Read O Debleskro Drom - I Bibla an o Romano Rakepen 2021 Marko 9 Bible Online

Marko 9 - O Debleskro Drom - I Bibla an o Romano Rakepen 2021 bible

Marko 9

¹Un o Jesus penas ap lende: “Tchatchepah, me penau tumenge: Mashkral tumende hi sawe menshe, kai merenna gar, bis te dikan le, kai was kowa bari sorjah, kones o Dewel win rodas, te well lo baro rai.”

²Un pal shob diwessa las o Jesus o Petres peha, ninna o Jakobes un o Johannes, un anas len ap i bari berga. Kek wawar djas lentsa. Un glan lengre jaka las lo i bolepaskro railepen.

³Un leskre koola wan railes bijalo, jaake bijalo, har kek ap i phub nai thowell len bijalo.

⁴Un ap jek kopo dikan le o Elijas un o Moses, kai rakran o Jesuseha.

⁵Un o Petro penas ap o Jesuseste: “Rai, hi mishto, te ham kate. Muk men triin tikne khera te krell, jek tuke, jek o Moseske, un jek o Elijeske.”

⁶Job djinas gar, hoi rakrell lo koi. I bari traash tapran len.

⁷Koi was i wolka pral lende tele. Un jon shunan i rakepen dran i wolka: “Kawa hi miro tchawo, koles kamau o djijestar. Shunenn ap leste!”

⁸Un ap jek kopo, har jon trul pende dikan, dikan le buder kekes har o Jesuses kokres.

⁹Har jon pale i berga tele djan, penas o Jesus lenge soreles, te penenn le kekeske, hoi jon dikan, jaake rah har o Menshengro Tchawo gar i mulendar pre stas.

¹⁰Un jon rikran ko lab pash pende un putchan mank pende jek o wawarestar: “Hoi hi kowa, te penell job, kai stell lo i mulendar pre?”

¹¹Un jon putchan lestar: “Hoske penenn mare tchatchepangre, kai glan ko tsiro hunte well o Elija?”

¹²Koi penas lo ap lende: “Tchatchepah, o Elija well un anell o Debleskre menshen pale khetne. Hoske hi tchinlo pral o Menshengro Tchaweste, kai hunte wenn bud duka ap leste un kai i menshe rikrenn tchi lestar?[33]

¹³Me penau tumenge: O Elija was, un jon kran leha, hoi jon kaman, jaake har lestar tchinlo hi.”

¹⁴Un jon wan pash pengre wawar malende, un dikan bud menshen trul lende, ninna biboldengre tchatchepangre, kai rakran lentsa.

¹⁵Un har kol bud menshe o Jesuses dikan, kran le bare jaka. Jon nashan pash leste un penan: “Latcho diwes!”

¹⁶Un o Jesus putchas lendar: “Hoi rakrenn tumer lentsa?”

¹⁷Koi penas jek kolendar, kai kote tardo hi, ap leste: “Rai, me anom miro tchawes kate pash tute. Koles hi i beng an leste. Kowa krella, kai rakrell lo nashte gar.

¹⁸Un te taprell lo les, witsrell lo les ap i phub. Un les hi tchunger glan o mui, un dandrell i danda khetne, un well har mulo. Un me rakrom tire malentsa, te tradenn le o benges lestar win, un jon haiwan les gar.”

¹⁹Koi penas o Jesus ap lende: “Hawe menshe han tumer, kai hi tumen kek patsepen! Har rah hunte atchap pash tumende? Har rah rikrap me pash tumende win? Anenn les kate pash mande!”

²⁰Un jon anan o tchawes pash leste. Har dikas o beng o Jesuses, tserdas lo o tchawes kai te koi. Un o tchawo peras ap i phub, rissras pes trujel ap haki rig. Un i tchunger his glan leskro mui.

²¹Koi putchas o Jesus o tchaweskro dadestar: “Har rah hi les kowa?” Kowa penas: “Jaake rah, har job djiwella.

²²Bud kope witsras lo les an i jag un an o pani, te marell lo les. Tu te haiweh tchomone, palle ab menge latches un kre les sasto!”

²³O Jesus penas ap leste: “Tu peneh: Te haiweh tu! Me penau tuke: Lauter djal koleske, kai patsella.”

²⁴Koi das o tchaweskro dad gole: “Me patsau. Miro patsepen hi gar baro. Kre, te patsap budeder!”

²⁵Un o Jesus dikas, kai nashan bud menshe pash leste khetne. Koi das lo ko benges trad, un penas ap leste: “Tu beng, kai rakreh un shuneh nashte gar, me penau tuke: Dja win lestar, un dja buder gar an leste dren!”

²⁶Koi das job gole, un tserdas les soreles kai te koi, un djas lestar win. Un ko tchawo his kote tchiddo, har te well lo mulo. Koi penan kol menshe, kai kote tardo hi: “Job meras.”

²⁷O Jesus tapras les pash o wast, un mukas les pre te stell. Un job stas pre.

²⁸Har o Jesus khere was, un jon kokres his, putchan leskre mala lestar: “Hoske tradam mer ko benges nashte gar win?”

²⁹Un job penas: “Tumer hunte mangenn kowa o Deblestar. Te mangenn lestar gar, nai tradenn tumer sawe bengen gar win dran i menshende.”

³⁰Un jon djan dureder, un djan an o them Galilea. Un o Jesus kamas gar, te djinell jek, kai jon hi.

³¹Un job penas peskre malenge: “O Menshengro Tchawo well an i menshengre wasta dino, un jon marenn les. Un ap o triinto diwes pal leskro merepen, stell job pale i mulendar pre.”

³²Un jon haiwan kol laba gar un trashan, te putchenn le lestar.

³³Un jon wan an o foro Kapernaum. Har o Jesus khere his, putchas lo lendar: “Hoi tchingran tumer ap o drom?”

³⁴Un jon penan tchi. His jaake, ap o drom rakran le mank pende, koon lendar o pralstuno hi.

³⁵Koi beshas lo pes, un das kol deesh-te-dujen gole, un penas ap lende: “Jek te kamell o pralstuno te well, hunte well kowa o tikneder lauterendar. Un job hunte budrell i wawarenge.”

³⁶Un job las i tikno tchawes pash o wast, anas les glan lende, las les an i mussi, un penas ap lende:

³⁷“Kowa, kai lell sawo tchawes pash peste pre an miro lab, kowa lell man pash peste pre. Un koon man pre lella, kowa lell o koles pre, kai bitchras man.”

³⁸Koi penas o Johanni ap leste: “Rai, mer dikam i murshes. Kowa tradas bengen win an tiro lab. Job his kek mendar. Doleske penam leske: Ma kre kowa buder gar!”

³⁹Penas o Jesus ap lende: Mukenn les! Kowa, kai sawo baro koowa krella an miro lab, kowa nai rakrell gar sik koi pal djungeles pral mande.

⁴⁰Koon krell menge gar tchilatcho koowa, kowa hi ap mari rig.

⁴¹Kowa hi o tchatchepen, hoi me tumenge penau: Koon dell tumen i tcharo pani te pijell, un krell kowa doleske, kai han mire mala, koles dell o Dewel ko latchepen pale, hoi job kras.

⁴²Kowa, kai anell jekes kal tiknendar, kai patsenn ap mande, miro dromestar tele, koleske wals feteder, te well leske i baro bar trul i meen pandlo, un te well lo witsedo an o baro pani.

⁴³Te kamell tiro wast, te kress o tchilatcho koowa, de les tele! Hi tuke feteder, te nashress tu jek wast, un djiweh hako tsiro pash o Debleste, har te djas tu dui wastentsa an o bengeskri jag, hoi hako tsireske chatchella.

⁴⁴

⁴⁵Te kamell tut tiro piro ap i tchilatcho drom te anell, de les tele! Hi tuke feteder, te nashress tu jek piro, un djiweh hako tsiro pash o Debleste, har te wess dui pirentsa an o bengeskri jag witsedo.

⁴⁶

⁴⁷Un te kamell tiro jak tchomone te dikell, hoi anell tut ap i tchilatcho drom, palle tchin les win! Hi tuke feteder, te nashress jek jak un djah pash o Debleste an o bolepen, har te wess dui jakentsa an o bengeskri jag witsedo,

⁴⁸kai i kirme gar merenna, un i jag gar win djala.

⁴⁹Hakeno, kai djal mantsa, hunte djiwell peskro tselo djipen o Debleske. Kowa hi jaake har pash i bakro, hoi o Debleske maredo un chatchedo wella. Kowa well tseles chatchedo. Un ap ko chapen, hoi anenn le o Debleske, hunte tchiwan le loon pre. Kowa sikrell: Ko chapen hi o Debleske.

⁵⁰O loon hi mishto. Te nashras o loon peskri soor, hi lo buder gar mishto. Un tu nai kreh buder tchi, te well lo pale londo. Djiwenn tumaro tselo djipen o Debleske[34], un tchingrenn tumen gar!