Read O Debleskro Drom - I Bibla an o Romano Rakepen 2021 Luka 24 Bible Online

Luka 24 - O Debleskro Drom - I Bibla an o Romano Rakepen 2021 bible

Luka 24

¹Sik taissarlake, pal o Debleskro diwes, lan le kutch djet, hoi jon kokres kran, un djan pash ko mulengro kheer.

²Kote dikan le, kai ko baro bar buder gar glan o mulengro kheer tchiddo hi.

³Un jon djan dren, un hatsan gar o mulo trupo[61] o rajestar Jesus.

⁴Har jon koi tardo his, un djinan gar, hoi te krenn le, his kote ap jek kopo dui mursha tardo. Un lengre ripja his railes bijalo.

⁵Un i traash was ap i djuwjende. Un darjatar dikan le ap i phub. Kol dui mursha penan ap lende: “Hoske rodenn tumer kol djides pash i mulende?

⁶Job hi gar kai. O Dewel kras les i mulendar djido. Bistran tumer kowa, hoi job tumenge penas, har job an o them Galilea his?

⁷Job penas tumenge: O Menshengro Tchawo hunte well an i tchilatche wasta dino, un ap o trushel dino. Un pal triin diwessa stell lo i mulendar pre.”

⁸Un kol laba wan pale an lengro shero.

⁹Koi djan jon krik dran ko mulengro kheer, un djan pale an o foro, un penan kowa lauter o Jesuseskre deesh-te-jek malenge, un ninna kol tsele wawarenge, kai pash lende hi.

¹⁰Kol djuwja his i Maria Magdalena, i Joanna un i Maria, ko Jakobeskri dai un wawar.

¹¹Un kowa, hoi i djuwja penan, his i murshenge dinelo rakepen. Un jon patsan kol djuwjen gar.

¹²O Petro stas pre, un djas pash ko mulengro kheer, dikas dren, hatsas kol laintikre kotja ap i rig tchiddo, un djas peske. Job djinas gar, hoi te penell lo.

¹³Ap kau diwes djan dui o Jesuseskre malendar an ko gab Emmaus. Kowa his deesh-te-dui kilometarja glan o foro Jerusalem.

¹⁴Ap o drom rakran le pral lauter, hoi an o foro Jerusalem djas.

¹⁵Har jon jaake rakran, was o Jesus pash lende, un djas lentsa.

¹⁶Jon prindjran les gar, har te wans lengre jaka pandlo.

¹⁷Koi putchas lo lendar: “Pral hawo koowa rakrenn tumer?” Koi was lenge ropaske, un jon atchan tardo.

¹⁸Un ko jek, kai kharella Kleopas, penas ap leste: “Djineh tu gar, hoi an kal diwessa an o foro Jerusalem lauter djas? Halauter djinenn kowa. Hal tu i wi-themari un djineh kowa gar?”

¹⁹Un o Jesus penas: “Hoi djas?” Un jon penan: “Kowa, hoi kran le o Jesuseha dran Nazaret. Job his o Debleskro rakepaskro, ap koleste o Debleskri soor his. O Dewel bitchras les. Kowa dikas hakeno ap kowa, hoi job penas un kras.

²⁰Mare bare rashaja un pralstune rakran i phagi pral leste win, te well lo ap o trushel dino. Un jon dan les ap o trushel.

²¹Mer patsam, kai o Dewel bitchras les, te lell job i Israeleskre menshen dran i Remarjengre wasta win. Kowa djas lauter glan triin diwessa.

²²Un kau diwes penan menge i djuwja tchomone, kai atchas menge o rakepen krik. Kol djuwja his taissarlake pash o mulengro kheer,

²³un hatsan o mulo Jesuses gar. Jon wan pale pash mende, un penan: Mer dikam bolepangren, un kolla penan: O Jesus djiwella!

²⁴Mursha mendar djan pash ko mulengro kheer, un lauter his jaake, har kolla djuwja kowa penan. Les dikan jon gar.”

²⁵Koi penas o Jesus ap lende: “Tumer haiwan tchi. An tumaro dji djal tchi dren. Hoske patsenn tumer kowa gar, hoi o Debleskre rakepangre glan i rah tsiro penan?

²⁶Kolla penan: O Kristo, ko baro rai, kones o Dewel bitchras, hunte las duka ap peste, te djas lo an peskro railepen.”

²⁷Palle penas o Jesus lenge, hoi o Mose un i tsele Debleskre rakepangre pral leste tchinan.

²⁸Un jaake wan le pash o gab Emmaus, un o Jesus kras jaake, har te kamell lo dureder te djal.

²⁹Jon rikran les pale, un penan ap leste: “Atch pash mende! I rati wella, un well tamlo[62].” Koi djas job lentsa an o kheer,

³⁰un beshas pes te chal lo lentsa, las o maro, parkras pes pash o Debleste, phagas ko maro an kotja, un das kowa lende.

³¹Koi haiwan le, kowa hi o Jesus. Un ap jek kopo dikan le les buder gar.

³²Un jon penan mashkral pende: “Djas kowa gar an maro dji, har job ap o drom mentsa rakras, un menge penas, hoi an o Debleskro lab pral leste tchinlo hi?”

³³Un jon stan pre, un jaake sik har djala, djan le pale an o foro Jerusalem. Kote his kol deesh-te-jek un kol wawar o Jesuseskre malendar khetne.

³⁴Un kolla, kai kote khetne hi, penan lenge: “O Dewel kras tchatchepah o Jesuses djido, un o Simon dikas les.”

³⁵Koi ginan kol dui lenge dren, hoi lenge ap o drom djas, un har jon les prindjran, har job o maro phagas.

³⁶Har jon kowa penan, his ap jek kopo o Jesus mashkral lende tardo, un penas ap lende: “O Debleskri bacht tumenge!”

³⁷Jon patsan, kai dikenn le i mules. Un i daar was ap lende.

³⁸Koi penas lo ap lende: “Hoi dikenn tumer jaake darenes? Hoske putchenn tumen an tumaro shero, koon me hom?

³⁹Dikenn mire wasta un mire herja! Me hom les. Taprenn man an, un haiwenn: Kek mules hi mass un kokale ap peste, har tumer les pash mande dikenna!”

⁴⁰Un har job kowa penas, sikras job lende peskre wasta un pire.

⁴¹Jon nashte patsan gar, kai hi o Jesus glan lende tardo, jaake bachtelo his le. Har djinan le gar, hoi te penenn le, putchas lo lendar: “Hi tumen tchomone te chal?”

⁴²Koi dan le les i kotar peklo matcho.

⁴³Job las kowa un chas les glan lende.

⁴⁴Un job penas: “Har me pash tumende homs, penom me ap tumende: Halauter hunte well tchatcho, hoi o Mose tchinas, un hoi o Debleskre rakepangre pral mande penan, un hoi an o Debleskre gilja tchinlo hi.”

⁴⁵Un palle das lo len goswepen, te haiwenn le o Debleskro lab,

⁴⁶un penas ap lende: “Jaake hi tchinlo an o Debleskro lab: O Kristo, ko baro rai, kolestar o Dewel penas, te well job, kowa hunte lell duka ap peste, un pal triin diwessa stell lo i mulendar pre.

⁴⁷Un an peskro lab hunte well i menshenge an hake themma penlo, te mukenn le pengro tchilatcho drom, un djan ap o Debleskro drom, jaake kai lell o Dewel lengri doosh lendar krik. Penenn kowa i menshenge an o foro Jerusalem, un palle an i wawar themma!

⁴⁸Tumer dikan kowa lauter, un hunte penenn kowa i menshenge dureder!

⁴⁹Un me bitchrau tumenge koles, kolestar miro dad penas, te well job pash tumende. Atchenn an o foro Jerusalem jaake rah, bis te lan i soor dran o bolepen!”

⁵⁰Un job djas pash o gab Betani peskre malentsa. Koi hadas lo peskre wasta un penas: “O Dewel atchell tumentsa!”

⁵¹Un har job jaake rakras, djas lo lendar un was pral an o bolepen hadedo.

⁵²Un jon sharan les, un djan bachteles pale an o foro Jerusalem.

⁵³Un hako tsiro djan le an o Debleskro baro kheer, un sharan o Debles.