Read O Debleskro Drom - I Bibla an o Romano Rakepen 2021 Luka 15 Bible Online

Luka 15 - O Debleskro Drom - I Bibla an o Romano Rakepen 2021 bible

Luka 15

¹His i diwes, kai wan bud bibolde pash o Jesuseste, kai lenn i biboldendar lowe i Remarjenge dren, un bud wawar, kai tchilatcho koowa kran un doleske pale-tchidde hi. Jon lauter kaman te shunenn le les.

²Kol Farisarja un i biboldengre tchatchepangre his chojemen pral o Jesuseste un penan: “Kau mursh lell i pale-tchidde pash peste pre, un chal lentsa.”

³Koi penas o Jesus lenge laba, kai i khatedo tchatchepen dren hi, un penas:

⁴“Te hi jekes tumendar sheel bakre, un jek lendar djal nashedo, palle mukell lo kol wawaren tardo, un rodell ko jekes jaake rah, te hatsell lo les.

⁵Un te hatsell lo koles, lell lo les ap i phik, un hi bachtelo.

⁶Un te well lo khere, penell lo peskre malenge un kol wawarenge, kai trul leste djiwenna: Awenn bachteles mantsa! Me hatsom ko bakres pale, kai his nashedo.”

⁷Palle penas o Jesus lenge: “Me penau tumenge: Pral ko jek tchilatcho, kai mukas peskro tchilatcho drom un djal ap o Debleskro drom, pral koleste hi bareder bacht an o bolepen, har pral kol wawarende, kai patsenna, te nai atchenn le ap pengro drom.”

⁸Te hi i djuwjat deesh rupene beme, un nashrell jek, krell li i momeli an, un rodell koi bema an o tselo kheer jaake rah, bis te hatsell li lat.

⁹Un te hatsell li koi rupeni bema, dell li peskre malen gole un kol wawaren, kai pash late djiwenna, un penella: Awenn bachtelo mantsa! Me hatsom miri rupeni bema, kai nashrom.

¹⁰Me penau tumenge ninna: O Debleskre bolepangre hi bachtelo pral jekeste, kai mukell peskro tchilatcho drom un djal ap o Debleskro drom.

¹¹Un o Jesus penas: I murshes his dui tchawe.

¹²Ko terneder penas ap peskro dadeste: De man kanna kowa, hoi me lau pal tiro merepen! Un o dad das hakenes peskro kotar.

¹³Pal i tikno tsiro las o terneder tchawo peskro tselo brawlepen, un djas an i wawar them, djiwas i shukar djipen, un das peskro tselo brawlepen win.

¹⁴Har les his buder tchi, was i bari bok pral o them un les his buder tchi te chal.

¹⁵Koi djas lo pash i hacho un rodas i budi. Kowa bitchras les pash i balende, te dell job garda ap lende.

¹⁶Les his bari bok un kamas ninna kowa te chal, hoi i bale chana. Kokres kowa kamas les kek te dell.

¹⁷Un job penas ap peste: Miro dades hi bud budepangre. Kolen hi bud te chal, un me merau kate i bokatar.

¹⁸Me kamau pash miro dadeste te djal, te penap: Tata, me krom i tchilatcho koowa, kai me djom tutar un o Deblestar krik.

¹⁹Me hom gar moldo, te atchap tiro tchawo. Le man pash tute pre, te wap tiro budepaskro!

²⁰Un job stas pre, un djas pash peskro dadeste pale. Har leskro dad les dural dikas, khaitas o tchawo les. Un o dad nashas pash leste, tapras les trujel, un tchumras les.

²¹Koi penas o tchawo ap leste: Tata, me krom i tchilatcho koowa, kai me djom tutar un o Deblestar krik. Un me hom gar moldo, te atchap tiro tchawo.

²²Koi penas o dad ap peskre budepangre: Anenn sik o feteder ripen, un riwenn kowa leske an! Denn les i gustri un denn les kircha!

²³Anenn i terni thulli grumni! Marenn lat, te chas un was bachtelo!

²⁴Tchatchepah, miro tchawo his mulo, un was djido. Job his nashedo un was pale. Un jon wan lauter bachtelo.

²⁵Ko phureder tchawo budras win ap i kotar phub. Har job khere djas un pash o kheer was, shunas lo bashepen un khelepen.

²⁶Un job das i budepaskres gole, un putchas lestar, hoi kote djas.

²⁷Kowa penas: Tiro phraal was sasto pale. Doleske maras tiro dad i terni thulli grumjat leske.

²⁸Kote was job chojedo, un kamas gar an o kheer te djal. Un leskro dad djas win, un mangas les, te well lo an o kheer dren.

²⁹Un ko tchawo penas ap peskro dadeste: Tu djineh, kai me bud bersha tuke budrom, un krom lauter, hoi tu mange penal. Mange maral tu kek bakro, te chap les mire malentsa, un te wap bachtelo.

³⁰Tiro tchawo, kai was kanna pale khere, kowa, kai das tire lowe win i lubjentsa, koleske maral i terni thulli grumni.

³¹Koi penas o dad ap leste: Miro tchawo, tu hal hako tsiro pash mande, un hoi miro hi, kowa hi ninna tiro.

³²Mer hunte was bachtelo. Tiro phraal his mulo un was djido. Job his nashedo un hatsas pale khere.