Read O Debleskro Drom - I Bibla an o Romano Rakepen 2021 Luka 23 Bible Online

Luka 23 - O Debleskro Drom - I Bibla an o Romano Rakepen 2021 bible

Luka 23

¹Un lauter stan pre, un anan o Jesuses pash o Pilateste.

²Un jon anan bud koowa ap leste pre, un penan: “Kau mursh kras mare menshen diwjo. Job penas, te das mer o baro rajeste an o foro Rom buder kek lowe. Un job penas ninna, kai hi lo o Kristo, ko baro rai, kolestar o Dewel penas, te well job.”

³Koi putchas o Pilato lestar: “Hal tu o baro rai pral i biboldende?” Penas lo: “Awa, hi jaake har tu penal.”

⁴Koi penas o Pilato ap kol bare rashajende un ap kol wawar menshende, kai kote tardo hi: “Me hatsom kek doosh ap leste.”

⁵Jon mukan gar tele, te anenn le tchilatcho koowa ap o Jesuseste, un penan: “Job kras i menshen diwjo an o them Galilea, un an o tselo them Judea, un an o foro Jerusalem ninna.”

⁶Har o Pilato kowa shunas, putchas job: “Hi kau mursh dran o them Galilea?”

⁷Un har job shunas, kai o Jesus dran o them Galilea hi, kai o Herodes o baro rai hi, mukas lo o Jesuses pash koleste te anell. O Herodes his an ko tsiro ninna an o foro Jerusalem.

⁸Un o Herodes his bachtelo, har job o Jesuses dikas. Job shunas lestar un kamas les i rah tsiro te dikell. Job kamas, te krell o Jesus leske i baro koowa, hoi kek wawar nai krella.

⁹Kanna, har o Jesus glan leste tardo hi, putchas job o Jesusestar bud koowa. O Jesus penas tchi pale.

¹⁰I bare rashaja un i biboldengre tchatchepangre his koi pashel tardo, un anan bud tchilatcho koowa ap o Jesuseste.

¹¹Un o Herodes un leskre lurde san pral leste, riwan leske i rajeskri plaashka an, un mukan les pale pash o Pilateste te anell.

¹²Un ap ko diwes wan o Herodes un o Pilato mala. Glan ko diwes his jon chojedo jek ap i wawareste.

¹³O Pilato das i bare rashajen, i pralstune bibolden, un i tsele menshen khetne gole,

¹⁴un penas ap lende: “Tumer anan kau murshes pash mande, un penan mange, te krell lo i menshen diwjo. Me kamom lestar te shunell, hoi job koi pre penella, un hatsom kek doosh ap leste, hoi tumer ap leste pre anan.

¹⁵Un o Herodes hatsas witar kek doosh ap leste. Doleske bitchras job les pale pash mende. Un kanna shunenn, hoi me tumenge penau: Kawa mursh kras tchi, te hunte well lo maredo.

¹⁶Me mukau les dawa te dell, un mukau les te djal.”

¹⁷

¹⁸Koi dan i tsele menshe gole: “Mare les, un de men o Barabes!”

¹⁹O Barabas his i stildo. Job kras an o foro Jerusalem i baro tchingepen, un das i murshes temerl.

²⁰O Pilato kamas o Jesuses te djal mukell. Un job das gole, te kamell lo o Jesuses te djal mukell.

²¹I menshe dan pale gole: “De les ap o trushel! Ap o trushel leha!”

²²Un o Pilato putchas lendar o triinto kopo: “Hawo tchilatcho koowa kras job? Jaake har me kowa dikau, kras job tchi, te hunte well job maredo. Me dau les dawa, un mukau les te djal.”

²³Jon dan sorleder gole, te well lo ap o trushel dino. Un har jon gar tele mukan, shunas o Pilato ap lende un penas:

²⁴“Me krau, hoi tumer kamenna.” Un job penas i lurdenge, te denn le les ap o trushel, te merell lo kote.

²⁵Un o Pilato mukas koles dran o stilepen win te djal, kai kras i baro tchingepen an o foro un maras jekes. O Jesuses das job an lengre wasta.

²⁶Un har jon o Jesuses krik anan, te well job ap o trushel dino, tapran le i murshes ap o drom. Kowa budras win ap i kotar phub un his kanna ap o drom khere. Leskro lab hi Simon, un job his dran ko foro Kirene. Ap koleste tchiwan jon o trushel, te hidjrell lo kowa o Jesuseske palla.

²⁷Un bud mursha un djuwja djan o Jesuseske palla ap o drom. Kolla dan bari gole un rowan.

²⁸Un o Jesus rissras pes trujel un penas ap lende: “Djuwjale dran o foro Jerusalem, rowenn gar pral mande! Rowenn pral tumende un pral tumare tchawende!

²⁹Ko tsiro wella, kai i menshe penenna: Bachtele hi kol djuwja, kai lan kek ternepen.

³⁰Ap ko tsiro penenn le ap i berge: Perenn pral mende!

³¹Te krenn jon kawa i senelo kashteha, hoi krenn jon palle i phuro kashteha?”

³²Ninna dui tchilatche mursha wan o Jesuseha glan o foro anlo, te wenn le kote ap o trushel dino.

³³Har jon lauter ap ko kotar them wan, hoi kharella Muleskro Shero, dan jon o Jesuses ap o trushel, un kol dui tchilatche murshen ninna. Ko jekeskro trushel his tchatches lestar, ko wawareskro trushel his serwes lestar.

³⁴Koi penas o Jesus: “Miro dad, le i doosh kolendar krik, kai man ap o trushel dan! Jon djinenn gar, hoi jon kran.” Un i lurde khelan pral leskre koola, te dikenn le, hoi hakeno lella.

³⁵Un i menshe, kai koi pashel tardo his, dikan kowa lauter, hoi o Jesuseha djas. Kol pralstune bibolde, kai kote tardo hi, san pral leste, un penan: “Wawaren las job dran o merepen win. Te hi lo tchatchepah o Kristo, ko baro rai, kones o Dewel win rodas, te well lo pash mende, palle nai djals job o trushelestar tele.”

³⁶Un ninna kol lurde san pral leste, un dan les shutli mool te pijell.

³⁷Un jon penan ap leste: “Tu te hal o baro rai pral i biboldende, ab o trushelestar tele!”

³⁸Un pral leste ap i kasht his tchinlo: Kowa hi i o baro rai pral i biboldende.

³⁹Jek kol tchilatche murshendar, kai ap o trushel dino his, praassas o Jesuses, un penas: “Te hal tu ko Kristo, ab o trushelestar tele, un le men ninna tele!”

⁴⁰Ko wawar tchingras ap leste un penas: “Muk tele! Dareh tu gar o Deblestar, kanna kai hal ap o trushel?

⁴¹Kawa hi mari phagi[58] koleske, hoi kram. Mer anah tchatchepah doosh ap mende. Kawa mursh kras kek tchilatchepen.”

⁴²Un job penas ap o Jesuseste: “Jesus, ma biste man, te hal tu kote, kai tu o baro rai hal!”

⁴³Un o Jesus penas ap leste: “Tchatchepah, me penau tuke: Kau diwes hal tu mantsa an o Debleskri shukar baar[59].”

⁴⁴His nai deesh-te-dujenge, koi was o diwes kalo har i rati an o tselo them. Un kowa atchas jaake bis trinenge.

⁴⁵Un o wudar an o Debleskro baro kheer, kai his kerdo dran kutch pesso than,[60] koja djas an dui kotja mashkral paash.

⁴⁶Un o Jesus das bari gole: “Miro dad, an tire wasta tchiwau me miro djipen!” Un palle meras lo.

⁴⁷Har ko pralstuno lurdo dikas, hoi koi djas, sharas lo o Debles un penas: “Tchatchepah, kawa his i latcho mursh.”

⁴⁸Kol menshenge, kai kote wan un lauter dikan, djas kowa jaake phares an o dji, te dan pen jon ap o betch, un djan penge le.

⁴⁹Un o Jesuseskre mala un kol djuwja, kai wan leha dran o them Galilea, kolla his i kotar krik tardo un dikan kowa lauter.

⁵⁰Koi was i mursh, ko kharella Josef. Kowa his tchatcho un latcho. Job his jek kol pralstune biboldendar,

⁵¹un kamas gar, te well o Jesus ap o trushel dino. Job his dran i biboldengro foro Arimatia. Un job dikas ap o Debleste, te well ko tsiro, kai hakeno dikell, kai o Dewel o baro rai hi.

⁵²Job djas pash o Pilateste un mangas lestar, te denn le les o mulo Jesuses.

⁵³Un o Josef las o Jesuses o trushelestar tele, un tchiwas les an i laintikro kotar, un tchiwas les an i mulengro kheer, kowa his an i baro bar dino. Kote his gomme kek mensho dren tchiddo.

⁵⁴Kowa his glan o Debleskro diwes, har o kham tele djas.

⁵⁵Kol djuwja, kai wan o Jesuseha dran o them Galilea, kolla djan o Josefeske palla, un dikan, har tchiwas lo o mulo Jesuses an i mulengro kheer.

⁵⁶Un jon djan an o foro pale, un kran kutch djet, hoi mishto sungella, te makenn le les dren. Ap o Debleskro diwes kran le kek budi, jaake har kowa pash i biboldende hi.