Read O Debleskro Drom - I Bibla an o Romano Rakepen 2021 Marko 6 Bible Online

Marko 6 - O Debleskro Drom - I Bibla an o Romano Rakepen 2021 bible

Marko 6

¹O Jesus djas dran ko foro win un was an peskro dadeskro foro. Un leskre mala djan leha.

²Ap o Debleskro diwes djas lo an i biboldengri kangri un sikras i menshende o Debleskro drom. Un bud menshe, kai shunan les, kran bare jaka pral kowa, hoi job penas. Jon penan: “Koon penas leske kowa lauter? Koon das les sawo goswepen? Kai well leskri bari soor, te nai krell lo sawo baro koowa?”

³“Hi kowa gar ko mursh, kai budrell i kashtentsa? Hi leskri dai gar i Maria? Hi leskre phrala gar o Jakobo, o Josef, o Simon, un o Judas? Un ninna leskre phenja djiwenn pash mende.” Un jon choiran pen pral leste.

⁴O Jesus penas ap lende: “Kek Debleskro rakepaskro well kote sharedo, kai job khere hi, witar gar pash peskre menshende un an peskro kheer. An i wawar forja un gaba well lo sharedo.”

⁵Un kote nashte kras job kek baro koowa an o Debleskri soor, kokres i nasslenge tchiwas job i wasta pre un kras len sasto, un kolla his gar bud nassele.

⁶Un job nai haiwas gar, hoske i menshen kote kek patsepen his. Palle djas lo an kol gaba trujel, un sikras i menshende o Debleskro drom.

⁷O Jesus das kol deesh-te-dujen pash peste gole, te bitchrell lo len win, dui te dui. Job das len i soor pral i benga, te nai tradenn le len i menshendar win.

⁸Un job penas lenge soreles: “Lenn tchi tumentsa ap o drom, kokres i kasht un kircha. Lenn kek maro, kek possita, kek lowe, witar gar i duito gad!”

⁹

¹⁰Un job penas ap lende: “Kote, kai tumer an i kheer dren djana, kote atchenn jaake rah har atchenn an ko foro.

¹¹Kote, kai lenn le tumen gar an pengro kheer dren, un kamenn gar ap tumende te shunell, kote djan dureder, un denn koi tchik tumare pirendar tele! Kowa sikrell kol menshende, kai jon tchilatcho hi.”

¹²Un kol deesh-te-dui djan trujel, un penan i menshenge: “Mukenn tumaro tchilatcho drom, un djan ap o Debleskro drom!”

¹³Un jon tradan bud bengen i menshendar win, un makan bud nasselen o djeteha dren, un kran len sasto.

¹⁴Ninna o baro rai, o Herodes, shunas o Jesusestar. An o tselo them rakran le lestar. I menshe penan: “O Johanni, kowa, kai i menshen taufras, stas i mulendar pre. Doleske hi les i soor, te krell lo sawo baro koowa.”

¹⁵Wawar penan: “Kowa hi o Elija.” Un pale wawar penan: “Kowa hi i Debleskro rakepaskro har kol wawar Debleskre rakepangre.”

¹⁶Har kowa o Herodes shunas, penas lo: “Kowa hi o Johanni, kai mukom leske o shero tele te dell. Kowa stas i mulendar pre.”

¹⁷Kowa was jaake: Glan ko tsiro las o Herodes koi romjat peskro phralestar Filip. Lakro lab his Herodia. Un o Johanni penas leske: “Kowa hi gar mishto, kai tu lal tiro phraleskri romjat.” Har o Herodes kowa shunas, penas lo ap peskre lurdende, te taprenn le o Johanni, un te witsrenn le les an o stilepen.

¹⁸

¹⁹Un i Herodia his chojedo ap o Johanneste un kamas les te marell, un joi kras les nashte gar.

²⁰O Herodes trashas o Johannestar. Job djinas, kai o Johanni i Debleskro mursh hi, kai djas o tchatcho drom. Doleske das lo garda ap leste un rikras les an o stilepen. Job kamas o Johanneskro rakepen. Hako kopo, kai job les shunas, djinas lo buder gar, hoi te krell lo un te penell lo.

²¹Koi was i diwes, kai hi mishto i Herodiake. O Herodes was i bersh phureder un mukas i baro chapen te krell. Pash ko chapen wan i pralstune pral peskro them, ninna i pralstune lurde. Un i brawele dran o them Galilea his ninna koi.

²²Koi was i Herodiakri tchai pash lende un khelas glan lende. Lakro khelepen his shukar an i jaka o rajestar Herodes un an i jaka kolendar, kai pash leste beshdo hi un chan. Koi penas o Herodes ap koi tchate: “Tu nai mangeh mandar, hoi tu kameh. Me dau kowa tute!”

²³Un job das pes sowel: “Hoi tu mandar ninna mangeh, kowa dau tut, ninna te mangeh mandar o paash miro themestar un brawlepen.”

²⁴Un koi tchai djas win pash peskri date, un putchas latar: “Hoi mangap lestar?” Koja penas: “O shero o Johannestar, kowa kai taufras i menshen.”

²⁵Koi djas li sik dren pash o Herodeste, un mangas lestar: “Me kamau, te dess man kanna ap i tcharo o shero o Johannestar, kowa, kai taufras i menshen.”

²⁶Har o Herodes kowa shunas, dukas leskro dji. Ninna te khaitas les kowa, kamas lo peskro lab te rikrell, hoi job glan kolende das, kai pash leste trul i chapaskri beshdo his un shunan, har job pes sowel das.

²⁷Doleske bitchras lo i lurdes pash o Johanneste, te dell lo leskro shero tele. Kowa djas an o stilepen, un das leske o shero tele,

²⁸hidjras ko shero ap i tcharo, un das les kol tchate. Un koi tchai das les peskri date.

²⁹Un har shunan o Johanneskre mala kowa, wan le, lan o mules lentsa, un paskran les.

³⁰Un kol deesh-te-dui, kai o Jesus pash i menshende bitchras, kolla wan pale, un penan o Jesuseske lauter, hoi jon kran un penan.

³¹Kote his jaake bud menshe, kai wan un djan, te his len kek tsiro, te chan le. Un job penas ap lende: “Awenn, djas kote, kai kokres ham, te lenn tumer newi soor!”

³²Un jon uleran an o bero kote, kai jon kokres hi.

³³Har kol menshe dikan, kai jon uleran penge, nashan le dran i tsele forja kote khetne, kai o Jesus peskre malentsa djas. Un jon his glan lende koi.

³⁴Un o Jesus djas dran o bero win, un dikas kol bud menshen. Kolla khaitan les. Jon his har bakre, kai hi len kek bakrengro, kai dell garda ap lende. Un job rakras lentsa i rah tsiro.

³⁵Ap i rati wan leskre mala pash leste, un penan: “Kate, kai mer ham, della tchi te chal, un i rati wella.

³⁶Bitche kal menshen tutar, te djan le pash i hachende un an i gaba, te ginenn le penge maro!”

³⁷Koi penas lo ap lende: “Denn tumer len te chal!” Penan le: “Kameh, te las dui-sheel rupene beme, te ginas maro un das len te chal?”

³⁸Penas lo: “Kitse mare hi tumen? Djan koi un dikenn!” Un har jon kowa djinan, penan le leske: “Pantch mare un dui matche.”

³⁹Un o Jesus penas lenge, te beshenn le pen lauter kate te kote an o senlepen khetne.

⁴⁰Un jon beshan pen kate te kote khetne, jaake te his kate sheel beshdo, un kote his paash-sheel beshdo.

⁴¹Un job las kol pantch mare un kol dui matche an i wasta, dikas pre ap o bolepen, parkras pes pash o Debleste, un phagas kol mare an kotja. Palle das lo len peskre malende, te denn le kowa i menshende. Un kol dui matche das lo ninna i tsele menshende.

⁴²Un jon chan lauter un wan tchalo.

⁴³Palle hadan le kol kotja pre, hoi atchan pral. Koi wan deesh-te-dui marengre gone pherdo lendar. Un jon hadan ninna kol matchendar pre, hoi pral atchan.

⁴⁴Un kolla, kai chan kol mare, kolla his pantch serja mursha.

⁴⁵Un sik pral kowa tradas o Jesus peskre malen, te djan le an o bero, te ulerenn le glan leste wergel ap i wawar rig pash o foro Betsaida. Job atchas pash i menshende, te bitchrell lo len khere.

⁴⁶Har job bitchras len pestar, djas lo ap i berga, te rakrell lo o Debleha.

⁴⁷Ap i rati his ko bero mashkral ap o baro pani. Un job his ap o them kokres.

⁴⁸Un i sorelo ducho phurdas pral o baro pani, un das ap lende. Un job dikas, har jon pen tele maran an o bero, te wenn le pash o them. Sik taissarlake, his jaake starenge, was lo pash lende, un djas ap o baro pani, un kamas langs lende te djal.

⁴⁹Jon lauter dikan les, un i daar tapras len. Jon patsan, kai hi job i mulo, un dan gole i darjatar. Sik penas lo ap lende: “Ma darenn! Me hom. Lauter hi mishto!”

⁵⁰

⁵¹Un job was pash lende an o bero, un o sorelo ducho mukas tele. Un lenge atchas o rakepen krik.

⁵²Ninna te dikan le, hoi job kol pantch marentsa kras, haiwan le gar, hawi soor les hi. Lengro dji his har bar.

⁵³Un jon uleran wergel pral o pani un djan ap o them pash o foro Genezaret.

⁵⁴Un har jon dran o bero stan, prindjran les i menshe sik,

⁵⁵un nashan an o tselo them trujel, un hidjran kol nasselen ap i tchibja kote, kai jon shunan, te hi lo.

⁵⁶Un kote, kai job djas, an i gaba, an i forja, un ap o them, tchiwan le i nasselen kote, kai i menshe khetne wenna, un mangan lestar, te mukell lo len i kotar leskro ripen an-taprell. Un hakeno, kai ap leskro ripen tapras, was sasto.