Read O Debleskro Drom - I Bibla an o Romano Rakepen 2021 Marko 3 Bible Online

Marko 3 - O Debleskro Drom - I Bibla an o Romano Rakepen 2021 bible

Marko 3

¹Un o Jesus djas pale an i biboldengri kangri. Koi his i mursh, koles his i bango wast.

²Un jon dikan ap leste, un putchan pendar: “Krell lo kanna kau murshes ap o Debleskro diwes sasto?” Jon rodan tchomone, te nai anenn le les glan i tchatchepangre.

³Un job penas ap kol mursheste, koles i bango wast hi: “Ste pre un am kai!”

⁴Palle penas lo ap lende: “Hoi kras mer pal maro tchatchepen ap o Debleskro diwes? Hi gar feteder te kras mer latcho koowa har tchilatcho koowa? Hi gar feteder te kras mer i nasselen sasto, har te mukas mer len te merell?” Jon penan tchi.

⁵Kowa dukas les, kai lengro dji har i bar his. Un job dikas chojemen ap lende un penas ap ko mursheste: “Sike tiro wast!” Un job sikras peskro wast. Un ko wast was sasto.

⁶Un kol Farisarja djan win, un djan pash kolende, kai shunenn ap o Herodeste, un rakran lentsa, har jon nai marenn les.

⁷O Jesus un leskre mala djan penge pash o baro pani. Un bud menshe dran o them Galilea djan leske palla. Ninna bud wawar djan pash leste, kai shunan, hoi job lauter kras. Kolla wan dran o them Judea, un dran o foro Jerusalem, un dran o them Idumea un dran o them ap i wawar rig o panjestar Jordan, un dran ko them, kai i forja Tirus un Sidon tchiddo hi.

⁹Un o Jesus kras bud menshen sasto. Doleske wan lauter, kai nasselo hi, pash leste. Un hakeno kamas les an-taprell, te well lo sasto. Koi penas o Jesus ap peskre malende, te anenn le leske i tikno bero, kai job nai pre djala, te well lo gar paash stakedo.

¹¹Un har kol menshe, kai benga an lende his, les dikan, peran jon glan leste tele, un dan gole: “Tu hal o Debleskro tchawo!”

¹²Un job penas soreles ap lende, te penenn le kowa kekeske.

¹³O Jesus djas ap i berga, un das kolen pash peste gole, kai job win rodas. Un kolla wan pash leste.

¹⁴Job rodas deesh-te-dujen lendar win, te wenn le leskre bitchepangre. “Me rodom tumen win, te atchenn pash mande,” penas lo. “Me bitchrau tumen pash i menshende, te penenn lenge o Debleskro lab.

¹⁵Un tumen well i soor, te tradenn i bengen win.”

¹⁶Un kol deesh-te-dui his: o Simon, koles das job ko lab Petro,[15]

¹⁷un o Jakobo un leskro phraal o Johanni. Lengro dad hi o Zebedeo. Kolen das lo ko lab Boanerges. Kowa kharella Mursha pherdo choli.

¹⁸Mank kol deesh-te-dujende his ninna o Andreas, un o Filipo, un o Bartolomeo, un o Mateo, un o Thomas, un o Jakobo, koleskro dad hi o Alfeo, un o Tadeo, un o Simon, kai his kol menshendar, kai kharenna Zelotarja,

¹⁹un o Judas Iskariot, ko phukepaskro.

²⁰O Jesus djas an i kheer. Koi wan pale bud menshe khetne, jaake, kai his len kek tsiro, te chan le.

²¹Un har leskre menshe kowa shunan, penan le: “Job hi dinelo!” Un jon kaman les te taprell.

²²Un i biboldengre tchatchepangre, kai wan dran o foro Jerusalem tele, penan: “O pralstuno beng hi an leste!” Un jon penan ninna: “O pralstuno beng das les i soor, te nai tradell job i bengen win.”

²³Un o Jesus kharas len khetne, un rakras ap lende laba, kai i khatedo tchatchepen dren hi. Un job penas: Har nai tradell o beng o benges win?

²⁴Te kurenn pen i bare raja an jek them, palle djal ko them paash.

²⁵Un an jek kheer nai well gar dujen penepaske. Kowa djal gar.

²⁶Te tchingrell jek beng i wawar bengeha, palle nashrell job peskri soor un job djal paash.

²⁷Kek nai djal an i kheer, kai i sorelo mursh djiwella, un tchorell leskro koowa. Job hunte pandell ko sorelo murshes. Palle nai randell lo leskro tselo brawlepen.

²⁸Tchatchepah, me penau tumenge: Hako tchilatcho koowa, hoi i menshe kran, nai bistrell o Dewel. Ninna te penenn le djungele laba pral leste, nai bistrell lo kowa.

²⁹Koon pral o Debleskro Ducho djungele laba rakrella, kolestar well koi doosh[16] gar krik lino. Leskri doosh atchella hako tsiro.

³⁰Kowa penas lo lenge, har jon penan: “An leste hi i beng!”

³¹Koi was o Jesuseskri dai un leskre phrala. Jon his win tardo un bitchran jekes pash leste, te kharell lo les.

³²Bud menshe his trul leste beshdo. Un leske was penlo: “Dik, tiri dai, tire phrala un tire phenja hi win tardo, un kamenn tuha te rakrell.”

³³Koi penas job: “Me kamau tumen te sikrell, koon miri dai hi un mire phrala.”

³⁴Un job dikas trujel ap kolende, kai his trul leste beshdo, un penas: “Dikenn, koja hi miri dai, un kolla hi mire phrala.

³⁵Kowa, kai krell, hoi o Dewel kamella, kowa hi miro phraal, miri pheen, un miri dai.”