Read O Debleskro Drom - I Bibla an o Romano Rakepen 2021 Luka 1 Bible Online

Luka 1 - O Debleskro Drom - I Bibla an o Romano Rakepen 2021 bible

Luka 1

¹Latcho Theofilo, bud menshe tchinan an i liil, hoi o Dewel mashkral mende kras.

²Jon tchinan pre, hoi kolla penan, kai kote pashel his un kowa lauter dikan.

³Un me ninna putchom i menshendar har kowa lauter his, te djinap kowa lauter mishto. Doleske kamau tuke kowa jaake pre te tchinell, har kowa tchatchepah his.

⁴Jaake haiweh tu, kai lauter tchatcho hi, hoi penan le tuke.

⁵Ap kau tsiro, kai o Herodes o baro rai pral o them Judea his, djiwas i rashai. Kowa his jek kol rashajendar, kai kharan pen pal o rashai Abia. Leskro lab his Zachari. Un leskri romni kharas Elisabet. Joi hi o Aroneskre menshendar[1]

⁶O Zachari un i Elisabet his latcho an o Debleskre jaka. Un jon shunan ap o Debleste, un kran lauter, hoi an o Debleskro lab tchinlo his.

⁷Len his kek tchawe. Joi nai las kek. Un jon dui his phuro.

⁸His i tsiro, kai budran kol rashaja an o Debleskro baro kheer, kolendar o Zachari jek his. Un har pash lende jaake hi, rodan le les win, te djal job an o Debleskro baro kheer, te chatchrell lo kasht o Debleske, hoi shukar sungella.

⁹

¹⁰Un ap ko tsiro, har chatchras job ko kasht, hoi shukar sungella, his bud menshe win tardo, un mangan o Debles an.

¹¹Ap jek kopo his o Debleskro bolepaskro tardo ap i tchatchi rig pash o Debleskro sonakaskro bob,[2] kai o Zachari o kasht chatchrell.

¹²Har o Zachari les dikas, las lo traash lestar.

¹³Koi penas o bolepaskro ap leste: “Ma traash, Zachari! O Dewel shunas tut, har tu mangal lestar, te well tumen i ternepen. Tiri romni Elisabet lella i mursh tchawes. Un koles dess tu ko lab Johanni.

¹⁴Un tiro dji stella i bachtjatar. Un bud menshe wenna bachteles pral ko ternepen.

¹⁵Un job wella bares glan o Debleskre jaka. Mool un wawar sorelo pipen pijell job gar. Un har job gomme gar boldo hi, hi lo pherdo Debleskro Ducho.

¹⁶Un job anell bud menshen an Israel pash o Debleste.

¹⁷Un job hi pherdo Debleskri soor jaake har o Elija, un job krell i drom pre o Debleske. Un job krella, te lenn i dada pale i dji pengre tchawenge. Un kolla, kai shunan gar ap o Debleste, kolen anell job pale ap o tchatcho drom. Un jaake krell lo, te hi i menshen djia, kai pre hi lengro Debleske.”

¹⁸O Zachari penas ap o bolepaskro: “Har nai djinau me, kai tiro tchatcho hi? Me hom i phuro mursh. Un miri romni hi ninna phuro.”

¹⁹O bolepaskro penas ap leste: “Me hom o Gabrijel, un me hom glan o Debleste tardo. O Dewel bitchras man pash tute, te penap tuke kowa.

²⁰Ap o tchatcho tsiro well kowa jaake, har tuke penom. Tu patsal mire laba gar, un doleske lell o Dewel tiro rakepen jaake rah krik, bis te well ko diwes, kai kowa lauter wella.”

²¹Un i menshe dikan ap o wudar an o Debleskro baro kheer, un djinan gar, hoske o Zachari jaake rah an o Debleskro baro kheer atchella.

²²Un har job kote win was, nai rakras lo buder gar. Job hadas peskro wast, te sikrell lo lende, te nai rakrell job buder gar. Koi pre dikan i menshe, kai o Dewel rakras leha an o Debleskro baro kheer.

²³Un har kol diwessa trujel djan, kai job an o Debleskro baro kheer budras, djas lo khere.

²⁴Un palle was leskri romni Elisabet an wawar koowa, un khatras pes pantch tchon glan i menshengre jaka. Un joi penas:

²⁵“O Dewel dikas latches ap mande un kras, te well man i ternepen ap ko tsiro, har job kamas, un las miri ladj mandar krik.”

²⁶Ap ko tsiro har i Elisabet o shobto tchon[3] an wawar koowa his, bitchras o Dewel o bolepaskres,[4] o Gabrijeles, pash i terni tchate. Lakro lab his Maria. Joi djiwas an o foro Nazaret. Kowa hi i foro an o them Galilea. Un kolakro pirno kharas Josef. O Josef his o Davideskre menshendar.

²⁷

²⁸Un o Gabrijel was pash late an o kheer un penas: “Latcho diwes, Maria! O Dewel hi tuha! Job dikas latches ap tute.”

²⁹Joi tapras i daar, har job jaake rakras, un penas peske: “Hoi penell job koi?”

³⁰Un o bolepaskro penas ap late: “Ma traash, Maria! O Dewel hi tuke latcho.

³¹Shun, tu weh an wawar koowa, un leh i tchawes. Koles dess tu o lab Jesus.

³²Kowa well i baro rai. Job well kharedo Debleskro tchawo. Un o Dewel krell lestar i baro rai pral Israel, jaake har jek leskre phurendar, o David, o baro rai his.

³³Un job atchell baro rai pral o Jakobeskre menshende hako tsiro. Un les hi penepaske pral lauter un hakeneste. Kowa atchell jaake hako tsireske.”

³⁴Koi penas i Maria ap o bolepaskro: “Har djal kowa? Man hi kek mursh.”

³⁵O bolepaskro penas ap late: “O Debleskro Ducho un leskri soor well pral tute. Doleske well o ternepen o Deblestar un well Debleskro tchawo kharedo.

³⁶Shun, i Elisabet, kai tire menshendar hi, hi an wawar koowa an o shobto tchon[5]. Joi hi phuri un latar well penlo, kai lell li nai kek tchawe.

³⁷O Dewel nai krell halauter.”

³⁸Koi penas i Maria: “Me kamau o Debleske koi te well. Lauter te well jaake, har tu penal.” Koi djas job peske.

³⁹Pal i tikno tsiro djas i Maria jaake sik har djala an i foro an o pralstuno them Judea.

⁴⁰Un joi djas an o Zachareskro kheer, un penas: “Latcho diwes, Elisabet!”

⁴¹Har i Elisabet kowa shunas, stas o ternepen an late. Un i Elisabet was pherdo Debleskro Ducho,

⁴²un das bares gole: “Sharedi weh tu mashkral i tsele djuwjende, un sharedo well o ternepen an tute!

⁴³Har djal kowa, te well koi dai miro rajestar pash mande?

⁴⁴Har me tut shunom, stas o ternepen i bachtjatar an mande.

⁴⁵Bachteli hal tu! Tu patsal, te well kowa jaake, hoi o Dewel tuke penas.”

⁴⁶Un i Maria penas: “Me sharau mo Debles.

⁴⁷Un miro dji dell gole i bachtjatar pral mo Debleste. Job hi ap miri rig.

⁴⁸Me hom gar moldo, te dikas o Dewel jaake latches ap mande. Un kanna sharenn man i tsele menshe. Un lengre tchawe penenna mandar, kai o Dewel man bachteles kras.

⁴⁹Baro koowa kras job ap mande. Les hi i tseli soor, un leskro lab hi bareder har hako wawar lab.

⁵⁰Job kras peskro dji pre kol phurenge un kolengre tchawenge, lauterenge, kai shunenn ap leste, un darenn lestar.

⁵¹Un job hadas peskri soreli mussi, un tradas kolen krik, kai kran pen kokres bares.

⁵²Job las i soor i bare rajendar krik, te well len buder tchi penepaske, un hadas i tiknen, te wenn le baro.

⁵³Kolen, kai bok his, das job te chal. Un kol brawelen bitchras lo krik. Un jon nai lan tchi peha.

⁵⁴Un job bistras gar peskro budepaskres, o Israel, un kras peskro dji leske pre,

⁵⁵jaake har penas lo mare phurenge, o Abrahameske un leskre tchawenge, te well lo lenge latcho hako tsireske.”

⁵⁶I Maria atchas triin tchon pash i Elisabet. Un palle djas li khere.

⁵⁷Un ko tsiro was, kai las i Elisabet i ternepen. Un kowa his i tchawo.

⁵⁸Lakre menshe un kolla, kai djiwan trul late, shunan kowa, un wan bachteles lah pral ko baro latchepen, hoi o Dewel kras ap late.

⁵⁹Pal ochta diwessa wan le, te tchinenn le o ternepen ap o mass.[6] Un jon kaman les ko lab Zachari te dell, jaake har leskro dad kharella.

⁶⁰Leskri dai penas: “Na-a! Job hunte lell ko lab Johanni.”

⁶¹Penan le ap late: “Kek tire menshendar kharell jaake.”

⁶²Un jon sikran i wastentsa ap leskro dad, te penell kowa, har ko ternepen hunte kharell.

⁶³Un job kamas, te anenn le leske tchomone, kai nai tchinas job pre. Un job tchinas: “Job kharell Johanni.” Koi kran lauter bare jaka.

⁶⁴Ap jek kopo nai rakras o Zachari pale, un sharas o Debles.

⁶⁵Un i traash was ap lauterende, kai trul lende djiwan. Un i tsele menshe, hoi an o pralstuno them Judea djiwan, rakran pral kowa.

⁶⁶Un lauterenge djas kowa an o dji, kai kowa shunan. Un jon penan: “Hoi well dran kau ternepen?” Un lauter patsan, kai o Debleskri soor ap o tchaweste tchiddo hi.

⁶⁷Un leskro dad Zachari was pherdo Debleskro Ducho, un penas kolla laba, hoi o Dewel an leste tchiwas:

⁶⁸“Sharas o baro Debles! Job hi o Israeleskro Dewel! Job was pash mende, un las men dran mari bibacht win.

⁶⁹Job bitchras menge jek soreles, te lell job men dran o tchilatchepen win. Un kawa wella o Davideskre menshendar.

⁷⁰Glan i rah tsiro penan i Debleskre rakepangre,

⁷¹te lell men o Dewel dran i wasta kolendar win, kai kamenn men te marell, awa, te lell lo men dran i wasta kolendar win, kai men gar kamenna.

⁷²Les his i baro dji mare phurenge un bistras gar kowa, hoi job lentsa an o phuro tsiro win kras un peskro wast pre das.

⁷³Glan maro dadeste, o Abrahameste, das job pes sowel,

⁷⁴te lell lo men dran i tchilatche wasta win, te budrah nai leske, un trashah buder gar,

⁷⁵jaake te djiwas mer leske i djudjo un latcho djijeha jaake rah, har djiwah.

⁷⁶Un tu miro tchawo, tu weh ninna i Debleskro rakepaskro. Un tu djah glan o Debleste, un kreh leske i drom pre, te well lo nai pash i menshende.

⁷⁷Leskre menshende sikreh tu, har nai well lengri doosh krik lino, jaake te djan le gar nashedo.

⁷⁸Maro Debles hi i baro dji menge. Leskro kamlepen well pash mende. Kowa hi har o kham, hoi djal pre ap o bolepen,

⁷⁹un well diklo kolendar, kai hi len traash o merepastar. Kai bari momeli anell men ap o drom, kai wella o Debleskri bacht ap mende.”

⁸⁰O Johanni was baro, un haiwas hako diwes feteder, hoi o Dewel kamella. Un job djiwas an o mulo them jaake rah, bis te was ko diwes, kai job glan i menshende an Israel rakras.