Read O Debleskro Drom - I Bibla an o Romano Rakepen 2021 Luka 13 Bible Online

Luka 13 - O Debleskro Drom - I Bibla an o Romano Rakepen 2021 bible

Luka 13

¹An ko tsiro wan menshe pash o Jesuseste, un penan leske kol murshendar dran o them Galilea, kai an o Debleskro baro kheer viechen o Debleske maran. Un o Pilato maras kol menshen. Un o menshengro rat un o viechengro rat was lauter khetne.

²Koi penas o Jesus ap lende: “Un kanna putchenn tumer mandar: His kol menshe tchilatcheder har kol wawar an o them Galilea, kai wan jon jaake maredo?

³Na-a, penau me tumenge. Tumer te mukenn gar tumaro tchilatcho drom, un djan ap o Debleskro drom, palle wenna tumer lauter ninna jaake maredo.

⁴Hoi hi kol menshentsa, kai ko baro kheer an o gab Siloah ap lende peras un jon meran? Hi kol menshe tchilatcheder har kol wawar an o foro Jerusalem, kai koi djiwan?

⁵Na-a, penau me tumenge. Te mukenn tumer gar tumaro tchilatcho drom, un djan ap o Debleskro drom, palle wenna tumer lauter ninna jaake maredo.”

⁶Un o Jesus penas lenge laba, kai i khatedo tchatchepen dren hi. Un penas: “I murshes his i faigetikro ruk an peskro baar tardo. Un job was bud kope, un rodas faige ap ko ruk un hatsas kek.

⁷Koi penas job ap koleste, kai dell garda ap ko baar: Triin bersha wom me kanna kai, un rodom faige ap kau ruk, un hatsom kek. De les tele! Ko ruk hi tchitcheske kate tardo.

⁸Penas o wawar: Rai, muk les kau bersh tardo! Me hadau i phub trul koleste pre, un tchiwau grajengro ful trul leste, te well lo feteder.

⁹Un te hidjrell ko ruk an o wawar bersh faige, kowa hi mishto. Te hidjrell lo tchi, de les tele!”

¹⁰His i Debleskro diwes, koi his o Jesus an i biboldengri kangri un penas i menshenge o Debleskro lab.

¹¹Mank kol menshende his i djuwel, koja his deesh-te-ochta bersha nasselo. I beng, kai an late was, kras lat bango. Un joi nai hadas pes gar pre.

¹²Har o Jesus lat dikas, das job lat pash peste gole, un penas ap late: “Romnija, tu hal kanna sasto.”

¹³Un job tchiwas peskre wasta ap late. Koi hadas pes li pre, un sharas o Debles.

¹⁴Koi choiras pes ko pralstuno an i biboldengri kangri, kai o Jesus koi djuwjat ap o Debleskro diwes sasto kras. Un kowa penas ap i menshende: “Mer hunte budras shob diwessa. Awenn an kolla diwessa, te mukenn tumen sasto te krell, un gar ap o Debleskro diwes!”

¹⁵Penas o Jesus ap koleste: “Tumen hi dui djia! Tumer krenn har te krans kek budi ap o Debleskro diwes. Hakeno tumendar pandell peskri grumni un peskri esla tele, un anell len pash o pani ap o Debleskro diwes.

¹⁶Kate hi kai djuwel, kai patsell ap o Debleste jaake, har o Abraham kowa kras: Un joi his deesh-te-ochta bersha o bengestar pandlo. Hoske te well li gar ap o Debleskro diwes sasto kerdo?”

¹⁷Har job kowa penas, ladjan lauter, kai chojedo ap leste his. Un kol bud wawar, kai kote tardo hi, his bachtelo pral ko tselo railo koowa, hoi o Jesus kras.

¹⁸Koi penas o Jesus ap lende: “Me penau tumenge kanna, har kowa hi, te dell o Dewel i menshen pash peste gole, te djan le ap leskro drom.

¹⁹Kowa hi jaake: I mursh tchiwas i tikno senftikro djob an i phub. Un dran ko tikno djob was i baro ruk. Un i tchirkle djiwan ap leste.”

²⁰Un o Jesus penas pale: “Me penau tumenge kanna, har kowa hi, te dell o Dewel i menshen pash peste gole, te djan le ap leskro drom.

²¹Kowa hi jaake: I djuwel las i tikno kotar shutlo jarro, un tchiwas les mashkral an i baro tcharo parno jarro. Un ko tikno kotar shutlo jarro kras ko tselo jarro shutlo.”

²²Un o Jesus djas dureder ap ko drom, hoi djas an o foro Jerusalem. Un job was an i gaba un i forja, un sikras i menshende o Debleskro drom.

²³Un i mursh putchas lestar: “Rai, pen menge: Lell o Dewel bud menshen an o bolepen, te djiwenn le pash leste?”

²⁴Un o Jesus penas pale: “Krenn lauter, te djan an ko tikno wudar dren! Me penau tumenge: Bud kamenn an ko wudar dren te djal. Un haiwenn kowa gar.

²⁵Te stell o rai pral o kheer pre un krell o wudar pandlo, palle han tumer win tardo, un tumer denn gole: Rai, kre menge o wudar pre! Un ko rai penella: Me prindjrau tumen gar.

²⁶Koi penenn tumer: Mer cham un pijam tuha. Un tu penal menge o Debleskro lab ap i dromma an mare forja.

²⁷Koi penell job ap tumende: Me prindjrau tumen gar. Djan mandar, tumer tchilatche!

²⁸Te han tumer win tardo un dikenn, kai o Abraham, un o Isaak, un o Jakob, un kol tsele Debleskre rakepangre pash o Debleste an o bolepen hi, rowenn tumer. Un tumer dandrenn i danda i dukatar khetne.

²⁹Dran hako them wenna i menshe pash o Debleste an o bolepen khetne, un beshenn pen tele, te chan le.

³⁰Un bud, kai kanna palla tardo hi, kolla hi ap ko diwes glan tardo. Un bud, kai kanna glan tardo hi, kolla hi ap ko diwes palla tardo.”

³¹Ap kau tsiro har o Jesus kowa penas, wan Farisarja pash leste un penan: “Dja tuke! Khate tut! O Herodes kamell tut te marell.”

³²Koi penas o Jesus ap lende: “Djan un penenn ko tchilatcho mursheske: Kau diwes un taissar tradau i bengen win, un krau i menshen sasto. Un pal triin diwessa hi miro tselo koowa kerdo.

³³Kau diwes, taissar, un o diwes koi pre hunte djap miro drom, te wap an o foro Jerusalem. Kowa djal gar, te well i Debleskro rakepaskro win glan o foro Jerusalem maredo.”

³⁴“Tumer menshe an o foro Jerusalem! Tumer maran o Debleskre rakepangren, un dan kolen i barrentsa mulo, kai o Dewel pash tumende bitchras. Bud kope kamom tumen pash mande te lell, te dap garda ap tumende, har i kachni ap peskre ternende garda della, un lell len tel peskre phora. Un tumer kaman gar.

³⁵Doleske mukell o Dewel tumaro foro un dell buder gar garda ap leste. Un me penau tumenge: Tumer dikenn man jaake rah buder gar, bis te was ko tsiro, kai tumer penenna: Sharedo well kowa, kai hi o Deblestar bitchedo!”