Read O Debleskro Drom - I Bibla an o Romano Rakepen 2021 Luka 20 Bible Online

Luka 20 - O Debleskro Drom - I Bibla an o Romano Rakepen 2021 bible

Luka 20

¹His i diwes, kai penas o Jesus i menshenge o Debleskro lab an o Debleskro baro kheer. Un i bare rashaja un i biboldengre tchatchepangre un phureder wan pash leste,

²un penan ap leste: “Pen menge, koon penas tuke, te kress tu kowa lauter? Koon bitchras tut?”

³Penas lo: “Kanna kamau tumendar ninna tchomone te putchell pral o Johanni, kowa, kai i menshen taufras:

⁴Bitchras o Dewel o Johannes, te taufrell lo i menshen? Bitchran i menshe les? Penenn les mange!”

⁵Un jon tchingran mashkral pende un penan: “Te penah mer leske: O Dewel bitchras o Johannes, palle penell lo menge: Hoske patsan tumer les gar?

⁶Te penah mer leske: I menshe bitchran les, witsrenn le barrentsa ap mende, te marenn le men. Jon patsenn soreles, te hi lo i Debleskro rakepaskro.”

⁷Un jon penan o Jesuseske: “Mer djinah les gar.”

⁸Penas o Jesus lenge: “Jaake penau tumenge witar gar, koon man bitchras, te krap me kowa.”

⁹Un o Jesus penas i menshenge laba, kai i khatedo tchatchepen dren hi, un penas: “His i mursh. Koles his i kotar them. Kote tchiwas lo drakengre ruka an i phub, un patsas kau them ap i hachende, te budrenn le kote leske. Un job djas peske an i wawar them i rah tsireske.

¹⁰Har ko tsiro was, te anenn le i drake dren, bitchras job i budepaskres pash i hachende, te lell lo lendar kol drake, hoi leske hi. I hache dan les kek drake. Jon dan les dawa un bitchran les krik.

¹¹Koi bitchras ko mursh i wawar budepaskres pash lende. I hache dan les kek drake. Jon dan les ninna dawa, praassan les, un bitchran les krik.

¹²O mursh bitchras i triinto budepaskres. I hache dan les ninna ratlo, un witsran les win.

¹³Kanna penas o rai pral o drakengro them ap peste: Hoi krap? Me bitchrau miro tchawes, koles, kai me kamau o tselo djijeha. Koles witsrenn jon gar win.

¹⁴Har i hache les dikan, penan le mashkral pende: Kowa hi leskro tchawo, kai lauter lella pal peskro dadeskro merepen. Maras les, palle hi ko them maro!

¹⁵Un jon witsran les dran ko drakengro them win, un maran les. Hoi krell kanna ko rai pral ko drakengro them i hachentsa?

¹⁶Job wella, un marell kol hachen, un dell ko drakengro them i wawaren.” Har kolla kowa shunan, kai trul o Jesuseste tardo his, penan le: “Kowa wella gar jaake!”

¹⁷Un o Jesus dikas ap lende, un penas: “Hi tchinlo an o Debleskro lab: His i bar, kai i budepangre lestar penan: Kowa hi tchi moldo. Ko bar las o Dewel un tchiwas les jaake an o kheer, te rikrell lo ko tselo kheer khetne.[50]

¹⁸Koon ap kau bar perella, kowa merella. Ap koneste kau bar perella, koles dell ko bar khetne.”

¹⁹Un i biboldengre tchatchepangre un i bare rashaja haiwan, kai rakras o Jesus lendar. Un jon kaman te taprenn le les sik pal leskro rakepen, te tchiwenn le les an o stilepen. Jon trashan i menshendar. Doleske tapran le les gar.

²⁰Jon lan o Jesuses an o jak. Un jon bitchran murshen, kai kran, har te wans le latcho. Un kolla putchan bud koowa lestar, te dikenn le, hoi job penals, jaake te nai taprenn le les an leskro rakepen, un te nai denn le les an i Remarjengre wasta.

²¹Un jaake penan le ap leste: “Sikepaskro, mer djinah, te dareh tu kekestar. Un tu peneh o tchatchepen i menshenge an o mui. Un tu sikreh lende o Debleskro drom.

²²Pen menge: Hi mishto pal maro tchatchepen, te das mer o themeskre lowe o baro rajeste an o foro Rom?”

²³O Jesus djinas, kai jon gosewo hi, un job penas ap lende:

²⁴“Denn man i rupeni bema. Koneskro shero un lab hi ap kai bema?” Penan le: “O shero o baro rajestar an o foro Rom!”

²⁵Penas lo lenge: “Jaake denn leste, hoi leskro hi, un denn o Debleste, hoi leskro hi!”

²⁶Un kote glan i menshende nai tapran le les gar an leskro rakepen, un kran bare jaka pral kowa, hoi job penas, un djinan buder gar, hoi te penenn le.

²⁷Koi wan kol rashaja pash leste, kai ninna kharenna Sadduzarja. Kolla patsenn gar, kai o Dewel i mulen djido krella. Kolla putchan lestar:

²⁸“Sikepaskro, o Mose tchinas: Te merell tiro phraal, kai romedino hi, un les hi kek tchawe, palle romedineress tu leskri romjat, te well tiro phraleske i ternepen boldo.[51]

²⁹Koi his kanna efta phrala. Ko phureder romedineras i djuwjat. Un job meras, un les his kek tchawe.

³⁰Un ko duito romedineras lat un job meras. Un les his kek tchawe.

³¹Un ko triinto romedineras lat un meras. Un les his kek tchawe. Un kol wawar lauter, jek pal o wawar, romedineran lat ninna. Un jon meran lauter. Un lauteren his kek tchawe.

³²Pal lende meras ninna koi romni.

³³Kanna putchah mer tutar: Ap ko tsiro, kai krell o Dewel i mulen djido, koneskri romni hi li? Hake efta his lah romedino.”

³⁴Penas o Jesus lenge: “I menshe ap kai phub romedinerenna un mukenn pen te romedinerell.

³⁵Kol mulen, kai o Dewel djido krella, te djiwenn le pash leste, kolla romedinerenn buder gar un wenna gar romedino.

³⁶Jon merenn buder gar, un hi har i bolepangre. Jon stan i mulendar pre. Doleske hi le o Debleskre tchawe.

³⁷Ninna o Mose tchinas, kai o Dewel i mulen djido krella. Har o Mose glan o bur tardo his, hoi chatchas, penas lo ap o Debleste: Tu hal o Abrahameskro Dewel, un o Isaakeskro Dewel, un o Jakobeskro Dewel.

³⁸Un me penau tumenge: Job hi gar o Dewel kolenge, kai mulo hi. Job hi o Dewel kol djidenge. Kalla lauter djiwenn leske.”

³⁹Koi penan i biboldengre tchatchepangre: “Rai, kowa hi tchatcho, hoi tu penal.”

⁴⁰Un jon trashan, te putchenn le lestar budeder.

⁴¹Koi penas o Jesus ap lende: “Har nai penenn jon, kai o baro rai, kolestar o Dewel penas, te well lo, o Davideskro tchawo hi?

⁴²O David tchinas an peskre gilja: O Dewel penas ap miro rajeste: Besh tut ap miri tchatchi rig,

⁴³te tchiwap kolen tel tire pire, kai hi chojedo ap tute!

⁴⁴Kate penell o David Rai ap leste. Har well lo nai leskro tchawo?”

⁴⁵Har i tsele menshe shunan, hoi o Jesus rakras, penas job ap peskre malende:

⁴⁶“Denn jak! Kowa, hoi kol biboldengre tchatchepangre krenna, hi gar mishto. Len hi lengste koola ap lende, te sikrenn le, te hi le o Debleskre menshe. Te djan le an o foro, kamenn le, te penenn i menshe Latcho diwes, mo rai! ap lende. Ninna kamenn le ap i pralstune beshepangre te beshell an i biboldengri kangri un ap i feteder beshepangre pash i baro chapen.

⁴⁷Jon lenn i khera kol djuwjendar krik, kolengre romma mulo hi. Te mangenn le o Debles, palle rakrenn le leha i rah tsiro, te dikenn i menshe, har patslo jon hi. O Dewel rakrell i phagi pral lende win, un jon lenna i bareder phagi har i wawar.”