Read O Debleskro Drom - I Bibla an o Romano Rakepen 2021 Luka 16 Bible Online

Luka 16 - O Debleskro Drom - I Bibla an o Romano Rakepen 2021 bible

Luka 16

¹O Jesus penas ninna ap peskre malende: “His i brawelo mursh. Koles his i budepaskro, kai chochras les un das leskro brawlepen win. Har ko brawelo kowa shunas,

²mukas lo les gole te dell, un penas ap leste: Hoi shunom me pral tute? Sike mande kol lila, hoi dren tchinlo hi, har bud lowe tu dren lal! Tu nai deh buder gar ap miro brawlepen garda!

³Un ko budepaskro penas ap peste: Te nai budrau me buder gar miro rajeske, hoi te krap me kanna? Me nai budrau gar win ap i kotar phub. Un te hunte mangap, ladjau man.

⁴Me djinau kanna, hoi te krap, te lenn jon man pash pende pre ap ko diwes, kai hi man buder kek budi.

⁵Un job das kolen pash peste gole, kai hi sijaan pash peskro rajeste. Un jek pal o wawareste was pash leste. Un job putchas hakenestar: Har bud sijaan hi tut pash miro rajeste?

⁶Un te penas jek: Sheel khoro djet, palle penas lo ap leste: Le ko liil, kai tiro sijaan dren tardo hi. Tchin kanna: paash-sheel!

⁷Un te putchas lo i wawarestar: Har bud sijaan hi tut? Un kowa penas: Sheel gone djob. Palle penas lo ap koleste: Le ko liil, kai tiro sijaan dren tardo hi, un tchin kanna: ochta-deesh!

⁸Un ko rai sharas ko chocheno budepaskres doleske, kai his lo gosewo.” “Un kowa hi tchatcho”, penas o Jesus, “kol menshe, kai prindjrenn o Debles gar, djan gosweder trujel i wawar menshentsa har kolla, kai djan ap o Debleskro drom.

⁹Me penau tumenge: Tumare lowe atchenna gar. Denn len i tchorwelende, te wenn le tumare mala! Te hi kol lowe budeder tchi moldo, palle lenn le tumen kote an i khera dren, kai tumer hako tsiro nai atchenna.”

¹⁰“Koon an i tikno koowa lauter mishto krella, kowa krell ninna an i baro koowa lauter mishto. Koon i tikno koowa gar mishto krella, kowa krell ninna i baro koowa gar mishto.

¹¹Te djan tumer gar mishto trujel kol lowentsa, hoi gar atchenna, koon dell tumen nai ko brawlepen an o wast, hoi atchella?

¹²Te djan tumer wawar menshengro brawlepen gar mishto trujel, har nai dell tumen o Dewel kowa an tumare wasta, hoi kamell lo tumen te dell?

¹³Kek budepaskro budrell nai dui rajenge. Te wals kowa jaake, budrals lo ko jekeske mishto, un ko wawareske gar mishto. Ko jekes kamals job gar, ko wawares kamals job o djijestar. Tu nai budreh gar o Debleske un leh tiro brawlepen khetne!”

¹⁴Kol Farisarja shunan kowa lauter. Jon his pal i lowe, un jon san pral o Jesuseste.

¹⁵Koi penas o Jesus ap lende: “Glan i menshengre jaka kamenn tumer latcho te well. O Dewel prindjrell tumaro dji. Hoi pash i menshende bud molella, hi tchi moldo an o Debleskre jaka.

¹⁶An o phuro tsiro rikran pen i menshe ap kowa, hoi o Mose un i Debleskre rakepangre penan. Har was o Johanni, was o Debleskro newo tsiro. Kanna well i menshenge o latcho lab penlo, te dell o Dewel i menshen pash peste gole, te djiwenn le leha khetne an jek harmenatsjona. Un hakeno kamell sorjah jaake dren te well, har job kamella.

¹⁷O bolepen un i phub atchenna gar. Kowa, hoi o Mose un kol Debleskre rakepangre penan, atchella. Ninna o tikneder lab well gar krik lino.

¹⁸Koon peskri romjat mukella, un romedinerell i wawar djuwjat, kowa chochell peskri ersti romjat un anell doosh ap peste. Un kowa, kai romedinerell i mukli djuwjat, kowa anell doosh ap peste, te las lo i wawareskri romjat.”

¹⁹Un o Jesus penas pale: Koi his i brawelo mursh. Kowa his hako tsiro shukar un railes rido, un djiwas i shukar djipen.

²⁰Glan leskro wudar his i tchorwelo tchiddo, kai his nasselo ap peskro mass. Leskro lab hi Lazaro.

²¹Kowa mangas o brawelestar ko chapen, hoi peras tele ap i phub, te chal lo kowa. Un i djukle wan pash leste, un tcharan[38] leskro nasselo mass tele.

²²O diwes was, kai ko tchorwelo meras. Un i bolepangre anan les an o bolepen, te beshas lo pes pash o Abraham. I tsiro koi pre meras ninna ko brawelo, un las i shukar paskepen.

²³Har job kanna an o mulengro them his, wan bare duka ap leste. Un job dikas pre, un dikas o Abrahames dural, un o Lazaro his pash leste beshdo.

²⁴Koi das ko brawelo gole: Tata Abraham, kre tiro dji mange pre, un bitche o Lazares pash mande! Job hunte tchiwell peskro gushto an o pani, un tchiwell kowa ap miri tchip, te dukrell man kai jag gar!

²⁵Koi penas o Abraham: Tchawa, tuke djas hako tsiro an tiro djipen mishto. O Lazares his kek shukar djipen. Kanna hi job bachtelo un leske djal mishto. Un tut hi kanna bare duka.

²⁶Ninna hi mashkral mende i baro telstunepen[39], te nai well kek mendar pash tumende, un kek tumendar nai well pash mende.

²⁷Koi penas o brawelo: Me mangau tut, tata Abraham, bitche les an miro dadeskro kheer!

²⁸Man hi pantch phrala. Kolenge hunte penell job, har mange djala, te wenn jon gar koi, kai me hom, un bare duka lom.

²⁹Koi penas o Abraham: Len hi o Moseskre laba un kolla lila, hoi o Debleskre rakepangre tchinan. Ap kolende hunte shunenn jon!

³⁰Penas o brawelo: Na-a! Te wals jek i mulendar pash lende, palle mukans le pengro tchilatcho drom.

³¹Penas o Abraham: Te shunenn le gar ap o Mose un ap kol Debleskre rakepangre, shunenn le witar gar ap jekeste, kai stas i mulendar pre.