Read O Debleskro Drom - I Bibla an o Romano Rakepen 2021 Marko 8 Bible Online

Marko 8 - O Debleskro Drom - I Bibla an o Romano Rakepen 2021 bible

Marko 8

¹An kol diwessa his ninna pale bud menshe pash o Jesuseste. Har kolen buder tchi te chal his, das o Jesus peskre malen pash peste gole, un penas ap lende:

²“Man khaitenn kal menshe. Triin diwessa hi le kate pash mande, un len hi tchi te chal.

³Me te bitchrau len bokles khere, palle perenn le ap o drom khetne. Mank lende hi sawe, kolen hi i dur drom.”

⁴Leskre mala penan ap leste: “Kai hatsas mer maro kate an kau mulo them, te kras len tchalo?”

⁵“Kitse mare hi tumen?” putchas lo. “Efta,” penan le.

⁶Job penas i menshenge, te beshenn pen le ap i phub. Un job las kol efta mare, parkras pes pash o Debleste, un phagas len an kotja. Un job das len peskre malende, te denn le len i menshende. Un jon kran kowa.

⁷Un len his ninna tikne matche. Un o Jesus parkras pes pash o Debleste un das len peskre malende, te denn le kolen ninna i menshende te chal.

⁸Un jon chan un wan tchalo. Koi his nai star serja menshe. Un pal o chapen hadan le kol kotja maro pre, hoi pral atchan. Kolla his efta marengre gone pherdo. Palle mukas lo len khere te djal,

¹⁰djas peskre malentsa an o bero un was an ko them, kai Dalmanuta tchiddo hi.

¹¹Un i Farisarja wan win pash leste, te rakrenn le leha. Jon kaman te taprenn le les leskre labentsa un penan ap leste: “Kre menge i baro koowa, hoi sikrell men, te well tiri soor o Deblestar!”

¹²Job las i baro ducho un penas: “Hoske kamenn kol menshe, kai djiwenna kau diwes, i baro Debleskro koowa te dikell? Me penau tumenge o tchatchepen: Jon dikenna kek sawo koowa.”

¹³Un job mukas len, djas pale an o bero, un uleras wergel.

¹⁴Un o Jesuseskre mala bistran, te lenn le maro lentsa. Len his jek maro kokres an o bero.

¹⁵Un o Jesus penas soreles ap lende: “Denn jak! O shutlo jarro hi gar mishto, hoi well i Farisarendar un o Herodestar!”

¹⁶Har jon kowa shunan, penan le penge: “Mer lam kek maro. Doleske penas lo kowa menge.”

¹⁷Un o Jesus haiwas kowa, un penas ap lende: “Hoske rakrenn tumer pral kowa, kai hi tumen kek maro? Dikenn un haiwenn tumer gomme gar? Hi tumen i dji har i bar an tumende?

¹⁸Tumen hi jaka, un dikenn tchi. Un tumen hi kanna, un shunenn tchi. Djinenn tumer buder gar,

¹⁹har me kol pantch mare phagom, un kol pantch serja menshende dom? Kitse marengre gone pherdo kotja, hoi pral atchan, hadan tumer pre?” Penan le: “Deesh-te-dui.”

²⁰Penas lo: “Un har me phagom kol efta mare kol star serja menshenge? Kitse marengre gone pherdo kotja, hoi pral atchan, hadan tumer kote pre?” Penan le: “Efta.”

²¹Un job penas ap lende: “Haiwenn tumer gomme gar?”

²²O Jesus un peskre mala wan an o gab Betsaida. Koi anan le i murshes pash leste, kai dikas nai gar. Un jon mangan o Jesusestar, te tchiwell lo peskro wast ap leste.

²³Un job las koles, kai dikas nai gar, pash o wast, un anas les win glan o gab. Palle tchiwas lo tchunger ap leskre jaka, tchiwas peskre wasta ap leste, un putchas lestar: “Dikeh tu tchomone?”

²⁴Un job dikas pre un penas: “Me dikau i menshen, har te wenn le ruka, kai nashenn trujel.”

²⁵Pale tchiwas o Jesus peskre wasta ap leskre jaka. Un kau kopo dikas ko mursh pre un his sasto. Job dikas lauter mishto.

²⁶Un o Jesus bitchras les khere un penas: “Ma dja dren an o gab!”

²⁷Un o Jesus djas peskre malentsa dureder un was an kol gaba pash o foro Cesarea Filipi. Ap o drom putchas lo peskre malendar: “Hoi penenn i menshe, koon me hom?”

²⁸Un jon penan ap leste: “Hi menshe koi, kai penenn, tu hal o Johanni, kowa, kai taufras i menshen. Wawar penenna, tu hal o Elija. Un pale wawar penenna, tu hal i Debleskro rakepaskro, kai glan i rah tsiro djiwas.”

²⁹Koi putchas lo lendar: “Un tumer, hoi penenn tumer, koon me hom?” Koi penas o Petro ap leste: “Tu hal o Kristo, kolestar o Dewel penas, te well job.[30]”

³⁰Un job das len trad, te penenn le kowa kekeske.

³¹Un o Jesus penas peskre malenge: “O Menshengro Tchawo hunte lell bud duka ap peste. Un i biboldengre phureder un tchatchepangre un i bare rashaja tchiwenn les ap i rig.[31] Un job hunte well maredo. Un pal triin diwessa stell lo pale i mulendar pre.”

³²Un kowa lauter penas lo lenge, un rikras tchi pale. Koi las les o Petro ap i rig, un tchingras ap leste.

³³Un o Jesus rissras pes trujel, dikas ap peskre malende, un das o Petres trad un penas: “Dja tuke, tu beng! Tu kameh gar, hoi o Dewel kamella, na-a, tu kameh, hoi i menshe kamenna.”

³⁴Palle das o Jesus kol bud menshen pash peste gole, ninna peskre malen, un penas ap lende: Koon ap miro drom mantsa djala, kowa hunte bistrell, hoi leske kokres mishto hi, un lell peskro trushel ap peste,[32] un djal mantsa.

³⁵Koon kamell peskro djipen te rikrell, kowa nashrell les. Koon ap miro drom mantsa djala un i menshenge miro lab penella, un well doleske mulo dino, kowa lell o djipen pale.

³⁶I mensheske wals kowa gar mishto, te lals lo o tselo brawlepen ap kai phub, un nashrals peskro djipen.

³⁷I mensho nai dell tchi o Debleste, te lell lo ko djipen pale.

³⁸I menshe an kau tsiro hi tchilatcho un mukan o Debles. Kowa, kai ladjell pes mange un mire labenge glan kolende, koleske ladjau me ninna, te wau me, o Menshengro Tchawo, pale ap i phub. Ap ko diwes hi man o railepen, hoi das man miro dad an o bolepen. Un mantsa wenna o Debleskre bolepangre.