Read O Debleskro Drom - I Bibla an o Romano Rakepen 2021 Luka 22 Bible Online

Luka 22 - O Debleskro Drom - I Bibla an o Romano Rakepen 2021 bible

Luka 22

¹His glan kol diwessa, kai i bibolde kek maro chan, kai shutlo jarro dren hi. Kol diwessa kharenna Passa[54].

²Un i bare rashaja un i biboldengre tchatchepangre rodan i drom, har jon nai marenn o Jesuses. Jon kaman les gar glan kol bud menshende te taprell. Kolendar daran le.

³Koi djas o beng an o Judas Iskariot dren. Kowa his jek kol deesh-te-dujendar.

⁴O Judas djas pash kol bare rashajende un pash i pralstune lurdende, un rakras kolentsa, har job nai phukrell ap leste.

⁵Un jon his bachtelo pral kowa, un kaman les lowe te dell, te nai taprenn le o Jesuses.

⁶“Mishto” penas o Judas, un rodas i latcho tsiro, te dell lo les an lengre wasta, jaake te djinenn i menshe kowa gar.

⁷His an kol diwessa, kai i bibolde ko maro chana, kai kek shutlo jarro dren hi. Un ko diwes was, kai hunte marenn le i bakro hako khereske.

⁸Koi bitchras o Jesus o Petres un o Johannes an o foro Jerusalem, un penas: “Djan an ko foro un krenn o chapen menge!”

⁹Un jon putchan lestar: “Kai kameh tu, te kras o chapen?”

¹⁰Penas lo ap lende: “Shunenn, te wenn tumer an o foro, palle dikenn tumer i murshes. Kowa hidjrell i khoro pani. Djan koleste palla an ko kheer, kai job dren djala!

¹¹Kote penenn o rajeske an ko kheer: Maro sikepaskro putchell tutar: Kai hi koi isema,[55] kai nai chau me ko bakro mire malentsa?

¹²Un job sikrell tumende i bari isema, pral an ko kheer. Kote hi beshepangre tardo. Kote krenn o chapen!”

¹³Un jon djan kote, un hatsan lauter jaake, har o Jesus lenge penas. Un jon kran o chapen.

¹⁴Har ko tchatcho tsiro was, beshas job pes tele. Un kol deesh-te-dui bitchepangre beshan pen leha.

¹⁵Un job penas ap lende: “Kawa chapen kamom me o tselo djijestar te chap tumentsa glan ko tsiro, kai me hunte lap bud duka ap mande.

¹⁶Me penau tumenge: Me chau kau chapen buder gar jaake rah, bis te well ko tsiro, kai kowa tchatcho was, hoi kau chapen sikrella. Palle chau les tumentsa pash o Debleste an o bolepen.”

¹⁷Un o Jesus las o khoro, parkras pes pash o Debleste, un penas ap lende: “Ake, lenn un pijenn halauter kai mool!

¹⁸Me penau tumenge: Me pijau buder gar i mool jaake rah, bis te well ko diwes, kai hi o Dewel o rai pral halauter.”

¹⁹Un job las i kotar maro, parkras pes pash o Debleste, phagas ko maro, das kowa lende, un penas ap lende: “Ake, chan! Kau maro hi miro mass. Me dau man tumenge. Te hom buder gar koi, krenn kowa pale un pale, te well tumenge an tumaro shero, hoi me krom tumenge!”

²⁰Pal o chapen las lo o khoro un penas: “Kai mool an kau khoro hi miro rat, hoi tumenge ratau. Jaake krau i newo drom, kai o Dewel un i menshe mala wenna.”

²¹Palle penas o Jesus: “O phukepaskro hi mantsa ap kaja chapaskri beshdo.

²²Me, o Menshengro Tchawo, hunte merap. Ninna te hi mange glan diklo, te djap kau drom, hawi bibacht well ap koleste, kai ap mande phukrella!”

²³Un jek putchas i wawarestar: “Koon hi kowa mendar, kai krell kowa?”

²⁴Un o Jesuseskre mala tchingran pen, koon lendar o bareder hi.

²⁵Un o Jesus penas ap lende: “I bare rajen ap kai phub hi penepaske pral i menshende an pengre themma. Kolla hunte shunenn ap lende un hunte budrenn lenge. Un kol pralstune kamenn, te penenn i menshe lenge, har latche mursha jon hi.

²⁶Me penau tumenge: Ma krenn kowa jaake har kolla! O bareder mashkral tumende hunte well jaake har o tikneder tumendar. Un kowa, kai kamell o pralstuno te well, hunte well o telstuno, kai budrell i wawarenge.

²⁷Koon kol dujendar hi bareder: Kowa, kai pash i chapaskri beshdo hi? Kowa, kai tchiwell o chapen ap i chapaskri? Tchatchepah, kowa, kai pash i chapaskri beshdo hi! Un me hom mashkral tumende har jek, kai tumenge budrella.

²⁸Tumer rikran pash mande win an kol diwessa, har i menshe miro djipen phares kran.

²⁹Un me kamau, te wenn tumer mantsa khetne raja, jaake har miro dad an o bolepen kamella, te wap o baro rai pral i menshende.

³⁰Un tumer chana un pijenna mantsa kote, kai me o baro rai hom, un han beshdo ap rajeskre beshepangre, un penenn o tchatchepen win pral i tsele menshende, kai wenna o deesh-te-dui Israeleskre tchawendar.”

³¹“Simon, Simon, shun, hoi me tuke penau: O beng las tumen an o jak un kamas te dikell, har sorelo tumaro patsepen hi.

³²Me mangom tuke pash mo Debleste, te djas tu gar o Debleskro dromestar tele. Un te djah tu pale ap o tchatcho drom, kre tire phralen soreles an o patsepen!”

³³Penas o Petro: “Rai, me djoms tuha an o stilepen un an o merepen.”

³⁴Penas o Jesus ap leste: “Petro, me penau tuke, kai rati dell o bashno gar gole jaake rah, har tu gar triin kope penal, te prindjreh man gar.”

³⁵Un job penas ap peskre malende: “Har me tumen ap o drom bitchrom, his tumen kek lowe, witar kek gono un kek kircha pash tumende. His tumen bok? His tumen trush?” Penan le: “Na-a, gar jek kopo!”

³⁶Penas lo: “Kanna lenn lowe tumentsa! Lenn ninna i gono peha, kai tchiwenn tumer tumare koola dren! Un bikrenn tumari plaashka, te ginenn tumenge i charo!

³⁷Me penau tumenge: Hi tchinlo pral mande an o Debleskro lab: Jon penenn lestar, te hi lo jek lendar, kai tchilatcho hi.[56] Tchatchepah, lauter, hoi pral mande tchinlo was, wella tchatcho.”

³⁸Penan leskre mala ap leste: “Rai, kate hi dui chare.” Penas lo: “Kanna hi doha!”

³⁹Un o Jesus djas pash i djeteskri berga, jaake har job kowa bud kope kras. Un peskre mala djan leha.

⁴⁰Un har jon pash i djeteskri berga wan, penas lo ap lende: “Mangenn o Deblestar, te nai anell tumen tchi o Debleskro dromestar tele!”

⁴¹Un o Jesus kokres djas i tikno kotar dureder, un witsras pes ap i tchanga[57],

⁴²un mangas o Debles: “Tata, te kameh tu, muk kek duka ap mande te well! Kre gar, har me kamau. Kre jaake, har tu kameh!”

⁴³Un i Debleskro bolepaskro was pash leste dran o bolepen un das les soor.

⁴⁴Un o Jesus mangas o Debles sorleder, un rat nashas leskro sherestar tele ap i phub, jaake soreles was i daar ap leste.

⁴⁵Un palle stas lo pre un djas pash peskre malende. Jon wan khino un sowan, jaake bibachtelo hi le. Har job dikas, te sowan le,

⁴⁶penas lo ap lende: “Hoske sowenn tumer? Stenn pre un mangenn o Deblestar, te nai anell tumen tchi o Debleskro dromestar tele!”

⁴⁷Har o Jesus jaake rakras, koi wan bud menshe. Glan kol menshende djas o Judas. Kowa his jek o Jesuseskre deesh-te-dui malendar. Job djas pash o Jesuseste, un kamas les i tchum te dell.

⁴⁸O Jesus penas ap leste: “Judas, kameh tu ap o Menshengro Tchaweste phukrell un deh les i tchum?”

⁴⁹Har o Jesuseskre mala, kai trul leste tardo his, dikan, hoi koi djas, putchan jon lestar: “Rai, das mer i chareha ap lende pre?”

⁵⁰Un jek lendar las o charo, un das i klisteske o tchatcho kand tele. Kowa his i klisto, kai budrell o baro rashajeske.

⁵¹Koi penas o Jesus: “Muk tele! Kanna hi doha!” Un job tchiwas peskro wast ap o kand ko murshestar, un kras les sasto.

⁵²Un o Jesus penas ap i bare rashajende un ap i pralstunende pral o Debleskro baro kheer un ap i biboldengre phureder, kai pash leste wan: “Tumer wan charentsa un kashtentsa pash mande, har te woms i marepaskro.

⁵³Hako diwes homs pash tumende an o Debleskro baro kheer, un tumer tapran man gar. Kanna hi tumaro tsiro. Kanna hi o benges penepaske.”

⁵⁴Un jon pandan les un anan les an o baro rajeskro kheer. O Petro djas lenge palla, un atchas i kotar pal lende.

⁵⁵Pash ko kheer kran i lurde i jag, un beshan pen lauter khetne. Un o Petro beshas pes pash lende.

⁵⁶Un i budepaskretsa his pash i jag beshdo, dikas les un penas: “Kowa his ninna pash o Jesuseste.”

⁵⁷O Petro das buchoste un penas: “Romnija, me prindjrau les gar.”

⁵⁸I tikno tsiro koi pre dikas i wawar ap leste, un penas: “Tu hal ninna jek kolendar.” Un o Petro penas: “Romeha, me hom gar jek lendar.”

⁵⁹Un i tsiro koi pre penas pale i wawar: “Tchatchepah, ko mursh his ninna pash leste. Job hi dran o them Galilea.”

⁶⁰Koi penas o Petro: “Romeha, me djinau gar, hoi tu peneh.” Un har job kowa penas, das o bashno gole.

⁶¹Un o Jesus rissras pes trujel, un dikas o Petres an i jaka. Un o Petreske wan kolla laba an o shero, hoi o Jesus ap leste penas: “O bashno dell gar gole jaake rah, har tu gar triin kope penal, te prindjreh man gar.”

⁶²Un o Petro djas win, un rowas soreles.

⁶³Kol mursha, kai dan garda ap o Jesuseste, san pral leste, un dan les dawa.

⁶⁴Un jon pandan leskre jaka, un penan: “Pen menge, koon das tut!”

⁶⁵Un jon praassan les.

⁶⁶Un har o diwes was, mukan i biboldengre phureder, i bare rashaja un i tchatchepangre o Jesuses pash pende te anell.

⁶⁷Un penan ap leste: “Hal tu o Kristo, ko baro rai, kolestar o Dewel penas, te well job? Pen menge!” Penas lo: “Me te penau les tumenge, patsenn tumer man gar.

⁶⁸Un te putchau tumendar tchomone, penenn tumer tchi.

⁶⁹Ko tsiro well sik, kai me, o Menshengro Tchawo, hom beshdo ap i tchatchi rig o sorelo Deblestar.”

⁷⁰Penan jon: “Hal tu o Debleskro tchawo?” Penas job: “Awa, hi jaake har tumer penan. Me hom kowa.”

⁷¹Penan le mashkral pende: “Menge hi kanna doha. Mer shunam dran leskro mui, hoi job penas. Kek hunte penell menge budeder.”