Read O Debleskro Drom - I Bibla an o Romano Rakepen 2021 Luka 19 Bible Online

Luka 19 - O Debleskro Drom - I Bibla an o Romano Rakepen 2021 bible

Luka 19

²Kote his i biboldo, ko his i pralstuno pral kolende, kai lenna i biboldendar lowe i Remarjenge dren. Leskro lab his Zacheo.

³Job kamas o Jesuses te dikell, un nai dikas les gar. Job his tikno, un bud menshe his trul o Jesuseste.

⁴Doleske nashas lo glan i menshende, un djas ap i ruk, te dikell lo feteder.

⁵Un o Jesus was koi un dikas pre, un penas ap leste: “Zacheo, am sik koi tele! Kau diwes hunte wap me an tiro kheer.”

⁶Un o Zacheo was sik o rukestar tele, un las o Jesuses an peskro kheer dren, un his bachtelo.

⁷Har jon kowa dikan, his jon chojemen un penan: “Pash i pale-tchiddo djal job an o kheer.”

⁸O Zacheo his koi tardo un penas ap o Jesuseste: “Mo rai, me dau i tchorwelende i paash lauterestar, hoi man hi. Un te chochrom jekes, dau les kanna star kope jaake bud pale.”

⁹Penas o Jesus ap leste: “Kau diwes las o Dewel i menshen an kau kheer dran o tchilatchepen win. Ninna kawa rom hi o Abrahameskro tchawo.

¹⁰O Menshengro Tchawo was, te rodell lo kolen, kai nashedo hi, un te anell lo kolen ap o Debleskro drom, kai ap o tchilatcho drom hi.”

¹¹O Jesus his gar dur o forestar Jerusalem, un i menshe patsan, kai ko tsiro kanna kai hi, kai o Dewel sikrella, te hi lo o rai pral i tseli phub. Koi penas o Jesus lenge laba, kai i khatedo tchatchepen dren hi,

¹²un penas: “I pralstuno kamas te well lo baro rai pral peskro them. Doleske djas lo pash koleste, kai hi o wast pral bud themma, te krell kowa les baro rai. Un pal kowa kamas lo an peskro them pale te djal.

¹³Un job das deesh peskre budepangren gole, das hakeneste i sheel rupene beme, un penas: Budrenn kol lowentsa jaake rah har me gar kai hom. Un job djas peske.

¹⁴I menshe an peskro them his chojedo ap leste un bitchran murshen leske palla, te penenn le leske: Mer kamah gar, te wess tu baro rai pral mende!

¹⁵Ko mursh was baro rai, un was an peskro them pale. Koi das lo kol budepangren gole, kolen job kol lowe das. Un job kamas dikell, hoi jon kol lowentsa kran.

¹⁶I budepaskro was pash leste un penas: Mo rai, me budrom kol lowentsa, hoi tu man dal. Un kanna hi man deesh kope jaake bud.

¹⁷Penas lo ap koleste: Kowa kral tu mishto. Tu hal o latcho budepaskro. Me tchiwom i tikno koowa an tire wasta, un tu kral i bari budi koleha. Doleske kamau, te wess tu o pralstuno pral deesh forja.

¹⁸Ko duito was pash ko rajeste, un penas: Mo rai, me budrom kol lowentsa, hoi tu man dal. Un kanna hi man pantch kope jaake bud.

¹⁹Ap koleste penas lo ninna: Tu weh o pralstuno pral pantch forja.

²⁰Ko triinto was un penas: Mo rai, ake, tire sheel rupene beme. Me khatrom len an i diklo.

²¹Me darom tutar. Tut hi i dji dran bar. Tu leh, kai dal tchi. Un hoi i wawar ap i kotar phub tchiwas, leh tu lestar krik, te was kowa bares.

²²Ap koleste penas o rai: Tu moleh tchi. Tu hal i tchilatcho budepaskro. Tu djinal, kai hi man i dji dran bar, un kai lau, kai dom tchi, un hoi me gar an i phub tchiwom, te well kowa baro.

²³Hoske anal tu mire lowe gar pash kolende, kai i lowe win patsenna? Un te woms me pale, loms budeder lowe pale, har tu len dal.

²⁴Un job penas ap kolende, kai koi pashel tardo hi: Lenn kol sheel rupene beme lestar krik, un denn kol lowe koleste, kai hi les deesh kope budeder!

²⁵Un jon penan ap o rajeste: Rai, koles hi deesh kope jaake bud!

²⁶Koi penas o rai: Kones bud hi, kowa lell budeder. Un kowa, kai hi les gar bud, kolestar well kowa ninna krik lino.

²⁷Un job penas dureder: Anenn kolen glan mande, kai hi chojedo ap mande, un kai kaman gar, te wap baro rai pral lende, un denn len glan mire jaka temerl!”

²⁸Har o Jesus kowa penas, djas lo glan lende ap o drom, kai djal an o foro Jerusalem.

²⁹Un job was pash kol gaba Betfage un Betani. Kal gaba his ap koi berga tchiddo, hoi kharella djeteskri berga. Un job bitchras dui peskre malendar glan-wi un penas lenge:

³⁰“Djan an o gab koi wergel. Kote hatsenn tumer i terni esla pandlo, ap koleste his gomme kek beshdo. Pandenn lat tele, un anenn lat pash mande!

³¹Un te putchell jek tumendar: Hoske pandenn lat tele? penenn leske: Hi maro rajeske, te beshell job ap late.”

³²Un kol dui djan an ko gab, un lauter his jaake, har o Jesus lenge penas.

³³Har jon koja terni esla tele pandan, putchas lendar ko mursh, koleske koi esla his: “Hoske pandenn tumer koi terni esla tele?”

³⁴Un jon penan leske: “Hi maro rajeske, te beshell job ap late.”

³⁵Koi anan jon koi esla pash o Jesuseste, un tchiwan pengre koola ap late. Un o Jesus beshas pes pral pre.

³⁶Ap o drom, har job an o foro Jerusalem klissas[49], tchiwan i menshe pengre koola ap o drom, te nashte klissas job pral wergel.

³⁷Har jon kote wan, kai djal o drom o djeteskri berga tele, dan leskre mala bari gole i bachtjatar, un sharan o Debles pral ko baro koowa, hoi job mashkral lende kras.

³⁸Un jon penan: “Sharas ko baro rajes, koles o Dewel bitchras. O Debleskri bacht well pash mende! Baro hi o Debleskro railepen an o bolepen!”

³⁹Koi his ninna Farisarja mashkral i menshende ap o drom. Kolla penan: “Rai, pen ap tire malende, te mukenn le tele!”

⁴⁰Penas o Jesus ap lende: “Me penau tumenge: Jon te rikrenn pengre muja, palle denn i barra gole.”

⁴¹Un har o Jesus pash o foro Jerusalem was, rowas lo pral i menshende an kau foro,

⁴²un penas: “Bachtelo wans tumer, te djinans tumer kau diwes, koon anell tumenge o Debleskri bacht! Tumer han korelo. Tumer dikenn les gar.

⁴³Ko bibachtelo diwes wella, kai lurde wenna dran i wawar themma. Jon tchiwenn bare barra trul tumaro foro, te wenn tumer buder gar win.

⁴⁴Un jon marenn tumare menshen, un denn tumare tchawen an ko foro mulo. Mo Dewel kamas tumen peskro latchepen te sikrell. Un tumer kaman gar te krenn tumaro dji leske pre. Doleske atchell kek bar ap ko wawar an kau foro.”

⁴⁵Un o Jesus djas an o Debleskro baro kheer un tradas kol bikepangren win,

⁴⁶un penas lenge: “An o Debleskro lab hi tchinlo: O Dewel penella: Miro kheer te well i kheer, kai sharenn man i menshe un mangenn man an. Tumer kran lestar i kheer, kai i menshe chochenna un randenna.”

⁴⁷Hako diwes djas o Jesus an o Debleskro baro kheer un sikras i menshende o Debleskro drom. I bare rashaja, i biboldengre tchatchepangre un i wawar pralstune rodan i drom, te marenn le les.

⁴⁸Jon djinan gar, har nai tapran le les. Bud menshe his trul leste, un kaman hako lab te shunell, hoi job penas.