Read O Debleskro Drom - I Bibla an o Romano Rakepen 2021 Marko 16 Bible Online

Marko 16 - O Debleskro Drom - I Bibla an o Romano Rakepen 2021 bible

Marko 16

¹Har o Debleskro diwes trujel his, djan i Maria dran Magdala un i Maria, koi dai o Jakobestar, un i Salome un ginan djet, hoi sungella mishto, te makenn le les dren.

²Sik taissarlake pal o Debleskro diwes djan jon pash o mulengro kheer, har o kham pre djas.

³Un jon rakran mashkral pende: “Koon lell menge ko bar krik, hoi glan o mulengro kheer tardo hi?”

⁴Kowa his i baro bar. Un har jon pash ko mulengro kheer wan, dikan le, kai ko bar krik lino was.

⁵Un jon djan an o mulengro kheer dren. Kote dikan le i terno murshes ap i tchatchi rig beshdo, koles his trul peste i lengsto bijalo ripen. Un jon trashan.

⁶Job penas ap lende: “Ma trashenn! Tumer rodenn o Jesuses dran Nazaret, kai was ap o trushel dino. Job stas i mulendar pre. Job hi gar kate. Dikenn kote, kai job tchiddo his.

⁷Kanna djan pash leskre malende! Penenn lenge un o Petreske, kai djal job glan tumende an o them Galilea! Kote dikenn tumer les, har job les tumenge penas.”

⁸Un jon djan dran ko mulengro kheer win, un nashan penge. Jon trissan i trashatar un penan kekeske tchomone, jaake baro his lengri daar.

⁹Har o Jesus i mulendar pre stas, sik taissarlake pal o Debleskro diwes, his i Maria dran Magdala koi ersti, kolatar mukas lo pes te dikell. Joi hi koja, kolatar job glan i tsiro efta bengen win tradas.

¹⁰Un joi djas pash kolende, kai djan o Jesuseha, un kolengro dji kanna dukas, un kai rowan pral leste. Un joi penas lenge, te dikas li les.

¹¹Un har jon shunan, kai job djiwella, un kai dikas li les, patsan le kowa gar.

¹²Pal kowa mukas job pes dui wawar peskre malendar te dikell, kai his ap o drom glan o foro. Pash lende dikas lo wawartchandes win har jon les prindjran.

¹³Un kolla dui djan pale, un penan les kol wawar malenge. Kolen patsan le witar gar.

¹⁴Koi pre, har kol deesh-te-jek pash o chapen beshdo his, mukas lo pes lendar te dikell un tchingras ap lende, kai hi lengre djia har barra, un te patsan le gar kolenge, kai les dikan, har job i mulendar pre stas.

¹⁵Un job penas ap lende: “Djan pash i tsele menshende ap i phub un sikrenn hakeneste miro drom!”

¹⁶“Koon patsell ap mande un well taufedo, kowa djal gar nashedo. Koon gar ap mande patsella, kowa djal nashedo!

¹⁷Kolla, kai patsenn ap mande, krenn baro koowa an o Debleskri soor. An miro lab tradenn le bengen i menshendar win, un rakrenn an wawar rakepen.

¹⁸Jon te lenn sapa an pengre wasta, un te pijenn le i pipen, kai nai merenn le, palle wenn le gar nasselo. Ap i nasslende tchiwenn le i wasta pre. Un kolla wenn sasto.”

¹⁹Har o rai Jesus jaake lentsa rakras, was lo pral an o bolepen hadedo, un beshas pes ap o Debleskri tchatchi rig.

²⁰Un jon djan, te penenn le i menshenge o latcho lab o Jesus Kristestar an hake gaba un forja. Un o rai Jesus his pash lende peskri sorjah, un kras baro koowa, kai nai krell kek mensho. Un jaake dikan i menshe, kai leskro lab tchatcho hi.