Read O Debleskro Drom - I Bibla an o Romano Rakepen 2021 Luka 11 Bible Online

Luka 11 - O Debleskro Drom - I Bibla an o Romano Rakepen 2021 bible

Luka 11

¹Jek diwes, har o Jesus o Debleha rakras, penas jek peskre malendar ap leste: “Sike men, har te rakras o Debleha! Ninna o Johanni sikras peskre malende, har jon hunte rakrenn o Debleha.”

²Penas o Jesus ap peskre malende: “Te rakrenn o Debleha, penenn: Maro dad, tiro lab well sharedo. Te well ko tsiro sik, kai tu o rai hal pral i tseli phub!

³De men maro hako diwes!

⁴Un biste maro tchilatchepen, hoi mer kram! Un ninna mer bistrah o tchilatchepen, hoi i wawar ap mende kran. Ma muk men tiro dromestar tele te djal!”

⁵Un job penas ap lende: “Te hi jekes tumendar i maal, un kowa djal mashkral an i rati pash leste un penell: Kamlo maal, pats man triin mare!

⁶I maal mandar was pash mande. Un man hi tchi an o kheer, hoi nai dau les te chal.

⁷Penals lo ap leste: Tchawa, ma de kek sau gole! O wudar hi klidedo. Un mire tchawe un me hom an o tchiben. Me nai stau gar pre, te dap tut tchomone te chal.

⁸Me penau tumenge: Job stell pre un dell les jaake bud, har ko wawares hunte well. Kowa krell lo gar doleske, kai hi o wawar leskro maal. Kowa krell lo doleske, kai mangas les o wawar jaake bud un mukas gar tele.

⁹Doleske penau tumenge: Mangenn o Debles! Un o Dewel dell tumen! Rodenn les! Un tumer hatsenn les. Denn ap o wudar! Un o wudar well tumenge pre kerdo.

¹⁰Koon mangella, kowa lella. Koon rodella, kowa hatsella. Un koon ap o wudar della, koleske well pre kerdo.

¹¹Mashkral tumende hi kek mursh, kai dell peskro tchawes i sap, te mangas job lestar i matcho.

¹²Witar gar dell kek dad peskro tchawes i skorpiono, te mangas job lestar i jaro.

¹³Ninna te han tumer tchilatche menshe, denn tumer tumare tchawen latcho koowa. Har bud budeder dell tumaro dad an o bolepen peskro Ducho kolende, kai les mangenna.”

¹⁴His i diwes, koi tradas o Jesus i benges win dran i mursheste, kai nai rakras gar. Har ko beng dran leste win djas, nai rakras ko mursh pale. Un kol bud menshe, kai trul lende tardo his, kran bare jaka.

¹⁵Mashkral lende his sawe, kai penan: “O pralstuno beng das les koi soor. Doleske nai tradell job kol bengen win.”

¹⁶Wawar kaman lestar i baro Debleskro koowa te dikell, te sikrell lo, kai o Dewel les bitchras.

¹⁷O Jesus djinas, hoi an lengro shero trujel djala, un penas ap lende: “Te kurenn pen i bare raja an jek them, palle djal ko them paash, un i tsele khera perenn khetne.

¹⁸Te tradell o beng i wawar benges win, djal leskri soor paash. Tumer penan mange, kai me tradau i bengen dran o bengeskri soor win.

¹⁹Putchau tumendar: Me te tradau i bengen dran o bengeskri soor win, har nai tradenn tumare menshe len win? Well i diwes, kai jon penenn tumenge, kai kowa gar tchatcho hi, hoi tumer pral mande rakran.

²⁰Na-a, me tradau i bengen dran o Debleskri soor win. Ap kowa dikenn tumer, kai ko tsiro was, kai o Dewel i menshen dran o tchilatchepen win lella, un leskri soor mank tumende hi.

²¹Te dell i sorelo mursh garda ap peskro baro kheer, un les hi i charo an o wast, nai tchorell leske i wawar tchi.

²²Jek te well, kai hi sorleder har job, un dell les khetne, palle lell lo leskro charo krik, hoi leskri soor his un lell kowa, hoi ko wawar tchoras un dell les ninna i wawarende.

²³Koon hi gar ap miri rig, kowa hi ap ko wawareskri rig. Un koon anell gar mantsa i menshen pash o Debleste, kowa tradell len o Deblestar.”

²⁴“Te djas i beng dran i mensheste win, nashell job an i them trujel, kai kek djipen hi, un rodell peske, kai atchell job nai. Job te hatsell tchi, penell lo ap peste: Me kamau pale an miro kheer te djal, dran hoi me win djom.

²⁵Un te well lo pale, hi ko kheer djudjo un shukar.[33]

²⁶Koi rodell lo peske wawar efta bengen, kai hi tchilatcheder har job. Un kol benga djan an ko mensheste dren, un djiwenn an leste. Jaake hi ko mensheha djungleder har glan ko tsiro.”

²⁷Bud menshe his trul o Jesuseste tardo. Un har job kowa penas, das i djuwel gole: “Bachteli hi koi dai, kolatar tu boldo wal!”

²⁸Koi penas lo: “Bachtele hi kolla, kai ap o Debleskro lab shunenna, un kowa ninna krenna, hoi o Dewel penella.”

²⁹Un budeder menshe wan pash leste, un his trul leste tardo. Un job penas: “Har tchilatcho hi kol menshe, kai djiwenn an kau tsiro! Jon kamenn i baro Debleskro koowa te dikell. Un o Dewel sikrell len tchi wawar har kowa, hoi i menshe ninna ap o Debleskro rakepaskro, o Jona, dikan.

³⁰Jaake har i menshe an o foro Ninive dikan, te was o Jona bitchedo o Deblestar, jaake dikenna i menshe an kau tsiro, te was o Menshengro Tchawo o Deblestar bitchedo.

³¹Ap ko diwes, kai rakrell o Dewel o tchatchepen win pral i tsele menshende, stella ninna i bari rani[34] dran o foro Saba pre. Un joi penella, te hi kol menshe tchilatcho, kai kanna djiwenna. Glan i rah tsiro was joi dran i dur them, un was pash o baro rai Salomo, te shunell li leskre gosewe laba. Kawa, kai glan tumende tardo hi, kawa hi bareder har o baro rai Salomo.

³²Ap ko tsiro, kai rakrell o Dewel o tchatchepen win pral i tsele menshende ap i phub, stenna ninna i menshe dran o foro Ninive pre. Un jon penenna, te hi kal menshe, kai kanna djiwenna, tchilatcho. Glan rah tsiro penas o Debleskro rakepaskro, o Jona, i menshenge an o foro Ninive o Debleskro lab. Un jon mukan pengro tchilatcho drom, un djan ap o Debleskro drom. Kawa, kai glan tumende tardo hi, kawa hi bareder har o Jona.”

³³“Kek krell i momeli an, un khatrell lat, witar gar tchiwell lo lat tel i piri. Job tchiwell lat pral, te dikell nai hakeno, kai dren wella.

³⁴O mensheskro jak hi har i momeli an i kheer. Te dikeh kokres ap o Debleste, hi kowa jaake, har te chatchell koi momeli mishto. Te dikeh ap wawar koowa un gar ap o Debleste, hi kowa jaake, har te chatchell kek momeli an kau kheer.

³⁵Doleske penau tuke: De garda, te chatchell tiri momeli un djal gar win!

³⁶Te chatchell i momeli an o tselo kheer, un tchi atchella an o tamlepen[35], palle hi kowa jaake, har te dikenn le i momeli dran hake walja.”

³⁷Har o Jesus jaake rakras, was i Farisari pash leste un mangas lestar, te well job pash leste, te chal lo leha khetne. Un o Jesus djas leha an leskro kheer, un beshas pes tele, te chal lo.

³⁸Har ko Farisari dikas, te thowas o Jesus gar peskre wasta glan o chapen, har biboldengro koowa hi, kras job bare jaka.

³⁹Koi penas o Jesus ap leste: “Tumer Farisarja, tumer thowenn tumare khore un tchare wrijal. Un tumaro dji hi pherdo tchorepen un tchilatchepen.

⁴⁰Tumer haiwan tchi! O Dewel, kai kras o tselo menshes, kras ninna leskro dji.

⁴¹Denn i tchorwelende kowa, hoi tumen an tumare khore un tchare dren hi! Un tchi hi tumenge pale-tchiddo.

⁴²Tumer Farisarja, hoi tumer krenna, ko hi gar mishto. Tumer denna o Debleske o deshto kotar tumaro tselo senlepastar, hoi an tumari baar hi, un tumer bistrenn o tchatchepen un o Debleskro kamlepen. Kawa hunte krenn, un ko wawar mukenn gar!

⁴³Tumer Farisarja, hoi tumer krenna, ko hi gar mishto. Tumer kamenn ap i pralstune beshepangre an i biboldengri kangri te beshell. Un tumer kamenn, te penenn i menshe ap o drom: Latcho diwes, mo rai, ap tumende.

⁴⁴Tumer Farisarja, hoi tumer krenna, ko hi gar mishto. Tumer han har i handako, hoi tele an i phub hi. Un i menshe djan pral wergel, un djinenn gar, kai i mule koi paskedo hi.”

⁴⁵Koi penas i biboldengro tchatchepaskro: “Sikepaskro, te peneh tu kal laba, praasseh tu men ninna.”

⁴⁶Koi penas o Jesus: “Tumer tchatchepangre, tumer krenna, hoi gar mishto hi. Tumer krenn i menshenge o djipen pharo. Ko tselo koowa, hoi jon hunte rikrenn, hi har i pharo gono ap lengri phik. Un tumer rikrenn tumen gar ap kowa.

⁴⁷Tumer Farisarja, hoi tumer krenna, ko hi gar mishto. Tumer krenn shukar mulengre khera kolenge, kai his o Debleskre rakepangre. Kolen maran tumare phure.

⁴⁸Jaake penenn tumer: Awa, mer djinah, hoi mare phure kran. Kowa his mishto. Me penau tumenge: Jon maran o Debleskre rakepangren. Un tumer krenn kolenge i mulengre khera.

⁴⁹O Dewel djinas kowa. Doleske penas lo glan i rah tsiro: Me bitchrau mire rakepangren un mire bitchepangren pash lende. Un mashkral lende hi sawe mursha, kai wenn lendar maredo, un wawar wenn palla lino.

⁵⁰Doleske well i tseli bibacht ap kal menshende, kai kanna djiwenna. Jon un lengre phure maran i Debleskre rakepangren, jaake rah har i phub tardo hi.

⁵¹O Abel was maredo glan i tsele wawar menshende. Pal leste maran le wawar menshen pale te pale. Pal lauterende wawarende was o Zachari maredo. Kowa was maredo pash i sasterni chatchepaskri[36] an o Debleskro baro kheer. Tchatchepah, me penau tumenge: I tseli bibacht well ap kal menshende, kai kanna djiwenna.

⁵²Tumer tchatchepangre, hoi tumer krenna, ko hi gar mishto. Tumer lan o klidepaskro krik, hoi krell o wudar ap o Debleskro drom pre. Tumer djan gar ap ko drom. Un kolla, kai kamenn ap o Debleskro drom te djal, mukenn tumer gar koi pre.”

⁵³Un har o Jesus djas peske, lan les i tchatchepangre un i Farisarja chojedo palla, un putchan soreles lestar bud koowa.

⁵⁴Un jon dan jak ap hako lab lestar, te nai taprenn le les leskre labentsa.