Read O Debleskro Drom - I Bibla an o Romano Rakepen 2021 Luka 2 Bible Online

Luka 2 - O Debleskro Drom - I Bibla an o Romano Rakepen 2021 bible

Luka 2

¹Ap ko tsiro mukas o baro rai Augusto[7] an o foro Rom te penell: “Tchinenn i laba i tsele menshendar an mire themma pre!”

²Kowa his o ersto kopo, kai tchinan le i laba i tsele menshendar an i liil dren. Un kowa his ap ko tsiro, kai o Kwirinio o pralstuno his pral o them Syria.

³Un halauter djan an pengre forja un gaba, kai lengre phure boldo wan, te mukenn le pengre laba pre te tchinell.

⁴Un o Josef djas peskri pirnjah, i Maria, dran o foro Nazaret, hoi an o them Galilea tchiddo hi. Un jon djan an o foro Betlehem an o them Judea, te mukenn le kote pengre laba pre te tchinell. An ko foro his o baro rai David glan i rah tsiro boldo. Un o Josef his o Davideskre menshendar. I Maria his ap ko tsiro an wawar koowa.

⁵

⁶Har jon an kau foro wan, was i Mariake ko tsiro, te lell li o tchawes.

⁷Un lat was i tchawo. Un joi tchiwas pherne trul leste, un tchiwas les kote dren, kai o chapen i viechenge dren tchiddo wella. An i kertchima his lenge kek tchiben.

⁸Glan o foro Betlehem dan i bakrengre jak ap pengre bakre an koi rat.

⁹Ap jek kopo his glan lende o Debleskro bolepaskro[8] tardo. Un o Debleskro railepen his trul lende. Un i bari daar was ap lende.

¹⁰Un o bolepaskro penas ap lende: “Ma darenn! I bari bacht well ap tumende, un ap i tsele menshende.

¹¹Kau diwes was tumenge an o foro Betlehem kowa boldo, kai lell tumen dran o tchilatchepen win. Job hi ko baro rai, kolestar o Dewel penas, te well job[9].

¹²Un ap kowa dikenn tumer, koon o ternepen hi: Job hi pandlo an i pherne, un kote dren tchiddo, kai o chapen i viechenge dren tchiddo wella.”

¹³Ap jek kopo his pash ko bolepaskro bud wawar bolepangre. Un jon sharan o Debles, un penan:

¹⁴“Baro hi o Debleskro railepen an o bolepen! O Debleskri bacht well ap i phub. Job dikell latches ap i menshende.”

¹⁵Un palle djan i tsele Debleskre bolepangre pale an o bolepen. Un i bakrengre penan jek ap o wawareste: “Awenn, djas an o foro Betlehem, te dikas, hoi o Dewel menge penas!”

¹⁶Un i bakrengre nashan sik an o foro, un hatsan i Mariat un o Josefes. Un o ternepen his koi dren tchiddo, kai o chapen i viechenge dren tchiddo wella.

¹⁷Har jon kowa dikan, penan le lauterenge ko lab, hoi lenge o bolepaskro pral kau ternepen penas.

¹⁸Un lauter kran bare jaka, har jon shunan, hoi i bakrengre lenge penan.

¹⁹I Maria rikras kol tsele laba an peskro dji un mukas len an lakro shero trujel te djal.

²⁰Un i bakrengre djan pale pash pengre bakre. Un jon sharan o Debles o tselo djijestar pral kowa, hoi jon shunan un dikan. Lauter kowa his jaake, har o bolepaskro lenge penas.

²¹Har ochta diwessa trujel his, un o ternepen ap o mass tchinlo was, dan le les o lab Jesus. Kau lab penas o bolepaskro i Mariake, har joi gomme gar an wawar koowa his.

²²Star-deesh diwessa his i Maria pale-tchiddo, jaake har o Mose kowa an peskro liil tchinas.[10] Pal kowa anan o Josef un i Maria kol ternepas an o Debleskro baro kheer an o foro Jerusalem, te denn le les an o Debleskro wast.

²³An o Moseskre lila hi ninna tchinlo: O phureder tchawo, kai boldo wella, hi o Debleske.[11]

²⁴Un o Josef un i Maria anan dui parne tchirkle glan o Debleste, jaake har kowa an i Moseskre lila tchinlo hi, te well i djuwel pale erligo.[12]

²⁵Ap ko tsiro djiwas an o foro Jerusalem i mursh. Leskro lab his Simeon. Kowa patsas ap o Debleste, un djiwas jaake, har o Dewel kowa kamas. Un job dikas ap ko tsiro, kai lell o Dewel i bibacht i Israeleskre menshendar krik. O Simeon his pherdo Debleskro Ducho.

²⁶Un o Debleskro Ducho penas leske, te merell job gar, bis te dikas lo ko baro rajes, kolestar o Dewel penas, te well job.

²⁷Un ap ko diwes, kai anan o Josef un i Maria pengro tchawes, o Jesuses, an o Debleskro baro kheer, te denn le les an o Debleskro wast, har kowa pal o biboldengro tchatchepen jaake his, koi anas o Debleskro Ducho o Simeones ninna an o Debleskro baro kheer.

²⁸Un o Simeon las o tchawes ap i mussi, sharas o Debles, un penas:

²⁹“Miro Dewel, miro rai, kanna nai merau me an o latchepen, jaake har tu penal.

³⁰Me dikom koles, kai tu bitchral, te lell lo i menshen dran o tchilatchepen win.

³¹Un tu bitchral les i tsele menshenge ap i phub.

³²Job hi har i momeli, te sikrell lo kolen tiro drom, kai prindjrenn tut gar. Koleske sharenn jon i menshen an Israel.”

³³Un o Jesuseskro dad un leskri dai kran bare jaka pral kowa, hoi o Simeon pral pengro tchaweste Jesus penas.

³⁴Un o Simeon rakras o Debleskri bacht pral lende win un penas ap i Mariate: “Pral kau tchaweste choirenn pen bud menshe an o them Israel. Ap leste sikrell pes, koon djal ap o Debleskro drom, un koon perell o Debleskro dromestar tele.

³⁵Jaake well diklo, hoi bud menshenge an o shero trujel djala. Un tire duka, Maria, pral tiro tchaweste wenn jaake, har te dell jek i charo an tiro dji.”

³⁶An o foro Jerusalem djiwas i phuri Debleskri rakepaskretsa. Joi kharas Hanna. Lakro dad his o Penuel. Job hi kol menshendar, kai wenna pal o Asser. Efta bersha his i Hanna romedino.

³⁷Palle meras lakro rom. Un kanna his li ochta-deesh-te-star bersha phuro. Un joi his o tselo diwes un i tseli rati an o Debleskro baro kheer, te mangell li o Debles an. Un bud kope chas un pijas li tchi o Debleske.

³⁸Ap ko tsiro har i Maria un o Josef pengro tchaweha an o Debleskro baro kheer his, was li ninna kote pash lende. Un joi sharas o Debles o tselo djijeha pral ko tchaweste, un rakras kolestar ap lauterende, kai dikan ap ko tsiro, kai lell o Dewel i menshen an o foro Jerusalem dran o tchilatchepen win.

³⁹Un har i Maria un o Josef lauter jaake kran, har an o Debleskro lab tchinlo his, djan le pale an pengro foro Nazaret, hoi an o them Galilea hi.

⁴⁰Ko ternepen was baro un sorelo, un pherdo goswepen. Un hakeno dikas, kai o Dewel pash leste hi.

⁴¹Hako bersh, har wan kol bare diwessa, kai kharenna Passa, djan i Maria un o Josef an o foro Jerusalem. Un har o Jesus deesh-te-dui bersha phuro his, lan jon les peha.

⁴²

⁴³Har kol bare diwessa trujel his, un jon pale khere djan, atchas ko tchawo Jesus an o foro Jerusalem. Un leskro dad un leskri dai djinan kowa gar.

⁴⁴Jon patsan, kai job mashkral kol wawar menshende hi. Doleske rodan jon les jek diwes mashkral pengre menshende, un mashkral kol wawarende, kai his lentsa khetne ap o drom.

⁴⁵Un jon hatsan les gar. Koi djan jon pale an o foro Jerusalem, un rodan les kote.

⁴⁶Pal triin diwessa hatsan le les an o Debleskro baro kheer. Un job his beshdo mashkral i sikepangre. Un job shunas, hoi jon rakran, un job putchas bud lendar.

⁴⁷Lauter, hoi shunan, hoi job lenge penas, kran bare jaka, jaake gosewo his kau tchawo.

⁴⁸Un har leskro dad un leskri dai les kote dikan, atchas lenge o rakepen krik. Un leskri dai penas ap leste: “Tchawa, hoske kreh tu mentsa sawo koowa? Me un tiro dad, har rodam tut, hams i darjatar mulo.”

⁴⁹Koi penas lo ap lende: “Hoske rodan tumer man? Djinenn tumer gar, te krap me kowa, hoi miro dad mandar kamella?”

⁵⁰Jon haiwan gar, hoi job lenge kamas te penell.

⁵¹Palle djas lo lentsa pale an o foro Nazaret, un kras lauter, hoi jon penan leske. Leskri dai rikras kol tsele laba, hoi o Jesus penas, an peskro dji.

⁵²Job was gosweder un phureder. Un o Dewel un i menshe dikan latches ap leste.