Read O Debleskro Drom - I Bibla an o Romano Rakepen 2021 Luka 21 Bible Online

Luka 21 - O Debleskro Drom - I Bibla an o Romano Rakepen 2021 bible

Luka 21

¹Un o Jesus dikas pre un dikas, har i brawele pengre lowe an i lowengri piri an o Debleskro baro kheer dren tchiwan.

²Un job dikas kote ninna i tchorweli romni, kai hi lat buder kek romes. Joi das dui tikne kotja lowe o Debleste.

³Koi penas o Jesus: “Me penau tumenge: Koi romni das budeder har kol tsele wawar, kai brawelo hi.

⁴Kol wawar dan lowe dran pengro brawlepen. Kai tchorweli romni das halauter, hoi lat hi djipaske.”

⁵Un i menshe, kai trul leste tardo his, penan: “Dik, o Debleskro baro kheer! Hawe shukar barra un kutch koowa jon o Debleske anan.” Koi penas o Jesus:

⁶“Ko tsiro wella, kai halauter, hoi tumer kate dikenna, paash djala. Kek bar atchell ap i wawareste.”

⁷Koi putchan jon lestar: “Sikepaskro, kaana[52] wella kowa? Har nai dikas mer, kai hi ko tsiro kai?”

⁸Penas lo: “Denn jak! Mukenn tumen kekestar o Debleskro dromestar tele te anell! Koi wenna bud mursha, kai penenna: Me hom o Kristo, ko baro rai, kolestar o Dewel penas, te well job! Un jon penenn ninna: O tsiro hi kai! Me penau tumenge: Ma nashenn lenge palla!

⁹An ko tsiro della bud baro kurepen, un i menshe hadenn pen pral pengre themeskre rajende. Ma trashenn! Ko hunte well jaake. Ko tsiro, kai i phub paash djala, well gar jaake sik.”

¹⁰Palle penas lo ap lende: “Ko tsiro wella, kai kurenn pen i pralstune pral bare themma wawar pralstunentsa. Un i menshe dran jek them marenn kolen an i wawar them.

¹¹Un kai te koi well i phub soreles trisslemen[53]. An bud themma hi i menshen gar doha te chal, un baro nasslepen well ap lende. Un jon dikenn i baro koowa ap o bolepen, hoi krell lenge bari daar.

¹²Glan ko tsiro, kai kowa lauter wella, lenn jon tumen palla, un taprenn tumen. Jon anenn tumen glan i tchatchepangre an i biboldengre kangria un witsrenn tumen an o stilepen. Tumer patsenn ap mande. Doleske anenn le tumen glan i bare rajende un glan i pralstunende, te rakrenn jon i phagi win pral tumende.

¹³Jon te krenn kowa lauter tumentsa, palle rakrenn nai mandar.

¹⁴Ma mukenn kowa an tumaro shero trujel te djal, hoi tumer hunte penenn kol rajenge!

¹⁵Me dau tumen ko goswepen, un penau tumenge, hoi tumer hunte penenn. Un palle djinenn le buder gar, hoi te penenn le.

¹⁶Un tumaro dad un tumari dai, tumare phrala un phenja, un tumare wawar menshe phukrenn ap tumende, ninna tumare mala. Un mank tumende hi sawe, kai wenn maredo.

¹⁷Hakeno hi chojedo ap tumende doleske, kai patsenn tumer ap mande.

¹⁸Tchatchepah, me penau tumenge: Kek bal ap tumaro shero djal nashedo.

¹⁹Atchenn soreles an o patsepen, un tumer lenn ko tchatcho djipen!”

²⁰“Te dikenn tumer, kai bud lurde trul o foro Jerusalem tardo hi, palle djinenn tumer, kai jon ko foro paash krenna.

²¹Palle hunte nashenn i tsele menshe dran o them Judea pral an i berge. Un koon an o foro hi, hunte djal jaake sik har djala dran win. Un koon win ap o them hi, hunte djal gar an o foro dren.

²²An kol diwessa well o Debleskri choli ap i menshende tele. Palle well lauter tchatcho, hoi an o Debleskro lab tchinlo hi.

²³Koi bibacht hi bari kol djuwjenge, kai hi an wawar koowa, ninna kolenge, kai hi len i ternepen. O Debleskri choli well pral i tsele menshende an kau them. Un len hi i pharo tsiro.

²⁴Bud wenna maredo o chareha. Wawar wenna pandlo un wenna an i wawar themma anlo. Un o foro Jerusalem well kol menshendar khetne stakedo, kai wenna dran wawar themma. Kowa djal jaake rah, har o Dewel mukell len kowa te krell.”

²⁵“Ap o kham un ap o moonto un ap i bolepangre momlia dikenn tumer baro koowa. Pral i menshende an bud themma well i bari traash, te dikenn le, har well o baro pani diwjo un hadell pes pral un dell bari gole.

²⁶I tsele menshe ap i phub hi paash-mulo i trashatar pral kowa, hoi lauter ap lende wella. I bolepaskri soor perell khetne.

²⁷Un palle dikenn i tsele menshe o Menshengro Tchawes, har well lo ap i wolka bari sorjah un railepen.

²⁸Te dikenn tumer, har kowa lauter wella, awenn soreles un trashenn gar! I tsiro hi palle koi, kai o Dewel lell tumen dran o tchilatchepen un dran o merepen win.”

²⁹Un o Jesus penas lenge sawe laba, kai i khatedo tchatchepen dren hi, un penas: “Dikenn ap o faigetikro ruk un ap i wawar ruka!

³⁰Te wenn i ruka senelo, palle djinenn tumer, te well sik o nijal.

³¹Jaake hi kowa ninna koleha, pral kowa rakrom. Te dikenn tumer, har kowa lauter wella, palle djinenn, te well ko tsiro sik, kai o Dewel peskre menshen dran o tchilatchepen win lella, un job o rai pral i tseli phub hi.

³²Tchatchepah, me penau tumenge: Kol menshe, kai an ko tsiro djiwenna, dikenn kowa lauter pengre jakentsa.

³³O bolepen un i phub atchenna gar. Mire laba atchenn hako tsiro.”

³⁴“Denn garda, te well tumaro dji gar pherdo phubjakro koowa, jaake te bistrenn o Debles! Pijenn tumen gar mato! Ma darenn tumaro djipaske! Denn jak, te well ko diwes gar ap jek kopo ap tumende jaake, te han tumer tapedo!

³⁵Djinenn! Ko diwes well pral lauterende, kai djiwenna ap i phub.

³⁶Denn jak hako tsiro! Mangenn o Deblestar, te wenn tumer sorelo an o patsepen tardo, un wenn mishto win dran ko tchilatcho tsiro, hoi wella! Jaake hunte trashenn tumer gar o Menshengro Tchawestar, te well lo pale.”

³⁷Hako diwes rakras o Jesus an o Debleskro baro kheer. I rati djas job pash koi berga, hoi kharella djeteskri berga, un atchas koi.

³⁸Taissarlake wan bud menshe an o Debleskro baro kheer, te shunenn jon, hoi o Jesus penella.