Read O Debleskro Drom - I Bibla an o Romano Rakepen 2021 Luka 4 Bible Online

Luka 4 - O Debleskro Drom - I Bibla an o Romano Rakepen 2021 bible

Luka 4

¹Un o Jesus his pherdo Debleskro Ducho. Un job mukas o them pash o pani Jordan. Un o Debleskro Ducho anas les an o mulo them.

²Kote atchas lo star-deesh diwessa. Un o beng was pash leste, te anell lo les o Debleskro dromestar tele. An kol diwessa chas o Jesus tchi. Un har kol diwessa trujel his, his les bok.

³Un o beng penas ap leste: “Te hal tu o Debleskro tchawo, pen ap ko bar, te well lestar i kotar maro!”

⁴Koi penas o Jesus: “An o Debleskro lab hi tchinlo: O maro kokres rikrell i menshes gar djido.”

⁵Palle anas les o beng ap i berga, un sikras leste ap jek kopo i tsele themma ap i phub.

⁶Un o beng penas leske: “Kol tsele themma un lengro brawlepen kamau me tute te dell. Kawa lauter hi miro, un me dau kowa koneste me kamau.

⁷Tu te mangeh man an, palle dau me lauter tute.”

⁸Koi penas o Jesus: “An o Debleskro lab hi tchinlo: Tu mangess o Debles an, — job hi tiro rai, — un wess leske kokres koi!”

⁹Pal kowa anas les o beng an o foro Jerusalem, un tchiwas les ap o Debleskro baro kheer pral pre, un penas ap leste: “Te hal tu o Debleskro tchawo, muk tut tele te perell!

¹⁰An o Debleskro lab hi tchinlo: O Dewel penas ap pengre bolepangre, te denn le jak ap tute.

¹¹Un jon hidjrenn tut pengre wastentsa, te dukress tire pire gar ap i barra!”

¹²Koi penas o Jesus ap o bengeste: “O Debleskro lab penella: Rike o Debles gar dineleske, te sikrell lo tut, har sorelo job hi!”

¹³Har o beng dikas, kai o Jesus gar kras, hoi job kamas, mukas job lestar i tsiro tele.

¹⁴Un o Jesus djas pale an o them Galilea. Un o Debleskri soor his an leste. Un an i tsele gaba un forja, kai kote his, shunan le lestar.

¹⁵Un job djas an i biboldengre kangria un sikras i menshende o Debleskro drom. Un hakeno sharas les.

¹⁶Un job was an o foro Nazaret, kai job baro was. Ap o Debleskro diwes djas lo an i biboldengri kangri, har job kowa hako Debleskro diwes kras. Un job stas pre, te drawerell[14] lo an o Debleskro lab.

¹⁷Koi dan le les ko liil, hoi o Debleskro rakepaskro, o Jesaja, tchinas. Un job kras kau liil pre, un kote hatsas lo kol laba:

¹⁸O Debleskro Ducho hi ap mande. Job rodas man win, te penap i tchorwelenge o Debleskro latcho lab. Un job bitchras man, te penap kolenge, hoi stilde hi, te wenn le dran lengro stilepen win, un kolenge, kai korelo hi, te dikenn le pale, un kolenge, kai pale-tchiddo hi, te wenn le pale erligo,

¹⁹un te penap i menshenge: Kawa hi ko bersh, kai o Dewel i menshen bachteles krella.

²⁰Un o Jesus kras kau liil pandlo, un das les pale, un beshas pes. Un i tsele menshe an i biboldengri kangri dikan ap leste.

²¹Un job penas ap lende: “Kau diwes nai dikenn tumer, te hi kau lab o tchatchepen.”

²²Lauter rakran lestar mishto, un leskro rakepen his lenge pherdo latchepen. Un jon kran bare jaka. Un jon penan: “Hi kawa gar o Josefeskro tchawo?”

²³O Jesus penas: “Tchatchepah, tumer penenna: Dramaskro, kre tut kokres sasto! Tu kral sau baro koowa an o foro Kapernaum. Kre kowa kate ninna!

²⁴Kawa penau me tumenge: Kek Debleskro rakepaskro well kote sharedo, kai job khere hi.

²⁵Tchatchepah, me penau tumenge: Ap ko tsiro, kai o Debleskro rakepaskro Elija djiwas, djiwan bud djuwja, kolengre mursha mulo hi, an o them Israel. Ap ko tsiro das triin-te-paash bersha kek brishin. Un i bari bok was an o tselo them.

²⁶Pash kol djuwjende was o Elija gar bitchedo. Job was bitchedo pash jek djuwjate an o foro Sarepta, an o them Sidon, kolakro rom mulo hi.

²⁷Dikenn ninna ap ko tsiro, kai o Debleskro rakepaskro, o Elisa, djiwas. An ko tsiro his bud menshen an o them Israel i djungelo nasslepen ap pengro mass. Kekes lendar kras o Elisa sasto. Kokres o Naaman dran o them Syria kras job sasto.”

²⁸Un lauter kolla, kai an i biboldengri kangri his, wan chojedo ap o Jesuseste, har jon kowa lestar shunan.

²⁹Jon stan pre, un tradan les dran o foro win, anan les pral ap i berga, kai lengro foro pre tardo hi, te witsrenn le les tele.

³⁰Job rissras pes trujel un djas mashkral lende pale, un djas peske.

³¹Un job djas an o foro Kapernaum an o them Galilea. Un hako Debleskro diwes penas lo kote i menshenge o Debleskro lab.

³²Un job rakras jaake bari sorjah, te kran le bare jaka pral kowa, hoi job lenge penas.

³³Koi his i mursh an i biboldengri kangri, kai his i beng[15] an leste. Un kowa das bari gole:

³⁴“Ah! Hoi kameh tu mendar, Jesus dran Nazaret? Wal tu, te maress men? Me djinau, koon tu hal: Tu hal o Debleskro mursh, koles o Dewel bitchras.”

³⁵Un o Jesus das les trad, un penas soreles ap leste: “Ma rake un dja dran leste win!” Un ko beng, kai an ko mursheste hi, witsras ko murshes mashkral i menshende ap i phub, djas dran leste win, un dukras les gar.

³⁶Un halauter kran bare jaka. Un jon rakran jek o wawareha, un penan: “Hawe sorele laba! Job rakrell sorele labentsa ap i bengende, un jon djan dran i menshende win.”

³⁷Un an hake gaba un forja, kai kote his, shunan le lestar.

³⁸Un har job dran i biboldengri kangri was, djas lo an o Simoneskro kheer. Un i dai o Simoneskri romjatar his ap o tchiben tchiddo, un lakro shero his tato. Un jon mangan lestar, te krell lo lat sasto.

³⁹Un job djas pash late, un penas ap ko nasslepen: “Dja tuke!” Un ko nasslepen djas latar. Un joi stas sik pre, un anas lenge i chapen.

⁴⁰Un o kham djas tele. Un bud menshe anan i nasselen pash leste. Kolen his bud nasslepen. Un o Jesus tchiwas peskre wasta ap hakeneste lendar, un kras len sasto.

⁴¹Un dran bud menshende, kai his benga an lende, djan i benga win. Un har jon win wan, dan le gole: “Tu hal o Debleskro tchawo.” Un o Jesus das len trad, un mukas len gar te rakrell. I benga djinan, kai job ko baro rai hi, kolestar o Dewel penas, te well job.

⁴²Un o wawar diwes taissarlake, djas o Jesus dran o kheer win, un djas kote, kai job kokres hi. Un bud menshe rodan les, un djan pash leste. Un jon kaman les te rikrell, te djal lo gar peske lendar.

⁴³Un har jon hatsan les, penas lo ap lende: “Me hunte djap ninna an i wawar forja, te penap i menshenge o Debleskro lab, te hi o tsiro kanna kai, kai o Dewel kamell len dran o tchilatchepen te lell, un kamell lengro rai te well. Un me wom bitchedo, te penap kowa.”

⁴⁴Un o Jesus djas an o them Judea un rakras kote an i biboldengre kangria.