Read O Debleskro Drom - I Bibla an o Romano Rakepen 2021 Marko 7 Bible Online

Marko 7 - O Debleskro Drom - I Bibla an o Romano Rakepen 2021 bible

Marko 7

¹Jek diwes wan i Farisarja un biboldengre tchatchepangre dran o foro Jerusalem khetne pash o Jesuseste.

²Un jon dikan, har mank leskre malende sawe hi, kai thowan gar pengre wasta glan o chapen.

³Kol Farisarja, ninna i tsele wawar bibolde, thowenn pengre wasta glan o chapen. Un jaake rikrenn le kowa, hoi lengre phure lenge penan.

⁴Te wenn jon dran o foro an lengro kheer pale, thowenn le pen, un palle nai chan le. Un jon rikrenn pen ap bud wawar koowa, un thowenn i khore, i pirja un i sasterne tchare jaake, har lengre phure lenge penan.

⁵Koi putchan lestar kol Farisarja un kol biboldengre tchatchepangre: “Hoske djiwenn tire mala gar pal kowa, hoi mare phure menge penan? Hoske chan le o maro i tchikle wastentsa?”

⁶Penas lo ap lende: “Tumer rakrenn dui tchipjentsa. O Debleskro rakepaskro, o Jesaja, penas o tchatchepen pral tumende, har job tchinas: Jaake penell o Dewel: Kal menshe sharenn man pengre muja. Lengre djia hi dur krik mandar.[23]

⁷Jon te mangenn man an, hi kowa mange tchi moldo. Jon penenn i menshenge menshengre laba un gar miro lab.

⁸Tumer krenn, hoi i menshe tumenge penan un gar, hoi o Dewel tumenge penas.”

⁹Un pale penas lo ap lende: “Tumer haiwenn mishto o Debleskre laba ap i rig te tchiwell, te nai krenn kowa, hoi tumare phure tumenge penan.

¹⁰O Mose penas: Dik ap tiro dadeste un ap tiri date, te djal lenge mishto![24] Un ninna penas o Mose: Koon ap peskro dadeste un ap peskri date i bibacht anella, kowa hunte merella![25]

¹¹Tumer penenna: Te penell jek ap peskro dadeste un ap peskri date: Korban[26], kowa kharella: Me dau kowa o Debleste, hoi hunte doms tute,

¹²palle hunte krell job buder tchi peskro dadeske un peskri dake.

¹³Un jaake tchiwenn tumer o Debleskro lab ap i rig, un krenn kowa, hoi tumare phure tumenge penan. Un bud sau koowa krenn tumer.”

¹⁴Un o Jesus das pale i menshen pash peste gole, un penas ap lende: “Shunenn un haiwenn mishto, hoi me tumenge penau!

¹⁵Tchi, hoi an o mensheskro mui dren wella, krell les pale-tchiddo. Kowa, hoi dran leskro dji win wella, kowa krell les pale-tchiddo.[27]

¹⁶Shunenn mishto, hoi me tumenge penau!”

¹⁷Pale mukas lo kol menshen, un djas an o kheer. Kote putchan leskre mala lestar, hoi job kol labentsa kamas te penell.

¹⁸Un job penas ap lende: “Haiwan tumer witar gar? Haiwan tumer gar, kai lauter, hoi an o mensheskro mui dren wella, kowa nashte krell les gar pale-tchiddo.

¹⁹Ko chapen djal gar an leskro dji. Ko djal an leskro per, un well pale win.” Un kol labentsa penas o Jesus lenge, kai kek chapen pale-tchiddo hi.[28]

²⁰Un job penas: “O tchilatchepen, hoi dran o mensheste win wella, kowa krell les pale-tchiddo.

²¹Dran o menshengro dji well o tchilatcho koowa, hoi an leskro shero trujel djal. Dran o dji well, te krell lo djungelo bipandlo koowa, te tchorell lo, te dell lo i wawares mulo.

²²Te chochell i mursh peskri romjat i wawar djuwjah, un te chochell i djuwel peskro romes i wawar mursheha, well kowa dran lengre djia. Dran o dji well ninna i bok pal i lowe, o chochepen, wi-ladjedo koowa un dinlepen. Dran o dji well ninna, te dikell jek tchilatche jakentsa ap kowa, hoi o wawares hi, te hi lo midjak ap o wawareste, te rakrell lo djungeles pral o wawareste, te hadell lo pes pral o wawareste.

²³Ko tselo tchilatchepen well dran o mensheskro dji, un krell o menshes pale-tchiddo.”

²⁴Un o Jesus stas pre un djas dureder, un was an ko them pash o foro Tirus. Kote djas lo an i kheer. Un job kamas, te djinell kek, kai job hi. Un ninna kote nai atchas lo gar khatedo.

²⁵I djuwel shunas lestar. Kaja his kek biboldetsa. Joi his dran o them Siro-Fenicia.[29] Kolakri tchat his i beng an late. Un koi djuwel was pash leste, un witsras pes glan leste ap i phub, un mangas lestar, te tradell lo ko beng dran lakri tchate win.

²⁷O Jesus penas ap late: “Muk o maro i tchawenge! Jon te hi tchalo, nai chan i wawar. Kowa hi gar mishto, te lell jek o maro i tchawendar krik un witsrell les glan i djuklende.”

²⁸Penas li ap leste: “Tiro hi tchatcho, miro rai. Ninna i djukle tel i chapaskri chan i tikne kotja, hoi mukenn i tchawe ap i phub te perell.”

²⁹Penas lo ap late: “Hawo baro lab! Doleske penau tuke: Dja khere! Ko beng djas dran tiri tchate win.”

³⁰Un joi djas an peskro kheer un hatsas lakri tchat ap o tchiben tchiddo, un ko beng his dran late win.

³¹Un o Jesus djas win dran o them pash o foro Tirus, un djas an o them pash o foro Sidon, un dureder pash o baro pani an o them Galilea. Un job was mashkral an ko them, kai hi kol deesh forja tchiddo.

³²Un jon anan jekes pash leste, kowa nai shunas gar un rakras gar. Un jon mangan o Jesusestar, te tchiwell lo peskro wast ap leste.

³³Un job las kol murshes ap i rig, krik kol bud menshendar, un tchiwas peskre gushte an leskre kanda, un tchiwas tchunger ap leskro tchip.

³⁴Palle dikas lo pre ap o bolepen, las i baro ducho, un penas ap leste: Effata! Kowa kharella: Kre tut pre!

³⁵Un ap jek kopo kran pen leskre kanda pre. Un leskro tchip his buder gar pandlo, un job rakras nai mishto.

³⁶Un o Jesus penas kolenge, kai kote his, te penenn le kekeske, hoi job kras. Budeder te penas job, te penenn le tchi i menshenge, budeder rakran jon koi pral.

³⁷Un kolenge, kai kowa shunan, atchas o rakepen krik, un jon penan: “O Jesus kras lauter mishto. Kolen, kai nashte shunenn gar, krell lo, te shunenn le. Un kolen, kai rakrenn nashte gar, krell lo, te rakrenn le.”