Read O Debleskro Drom - I Bibla an o Romano Rakepen 2021 Marko 2 Bible Online

Marko 2 - O Debleskro Drom - I Bibla an o Romano Rakepen 2021 bible

Marko 2

¹Pal i tikno tsiro djas o Jesus pale an o foro Kapernaum. Un bud shunan, kai job an o kheer his.

²Koi wan jaake bud menshe an o kheer un glan o wudar khetne, te nai djas buder kek an o kheer dren. Un o Jesus penas lenge o Debleskro lab.

³Koi anan le jekes ap o tchiben, kai nai nashell gar. Star mursha hidjran les.

⁴Kolla anan les nashte gar pash o Jesuseste, jaake bud menshe his trul leste. Koi djan jon ap o kheer pral pre, lan barra win, un mukan ko tchiben o nassleha glan o Jesuseste tele.

⁵Har o Jesus lengro patsepen dikas, penas lo ap koleste, kai nai nashell gar: “Miro tchawo, me lau tiri doosh[11] tutar.”

⁶Koi his ninna biboldengre tchatchepangre beshdo. Kolla penan an pengre djia:

⁷“Har nai penell job kowa? Job krell pes har o Dewel! O Dewel kokres nai lell i doosh i menshendar!”

⁸O Jesus haiwas, hoi an lengro shero trujel djas un penas ap lende: “Hoske djal kowa an tumaro shero trujel?

⁹Hi kowa phareder, te penap ap leste: Me lau tiri doosh tutar, har te penap: Ste pre, le tiro tchiben un dja khere?

¹⁰Me kamau, te djinenn tumer: O Menshengro Tchawes hi i soor ap kai phub, te nai lell lo i doosh i menshendar krik.” Palle penas lo ap koleste, kai nasselo hi:

¹¹“Ste pre, le tiro tchiben un dja khere!”

¹²Un job stas pre, las peskro tchiben un djas win. Un lauter dikan les, un kran bare jaka. Jon sharan o Debles, un penan: “An maro tselo djipen dikam sawo koowa gar.”

¹³O Jesus djas pale win pash o baro pani. Un bud menshe wan pash leste. Un job sikras len o Debleskro drom.

¹⁴Un har job jaake kote djas, dikas lo i murshes, kowa kharas Levi. Leskro dad hi o Alfeo. O Levi his pash ko kheer beshdo, kai las job lowe i Remarjenge dren. Penell o Jesus ap leste: “Am, dja mantsa!” Un job stas pre, un djas leha.

¹⁵Un o Jesus djas an leskro kheer un beshas pes tele. Un bud menshe djan leha. Bud his kolendar, kai lenn i biboldendar lowe i Remarjenge dren,[12] un kolendar, kai tchilatcho koowa kran un doleske pale-tchiddo his. Un jon beshan pen tele o Jesuseha un leskre malentsa, te chan le.

¹⁶Mank i Farisarja his sawe, kai tchatchepangre hi. Har jon dikan, kai job kolentsa chal, penan le ap leskre malende: “Hoske chal job kolentsa, kai lenn i biboldendar lowe i Remarjenge dren, un kol wawarentsa, kai hi ninna pale-tchiddo?”

¹⁷Har o Jesus kowa shunas, penas job ap lende: “Kolla, kai sasto hi, djan gar pash o dramaskro. Kolla, kai nasselo hi, djan pash leste. Me wom gar, te dap kolen pash mande gole, kai ap o tchatcho drom hi. Na-a! Me wom, te dap kolen pash mande gole, kai djan ap o tchilatcho drom.”

¹⁸His i diwes, kai chan o Johanneskre mala un i Farisarja tchi, te mangenn le o Debles an. Koi wan mursha pash o Jesuseste, un penan ap leste: “Kolla, kai shunenn ap o Johanneste, ninna kolla, kai shunenn ap i Farisarja, chan i tsiro tchi, te mangenn le o Debles an. Hoske krenn tire mala kowa gar?”

¹⁹Penell o Jesus ap lende: “Jaake rah, har o bijabeskro ap i bijab hi, chan un pijenn leskre mala, kai leha ap i bijab hi.

²⁰Ko tsiro wella, kai o bijabeskro lendar krik lino wella. Ap ko tsiro chan le un pijenn le tchi, te mangenn le o Debles an.

²¹Kek siwell i newo kotar than[13] ap i phuro ripen. Pash o thopen well o newo kotar tikneder un tserdell pes pale tele, un o phuro ripen djal budeder paash.

²²Un kek tchorell newi mool an i phure moljakre gone. I newi mool krell i phure moljakre gone paash. Un koi mool nashell win, un kol moljakre gone djan paash. I newi mool well tchoredo an newe moljakre gone!”

²³Ap jek Debleskro diwes djas o Jesus ap i kotar them, kai djob baro was. Un leskre mala lan o djob an i wasta, te chan le.

²⁴Un kol Farisarja penan ap leste: “Hoske krenn tire mala ap o Debleskro diwes sawo koowa, hoi hi gar pal maro tchatchepen?”

²⁵Penas lo ap lende: “Hoi kras o baro rai David peskre malentsa, har jon bokan? Djinenn tumer gar, hoi an o Debleskro lab tchinlo hi?

²⁶An ko tsiro, kai o Abjatar o baro rashai his, djas o David an o Debleskro kheer un chas o Debleskre mare, hoi kote tchiddo his. Pal i biboldengro tchatchepen his kol mare i rashajenge kokres koi. O David chas len, un das ninna kolen, kai pash leste his.” [14]

²⁷Un o Jesus penas ap lende: “O Debleskro diwes hi i menshenge koi. O mensho was gar kerdo, te hi lo o Debleskro diweske koi.

²⁸Jaake hom me, o Menshengro Tchawo, ninna o rai pral o Debleskro diwes.”