Read O Debleskro Drom - I Bibla an o Romano Rakepen 2021 Luka 17 Bible Online

Luka 17 - O Debleskro Drom - I Bibla an o Romano Rakepen 2021 bible

Luka 17

¹Un o Jesus penas ap peskre malende: “Tchatchepah, menshe wenna, kai kamenn tumen o Debleskro dromestar tele te anell. Bibacht ap koleste, kai kowa krella!

²Koleske wals feteder, te well leske i pharo bar trul i meen pandlo, un te well lo an o baro pani witsedo, te nai anell lo buder gar jekes kal tiknendar ap o tchilatcho drom.

³Denn jak ap tumende! Te krell tiro phraal tchilatcho koowa ap tute, pen leske, kai kowa gar mishto hi, hoi job kras! Te khaitell les ko tchilatcho koowa, hoi job ap tute kras, jaake ab buder gar chojedo ap leste!

⁴Te krell lo efta kope ap o diwes tchilatcho koowa ap tute, un te well lo efta kope pash tute un penella, kai les kowa khaitella, jaake ab buder gar chojedo ap leste!”

⁵Un kol deesh-te-dui bitchepangre penan ap o Jesuseste: “Kre maro patsepen soreles!”

⁶Koi penas o rai Jesus ap lende: “Te wals tumaro patsepen ninna tikno har i senftikro djob, nai penans tumer ap ko baro ruk: Witse tut an o pani! Un ko ruk shunals ap tumende.”

⁷“Shunenn, hoi me tumenge penaua: Kek tumendar penella ap peskro budepaskro, kai pal peskri budi ap o kotar them khere wella: Am, besh tut kate tele, cha un pi!

⁸Ko krenn tumer gar. Tumer penenn leske: Rib tut trujel un kre mange chapaske! An ko chapen pash mande! Palle nai chah un pijeh tu ninna.

⁹Parkrenn tumen pash leste koleske, hoi job kras? Na-a, ko krenn tumer gar.

¹⁰Jaake hi kowa ninna tumentsa. Te kran tumer lauter, hoi o Dewel tumenge penas, palle penenn: Mer ham tire budepangre. Mer kram, hoi hunte kram.”

¹¹Har o Jesus ap o drom an o foro Jerusalem his, djas lo mank i themma Samaria un Galilea.

¹²Un job djas an i gab. Un kote wan deesh nassele mursha pash leste. Kolen his i djungelo nasslepen, kai lengro mass tele merella[40]. Jon his lestar doha dur krik tardo,

¹³un dan gole: “Jesus, latcho rai, kre tiro dji menge pre!”

¹⁴Un o Jesus dikas len, un penas ap lende: “Djan pash o rashajeste, un sikrenn tumen glan leste!” [41] Un har jon djan, wan jon ap o drom sasto.

¹⁵Jek lendar, har job dikas, te hi lo sasto, djas lo pash o Jesuseste pale pale, un sharas o Debles o tselo djijeha.

¹⁶Job witsras pes glan o Jesuseskre pire tele, un parkras pes. Kowa his i Samaritari[42].

¹⁷Koi penas o Jesus: “Deesh wan sasto. Kai hi kol wawar enja?

¹⁸Hi kek wawar koi, kai was pale pale, te sharell lo o Debles har kau Samaritari?”

¹⁹Un job penas ap kol mursheste: “Ste pre, un dja khere! Tiro patsepen kras tut sasto.”

²⁰Un i Farisarja putchan o Jesusestar: “Kaana well ko tsiro, kai dikah, kai o Dewel o rai hi pral i tseli phub?” Koi penas lo: “Ko tsiro well gar jaake, te nai dikenn kowa.

²¹Ninna nai penell jek gar: Kanna hi ko tsiro kai.” Un o Jesus penas dureder: “Kote, kai i mensho kamell, te well o Dewel leskro rai, kote was ko tsiro.”

²²Un job penas ap peskre malende: “I tsiro wella, kai tumaro dji kamell o Menshengro Tchawes jek diwes te dikell. Un tumer dikenn les gar.

²³Un jon penenn ap tumende: Dikenn, kote hi lo! Dikenn, kate hi lo! Me penau tumenge: Djan gar kote! Patsenn gar, hoi kol menshe penenna!

²⁴Jaake har i Debleskri jag an o bolepen diklo hi, hoi djal jek rigjatar ap i wawar rig an o bolepen, jaake well o Menshengro Tchawo ap peskro diwes diklo.

²⁵Glan ko tsiro hunte lell lo bud duka ap peste. Un i menshe, kai kau diwes djiwenna, tchiwenn les ap i rig.

²⁶Ap ko tsiro, kai o Menshengro Tchawo pale wella, djiwenn i menshe jaake har an ko tsiro, kai o Noah djiwas.

²⁷Kol menshe chan, pijan, un romedineran, bis ap ko diwes, kai o Noah an o panjeskro kheer djas, un o baro pani was, un lauter tassan le.

²⁸O tsiro, kai o Menshengro Tchawo pale wella, hi ninna har o tsiro, kai o Lot djiwas. Jon chan, pijan, jon ginan, bikran, jon budran ap pengro kotar phub, un kran penge khera.

²⁹Ap ko diwes, kai o Lot dran o foro Sodom djas, was jag dran o bolepen, un lauter wan chatchedo.

³⁰Jaake djal kowa ninna ap ko diwes, kai o Menshengro Tchawo diklo wella.

³¹Koon ap ko diwes ap o kheer hi, un kones peskro koowa an o kheer hi, kowa hunte djal gar tele, te lell lo kowa. Un koon ap peskro kotar phub budrella, hunte djal gar buder khere.

³²Ma bistrenn o Loteskri romjat!

³³Koon kamell peskro djipen te rikrell, kowa nashrell les. Koon peskro djipen nashrella, kowa lell les pale.

³⁴Me penau tumenge: Te hi an koi rati dui menshe an o tchiben tchiddo, well ko jek krik lino, ko wawar atchell koi.

³⁵Dui djuwja krenn dran djob jarro. Koi jek well krik lino, koi wawar atchell koi.

³⁶Dui budrenn ap i kotar phub. Ko jek well krik lino, ko wawar atchell koi.”

³⁷Leskre mala putchan lestar: “Rai, kai well kowa?” Penas lo: “Kote, kai i mulo mass tchiddo hi, kote wenn i bare diwje tchirkle khetne te chan le.”