Read O Debleskro Drom - I Bibla an o Romano Rakepen 2021 Marko 4 Bible Online

Marko 4 - O Debleskro Drom - I Bibla an o Romano Rakepen 2021 bible

Marko 4

¹Un pale djas o Jesus pash o baro pani, un penas i menshenge o Debleskro lab. Un pash leste wan jaake bud menshe khetne, te hunte djas job an i bero, hoi an o pani tchiddo his. Un job beshas pes kote, un kol tsele menshe his pash o pani tardo.

²Un job rakras ap lende bud sawe laba, kai hi i khatedo tchatchepen dren. Un job penas ap lende:

³Shunenn, i hacho djas win, te witsrell lo o tikno djob ap peskro kotar phub, te well ko djob baro.

⁴Un har job o tikno djob ap i phub witsras, peran tikne kotja ap o drom. Koi wan i tchirkle un chan len pre.

⁵Wawar djob peras ap i barra. Koi his gar bud phub. Dran kowa was ko djob sik dran i phub win.

⁶Har kanna o kham pre djas, was ko djob, kai gar dur an i phub his, chatchedo un meras tele.

⁷Wawar tikno djob peras tel i subjengre burra, un kol burra wan baro un tassran les, jaake, kai was ko djob gar baro.

⁸Wawar tikno djob peras ap i latchi phub, djas pre un was baro. Kowa was trijanda kope jaake bud. Wawar tikno djob was shob-deesh kope jaake bud. Un wawar tikno djob was sheel kope jaake bud.

⁹Un job penas: Mukenn kowa an tumaro shero trujel te djal!

¹⁰Har his o Jesus kokres peskre deesh-te-dujentsa un wawarentsa peskre malendar, putchan le lestar, hoi job kol labentsa kamell te sikrell.

¹¹Koi penas lo ap lende: O Dewel mukell tumen te haiwell, har kote djal, kai dell lo menshen pash peste gole, te djan le ap leskro drom. Kol wawar, kai win hi, ap kolende rakrau sawe labentsa, kai i khatedo tchatchepen dren hi,

¹²te nai dikenn le kowa pengre jakentsa, un haiwenn les gar, un te nai shunenn le les, un haiwenn les gar, te wenn le gar pash o Debleste, te lell lo lengri doosh lendar.[17]

¹³Palle penas lo ap lende: Te haiwenn tumer kal laba gar, har kamenn tumer kol tsele wawar laba te haiwell?

¹⁴Ko hacho hi har i mensho, kai penell i menshenge o Debleskro lab.

¹⁵Ko drom hi har o dji kol menshendar, kai shunenn ko lab. Palle well sik o beng, un lell ko lab lendar krik, kai lenge penlo was.

¹⁶Ko kotar phub, kai pherde barra hi, hi har o dji kol menshendar, kai shunenn ko lab, un lenn les i bachtjatar sik pre,

¹⁷un bistrenn les ninna pale sik. Jon mukenn les gar an pengro dji soreles te well. Te well i pharo tsiro ap lende, un te wenn le mange palla lino, palle witsrenn le pengro patsepen ap i rig.

¹⁸Wawar menshe hi har ko kotar phub, kai o djob tel i subjengre burra peras. Kal menshe shunan ko lab.

¹⁹Palle dikenn le ap i phubjakro koowa. Jon kamenn brawelo te well, un o brawlepen krell len gar bachtelo. Un len hi bok pal bud wawar koowa. Un kowa lauter tassrell ko lab, hoi shunan le. Un ko lab nai rakrell buder gar an lengro dji.

²⁰Koi latchi phub hi har o dji kol menshendar, kai shunenn ko lab un krenn kowa, hoi ko lab lenge penella. Pash kolende hi ko lab har o djob, hoi baro was. Un pash jekeste was lo trijanda kope jaake bud, un pash i wawareste was lo shob-deesh kope jaake bud, un pale pash i wawareste was lo sheel kope jaake bud.

²¹O Jesus penas ap peskre malende: Kek chatchell i momeli an, te tchiwell lo lat tel i piri, witar gar tel o tchiben. Na-a, job tchiwell lat ap i momelengri, kai i momeli diklo wella.

²²Well i tsiro, kai djinenn i menshe kowa, hoi djinenn le kanna gomme gar. Well i tsiro, kai haiwenn le kowa, hoi haiwenn le kanna gomme gar.

²³Mukenn kowa an tumaro shero trujel te djal!

²⁴Un job penas ap lende: Denn garda ap kowa, hoi tumer shunenna! Te shunenn gar mishto, hoi penau, haiwenn kowa gar. Te shunenn mishto, haiwenn kowa ninna mishto. Un o Dewel krell tumaro dji pre, te haiwenn gomme feteder.

²⁵Koon kowa, hoi job haiwas, an peskro dji rikrella, kowa haiwell bud un budeder. Koon kowa gar an peskro dji rikrella, kolestar well ninna kowa lino, hoi les hi.

²⁶Un o Jesus penas: Te kharell o Dewel menshen pash peste, te djan le ap leskro drom, hi kowa jaake, har te tchiwell i hacho tikno djob ap i phub.

²⁷Haki rati tchiwell lo pes tele, un taissarlake stell lo pale pre. Un ko tikno djob djal pre un well baro, un ko mursh djinell gar, har kowa lauter djala.

²⁸I phub krell pestar, te well lauter baro. O senlepen well win, palle baro un bareder, un well pherdo tikno djob.

²⁹Ap ko tsiro kai hi ko djob pesso, bitchrell o hacho peskre budepangren, te tchinenn le o djob tele. O tsiro was, te anenn le o djob dren.

³⁰Palle penas o Jesus ap lende: Me penau tumenge kanna, har kowa hi, te dell o Dewel i menshen pash peste gole, te djan le ap leskro drom.

³¹Kowa hi jaake har i djob dran i senftikro ruk. Te well lo an i phub witsedo, hi lo tikneder har ko tselo wawar djob ap i phub.

³²Hi lo an i phub, djal lo pre un well bareder har o tselo wawar senlepen. Dran ko tikno djob well i ruk jaake baro, te nai djiwenn i tchirkle ap leste, kote, kai o kham gar jaake tato hi.

³³Un o Jesus penas lenge bud sawe laba, kai i khatedo tchatchepen dren hi. Job penas lenge o Debleskro lab jaake, har jon nai haiwan kowa.

³⁴Hako kopo, kai job lenge o Debleskro lab penas, rakras lo sawe labentsa, kai i khatedo tchatchepen dren hi. Job te his pengre malentsa kokres, palle penas lo lenge, hoi kol laba kamenn te sikrell.

³⁵Un ap ko diwes ap i rati penas o Jesus ap peskre malende: “Uleras wergel!”

³⁶Un jon mukan kol menshen te djal, un djan an ko bero[18], kai o Jesus hi, un lan les lentsa. Wawar bere[19] his ninna koi un uleran lentsa.

³⁷Koi phurdas i baro diwjo ducho pral o baro pani. Un o pani was diwjo un djas pre te tele. Un bud pani was an o bero dren, jaake bud, te was o bero pherdo pani.

³⁸Un o Jesus his pal an o bero, un sowas ap i pernitsa. Un jon djangran les pre[20], un penan ap leste: “Sikepaskro, putcheh tu gar koi pal, kai mer tassah?”

³⁹Un job stas pre, un das ko sorelo ducho trad, un penas ap ko baro pani: “Atch! Muk tele!” Un ko sorelo ducho phurdas buder gar, un o baro pani das buder kek gole.

⁴⁰Un job penas ap lende: “Hoske trashenn tumer jaake? Hi tumen kek patsepen?”

⁴¹Un kolen was i bari traash, un jon penan mank pende: “Koon hi ko mursh? Ninna o sorelo ducho un o baro pani shunenn ap leste.”