissarlake wan i bare rashaja un i biboldengre phureder un tchatchepangre khetne i tsele pralstune biboldentsa. Un jon rakran khetne, hoi te krenn le o Jesuseha. Un jon pandan les, anan les pash o Pilateste un dan les an leskre wasta.

²Un o Pilato putchas lestar: “Hal tu o baro rai pral i biboldende?” Penas job ap leste: “Awa, hi jaake, har tu penal.”

³Un kol bare rashaja anan bud doosh ap leste pre.

⁴Un o Pilato putchas lestar pale: “Hoske peneh tu tchi? Shun, har bud doosh anenn le ap tute pre!”

⁵O Jesus penas buder tchi, jaake te kras o Pilato bare jaka.

⁶Ap ko tsiro his jaake, te mukas o Pilato hako bersh ap kol diwessa, kai kharenna Passa, jekes dran o stilepen win. Koles nai rodan i bibolde win.

⁷Koi his jek, ko kharas Barabas. Kowa his stildo kolentsa, kai kran i baro tchingepen, kai wan i menshe diwjo. Koi pashel maran le jekes.

⁸Un i bibolde djan pash o Pilateste, un mangan lestar, te krell lo jaake, har job ap hako Passa krella.

⁹Un o Pilato putchas lendar: “Kamenn tumer, te mukap o rajes pral i biboldende win?”

¹⁰O Pilato djinas, te silwerenn i bare rashaja ap o Jesuseste. Un doleske dan le les an leskre wasta.

¹¹Koi kran kol bare rashaja i menshen diwjo, te penenn le o Pilateske: “Mer kamah feteder, te mukess o Barabes win!”

¹²O Pilato putchas pale lendar: “Hoi kamenn tumer, te krap me koleha, koles tumer kharenna Baro rai pral i biboldende?”

¹³Un jon dan pale gole: “De les ap o trushel!”

¹⁴Koi putchas o Pilato lendar: “Hawo tchilatcho koowa kras job?” Koi dan le sorleder gole: “De les ap o trushel!”

¹⁵O Pilato kamas kowa te krell, hoi kol bud menshe lestar kaman un mukas o Barabes dran o stilepen win. Un o Jesuses mukas lo i tchupnijah dawa te dell, un das les an i lurdengre wasta, te denn le les ap o trushel.

¹⁶Kol lurde anan les an o baro kheer o themeskro rajestar, un dan i tsele lurden khetne gole.

¹⁷Un jon tchiwan leske i loli rajeskri plaashka trujel, pandan subjengre kashta khetne, un tchiwan len ap leskro shero, jaake har i baro rai hidjrell shereskro sonakai ap leskro shero.

¹⁸Un jon penan ap leste: “Mer sharah tut, tu baro rai pral i biboldende!”

¹⁹Un jon dan les i kashteha ap o shero, tchungran ap leste, un mukan pen glan leste ap i phub te perell, un kran jaake, har te mangans le i baro rajes an.

²⁰Un har jon san pral leste, riwan le leske koi loli plaashka pale win, un riwan leske leskre koola pale an. Un jon anan les win, te denn le les ap o trushel.

²¹Ap o drom tapran le i murshes i sorjah, te hidjrell lo o Jesuseskro trushel. Leskro lab hi Simon, un job his dran ko foro Kirene. Leskre tchawe hi o Alexandro un o Rufo. O Simon budras win ap i kotar phub un his ap o drom pale.

²²Un jon anan o Jesuses ap ko kotar them, hoi kharell an o biboldengro rakepen Golgata, ko kharella Muleskro Shero.

²³Un jon dan les mool te pijell. An koi mool his i drab[58] dren, ko kharell Myrrhe. Un job pijas gar.

²⁴Un jon dan les ap o trushel. Un palle khelan le pral leskre koola, te dikenn le, hoi hakeno lella.

²⁵His taissarlake enjenge, kai dan le les ap o trushel.

²⁶Un pral leste ap i kasht his tchinlo, hoske job hunte meras. Koi pre his tchinlo: O baro rai pral i biboldende.

²⁷Khetne leha dan le dui marepangren ap o trushel. Ko jekeskro trushel his tchatches lestar, ko wawareskro trushel his serwes lestar.

²⁸

²⁹Un kolla, kai kote pashel wan, sikran i gushteha ap leste, un praassan les, un penan: “Tu kamal o Debleskro baro kheer tele te phagell, un an triin diwessa pale pre te tchiwell.

³⁰Kanna, kre tuke, hoi i wawarenge kral, un ab o trushelestar tele!”

³¹Ninna kol bare rashaja un kol biboldengre tchatchepangre san pral leste, un jon penan jek ap o wawareste: “Wawaren las job dran o merepen win. Pes kokres nai lell lo gar dran o merepen win.

³²Te hi lo ko baro rai, koles o Dewel bitchras, ko baro rai pral o Israel, palle nai djals job o trushelestar tele, te dikas mer kowa un te nai patsas ap leste.” Un kolla dui, kai wan langs leste ap pengro trushel dino, praassan les ninna.

³³His deesh-te-dujenge, koi was o diwes kalo har i rati an o tselo them. Un kowa atchas jaake bis pash trinenge.

³⁴Un har trinenge his, das o Jesus bari gole: Eloi, Eloi, lema sabachtani? Kowa kharella: Miro Dewel, miro Dewel, hoske mukal man tu?

³⁵Un kolendar, kai kote tardo his un kowa shunan, penan: “Shunenn, kawa dell ap o Elija gole.”

³⁶Un jek nashas, las tchomone har i kotar than[59], kras les pherdo shutli mool, tchiwas les ap i kasht, un das les o Jesuseste te pijell, un penas: “Muk les, dikas, te well o Elija, un lell les tele!”

³⁷Un o Jesus das bari gole, un meras.

³⁸Un ko wudar an o Debleskro baro kheer, hoi his kerdo dran kutch pesso than, kowa djas paash an dui kotja fun pral bis tele.[60]

³⁹Ko pralstuno lurdo, kai glan o Jesuseste tardo his, dikas, har o Jesus meras. Un job penas: “Tchatchepah, kau mursh his o Debleskro tchawo!”

⁴⁰His ninna djuwja i kotar krik tardo, kai dikan kowa lauter. Mashkral lende his i Maria dran o gab Magdala, i Salome un i Maria, kolakre tchawe o tikno Jakobo un o Joses hi.

⁴¹Kolla his leha, har job an o them Galilea his, un dan leske chapen un pipen. Un bud wawar djuwja his koi, kolla, kai leha khetne an o foro Jerusalem djan.

⁴²Har i rati was glan o Debleskro diwes,

⁴³was o Josef. Kowa his dran o foro Arimatia, un his jek kol pralstune biboldendar, kolen penepaske his. Un job dikas ninna ap o Debleste, te well ko tsiro, kai hakeno dikell, kai o Dewel o baro rai hi. O Josef las pes khetne, djas pash o Pilateste, un mangas lestar, te dell lo les o mulo Jesuses.

⁴⁴O Pilato kras bare jaka, har job shunas, kai o Jesus jaake sik meras. Job das ko pralstuno lurdes gole un putchas lestar, har rah job mulo hi.

⁴⁵Un har job kowa o pralstuno lurdestar shunas, penas lo o Josefeske, te nai lell lo o mulo Jesuses.

⁴⁶O Josef ginas i plachta, las o Jesuses o trushelestar tele, tchiwas les an koi plachta, un paskras les an i mulengro kheer, hoi his dren dino an i baro bar. Kote glan tchiwas lo i baro bar.

⁴⁷I Maria dran o gab Magdala un i Maria, koi dai o Josestar, dikan, kai o Jesus tchiddo was.