Read O Debleskro Drom - I Bibla an o Romano Rakepen 2021 Marko 5 Bible Online

Marko 5 - O Debleskro Drom - I Bibla an o Romano Rakepen 2021 bible

Marko 5

¹Un jon wan ap o wawar panjeskri rig an o them Gerasa.

²Un har o Jesus dran o bero djas, nashas i mursh pash leste. Kowa was dran i mulengre khera[21]. Les his i beng an peste,

³un djiwas an kol mulengre khera. Un kek nashte pandas les, witar gar i sasterne shellentsa.

⁴Bud kope pandan le leskre wasta un pire i sasterne shellentsa, un job kras len paash un phagas len pestar tele. Un kek nashte was rai pral leste.

⁵Hako tsiro ap o diwes un an i rati, his job an i mulengre khera un ap i berge, un das bari gole, un das pes i barrentsa.

⁶Har job o Jesuses dur glan peste dikas, nashas lo pash leste un witsras pes glan leste ap i phub.

⁷Un o Jesus penas ap o bengeste: “Tu beng, dja win dran kau mursheste!” Koi das job bari gole: “Jesus, tu tchawo o baro Deblestar, hoi kameh tu mandar? Me mangau tut pash o Debleste: Ma duke man gar!”

⁹Un o Jesus putchas lestar: “Har khareh tu?” Koi penas lo: “Mer ham bud. Doleske kharau Legioni.”

¹⁰Un job mangas o Jesusestar, te tradell lo len gar dran ko them win.

¹¹Koi his pash i berga bud bale, hoi kote chan.

¹²Un kol benga mangan lestar: “Muk men an kol balende dren te djal!”

¹³Un job mukas len an lende dren te djal. Koi wan kol benga dran o mursheste win, un djan an kol balende. Un kol tsele bale wan diwjo un nashan i berga tele, un stan an o baro pani, un tassan. Kolla his nai dui serja bale.

¹⁴Un kolla, kai dan garda ap i balende, nashan penge, un penan kowa i menshenge an i forja un an i gaba. Un kol menshe kaman te dikell, hoi kote djas, un wan pash o Jesuseste,

¹⁵un dikan koles kote beshdo, kolestar kol bud benga win wan. Job his an-rido un buder gar diwjo. Har jon kowa dikan, was i traash ap lende.

¹⁶Un kolla, kai lauter dikan, penan lenge, hoi koleha djas, un hoi kol balentsa djas.

¹⁷Un jon mangan o Jesusestar, te djal lo dran lengro them win.

¹⁸Un har job an o bero djas, mangas lestar ko mursh, kai his i benga an leste, te atchell lo nai pash leste.

¹⁹O Jesus kamas gar, te djas job leha, un penas ap leste: “Dja khere pash tire menshende! Pen lenge lauter, hoi o Dewel tuke kras un har latcho job ap tute his!”

²⁰Un kau mursh djas peske, un djas an ko them trujel, kai i deesh forja tchiddo hi, un penas i menshenge, hawo baro koowa o Jesus ap leste kras. Un hakeno kras bare jaka.

²¹Har o Jesus an o bero pale wergel uleras, wan kote bud menshe pash leste khetne. Un job his gomme pash o baro pani,

²²koi was i pralstuno pral i biboldengri kangri. Leskro lab his Jairo. Har dikas lo o Jesuses, peras lo glan leste tele,

²³un mangas les o tselo djijeha un penas: “Miri tchai hi ap o merepen tchiddo. Am un tchip tire wasta ap late, te well li sasto, un te djiwell li!”

²⁴Un job djas leha. Un bud menshe djan leske palla un his trul leste.

²⁵Mank lende his i djuwel. Kolat his i ratlo nasslepen. Deesh-te-dui bersha his li nasseli,

²⁶un das lauter, hoi lat his, i dramangrende. Un kek nashte kras lat sasto. Joi was gomme nassleder.

²⁷Har joi o Jesusestar shunas, was li mashkral i menshende pal leste, un tapras ap leskro ripen.

²⁸Joi penas peske: “Te taprau kokres ap leskro ripen, wau sasto.”

²⁹Un ap jek kopo djas kau nasslepen latar. Un joi haiwas, kai hi li sasto.

³⁰Un o Jesus haiwas pestar, kai djas i soor lestar win, un rissras pes trujel, un penas ap i menshende: “Koon tapras ap miro ripen?”

³¹Un leskre mala penan ap leste: “Tu dikeh, har bud menshe trul tute hi, un koi putcheh tu: Koon tapras ap miro ripen?”

³²Job dikas pes trujel pal kolate, kai kras kowa.

³³Koi djuwel kai djinas, hoi lake djas, trashas un trissas[22]. Un joi was pash leste, un peras glan leste tele ap i phub, un penas leske o tselo tchatchepen.

³⁴Job penas ap late: “Romnija, tiro patsepen kras tut sasto. Dja mo Debleha! Tiro nasslepen well buder gar pale.”

³⁵Har job jaake rakras, wan mursha dran o kheer kolestar, kai o pralstuno pral i biboldengri kangri hi, un penan leske: “Tiri tchai meras. Tu hunte mangess o rajes buder gar.”

³⁶O Jesus shunas kal laba, un penas ap kol pralstuneste: “Ma traash, pats!”

³⁷Un o Jesus mukas kokres o Petres, un o Jakobes, un koleskro phrales, o Johanni, leha te djal.

³⁸Un jon wan an o kheer kol pralstunestar. Un job dikas kote bud menshen, kai nashan kate un kote un rowan un dan bari gole.

³⁹Un job djas dren, un penas ap lende: “Hoske denn tumer gole un rowenna? Koi tchai meras gar, joi sowella.”

⁴⁰Un jon san pral leste. O Jesus tradas len lauteren win, un las kol tchakro dades un lakri dai peha, ninna kolen, kai pash leste his, un djas dren, kai koi tchai tchiddo his.

⁴¹Un job tapras kol tchat pash o wast, un penas ap late an peskro rakepen: “Talita kumi!” Kowa kharella: Tchai, me penau tuke, ste pre!

⁴²Un sik stas koi tchai pre, un djas trujel. Joi his deesh-te-dui bersha phuro. Un lenge atchas o rakepen pral kowa krik.

⁴³Un job penas lenge soreles: “Ma penenn kowa kekeske!” Un palle penas lo: “Denn lat te chal!”