Read O Debleskro Drom - I Bibla an o Romano Rakepen 2021 Luka 6 Bible Online

Luka 6 - O Debleskro Drom - I Bibla an o Romano Rakepen 2021 bible

Luka 6

¹Ap o Debleskro diwes djas o Jesus ap i kotar them, kai o djob bares was. Un leskre mala lan ko djob an i wasta, un kran ko djob pre, te chan le.

²Kote his ninna Farisarja, kai penan ap lende: “Hoske krenn tumer ap o Debleskro diwes kowa, hoi hi gar pal o biboldengro tchatchepen?”

³Penas o Jesus: “Draweran[21] tumer gar an o Debleskro lab, hoi kras o David un leskre mala, har jon bokan?

⁴Job djas an o Debleskro kheer un las kol mare, kai kote tchiddo hi, un chas len peskre malentsa? Pal i biboldengro tchatchepen his i mare i rashajenge kokres koi.”

⁵Un o Jesus penas: “Me, o Menshengro Tchawo, hom ninna o rai pral o Debleskro diwes.”

⁶Un ap i wawar Debleskro diwes djas o Jesus an i biboldengri kangri, te penell lo kote i menshenge o Debleskro lab. Un job dikas kote i murshes, koleskro tchatcho wast his bango.

⁷I biboldengre tchatchepangre un i Farisarja dikan ap o Jesuseste, un putchan pendar: “Krell lo kau murshes ap o Debleskro diwes sasto?” Jon kaman tchomone ap leste pre te anell, te anenn le les nai glan i tchatchepangre.

⁸O Jesus haiwas, hoi an lengro shero trujel djas. Un job penas ap ko mursheste, koles i bango wast hi: “Ste pre un am kai!” Un job stas pre, un djas pash leste.

⁹Penas o Jesus ap lende: “Me putchau tumendar: Nai krah mer latcho koowa ap o Debleskro diwes pal maro tchatchepen? Nai krah mer i menshen sasto ap o Debleskro diwes? Nai mukah mer len te merell?”

¹⁰Un job dikas ap kolende, kai trul leste tardo his, un penas ap kau mursheste: “Sike tiro wast!” Un job sikras peskro wast, un ko wast was sasto.

¹¹Koi wan jon chojedo ap o Jesuseste, un rakran khetne, hoi jon o Jesuseha nai krans.

¹²His i diwes, kai djas o Jesus ap i berga, te rakrell lo o Debleha. Un job atchas i tseli rat un rakras leha.

¹³Har diwes was, das lo peskre malende gole, un rodas deesh-te-dujen lendar win, te wenn le leskre bitchepangre.

¹⁴Un kolla his: O Simon, — koleste das job ninna o lab Petro, un leskro phraal Andreas, o Jakobo, un o Johanni, o Filipo, o Bartolomeo,

¹⁵o Mateo, o Thomas, o Jakobo, koleskro dad hi o Alfeo, un o Simon, kai hi kol menshendar, kai kharenna Zelotarja[22]

¹⁶un o Judas Iskariot, ko phukepaskro.

¹⁷Pal kowa djas o Jesus lentsa i berga tele. Un jon wan ap i buchlo kotar them. Koi his bud kolendar khetne, kai leske palla djan, un ap leste shunan. Ninna bud wawar menshe his kote. Un kolla wan dran o tselo them Judea un dran o foro Jerusalem, ninna dran o them, kai i forja Tirus un Sidon tchiddo hi.

¹⁸Kolla wan lauter, te shunenn le o Jesuses te rakrell, un kaman sasto te well. Ninna lauter kolla wan sasto, kai his i beng an lende.

¹⁹I tsele menshe kaman les an te taprell. I bari soor was dran leste, un kras lauteren sasto.

²⁰Un o Jesus dikas ap peskre malende un penas: Bachtele han tumer tchorwele! Tumer djiwenna o Debleha khetne an o bolepen un lenn leskro brawlepen.

²¹Bachtele han tumer, kai kanna bokenna. Tumer wenna tchalo. Bachtele han tumer, kai kanna rowenna. Tumer san pale.

²²Bachtele han tumer, te wenn i menshe chojedo ap tumende, un tchiwenn tumen pale, un praassenn tumen, un rakrenn tchilatches pral tumende, un kowa lauter krenn le doleske, te patsenn tumer ap o Menshengro Tchaweste!

²³Awenn bachteles ap ko diwes, un khelenn i bachtjatar! O Dewel dell tumen i baro brawlepen an o bolepen. Kowa, hoi i menshe kanna tumentsa krenna, kowa kran ninna lengre phure ap o Debleskre rakepangre an o phuro tsiro.

²⁴Bibacht well ap tumende, kai kanna brawelo han. Tumer lenna tchi buder.

²⁵Bibacht well ap tumende, kai kanna tchalo han. Tumer bokenna. Bibacht well ap tumende, kai kanna sana. Tumer rowenna, un denn gole.

²⁶Bibacht well ap tumende, te rakrenn i tsele menshe tumendar latches. Kolengre phure rakran ninna latches pral i chochene rakepangre, kai penan, te wan le o Deblestar, un wan gar lestar.

²⁷Tumer, kai man shunenna, tumenge penaua: Awenn latches kolenge, kai hi tchilatcho ap tumende! Krenn kolenge latchepen, kai hi chojedo ap tumende!

²⁸Penenn kolenge latche laba, kai tumen koshenna! Mangenn o Debles kolenge, kai dukrenn tumen!

²⁹Kowa, kai das tut ap jek tcham, koleske rike i wawar tcham ninna koi, te dell lo tut! Te lell jek tutar tiri plaashka, de les ninna tiro gad!

³⁰De hakenes, kai tutar mangella! Un te lell jek tutar tchomone, hoi tiro hi, ma mang les pale!

³¹Lauter, hoi tumer kamenna, te krenn i menshe tumenge, kowa krenn tumer lenge ninna!

³²Te wenn tumer latches kolenge, kai hi latches ap tumende, patsenn tumer, kai sharell tumen o Dewel? Na-a! Ninna i tchilatche hi latches ap pengre malende.

³³Te krenna tumer kolenge latchepen, kai tumenge latchepen kran, patsenn tumer, kai sharell tumen o Dewel? Na-a! Ninna i tchilatche krenn kolenge latchepen, kai lenge latchepen kran.

³⁴Tumer te patsenn tumare lowe win ap kolende, kai denn tumen kol lowe pale, patsenn tumer, kai sharell tumen o Dewel? Na-a, ninna i tchilatche patsenn pengre lowe kolenge win, kai denn len kol lowe pale.

³⁵Me penau tumenge: Awenn latches kolenge, kai hi tchilatcho ap tumende! Krenn kolenge latchepen! Patsenn tumare lowe win ap kolende, kai tumer gar djinenna, te lenn tumer lendar tchomone pale! Te krenna tumer kowa lauter, palle dell o Dewel tumen peskro brawlepen an o bolepen, un tumer wenn o baro Debleskre tchawe. O Dewel hi ninna latches ap kol menshende, kai tchilatche hi, un kai parkrenn pen gar pash leste.

³⁶Tumen hunte well hakeneske i baro dji, jaake har o Debles hakeneske i baro dji hi.

³⁷Ma sikrenn ap o wawareskri doosh! Un o Dewel dikell gar ap tumari doosh. Ma penenn: Kowa hunte lell i phagi! Un o Dewel dell tumen kek phagi. Bistrenn ko tchilatchepen, hoi i wawar menshe ap tumende kran. Un o Dewel bistrell ko tchilatchepen, hoi tumer kran.

³⁸Denn i menshen latcho koowa! Un o Dewel dell tumen latcho koowa! Awa, job dell tumen jaake bud, te hi tumen budeder har doha. Job dell tumen jaake bud, te nai lenn kowa gar lauter. Doleske penau tumenge: Tumer te denn bud, palle dell o Dewel tumen bud. Tumer te denn gar bud, palle dell o Dewel tumen gar bud.

³⁹Un o Jesus penas lenge laba, kai i khatedo tchatchepen dren hi, un penas: Te lell jek korelo i wawar koreles ap o wast, palle perenn jon hake dui.

⁴⁰Jek, kai djal an o sikepaskro kheer, djinell gar budeder har o sikepaskro. Job te djinell bud, palle hi lo jaake gosewo har peskro sikepaskro.

⁴¹Hoske kameh tu i tikno kasht dran tiro phraleskro jak win tserdell, un dikeh gar o baro kasht an tiro jak?

⁴²Tu peneh ap leste: Miro phraal, am kai! Me kamau ko tikno kasht dran tiro jak win tserdell. Un tu dikeh gar o baro kasht an tiro jak. Tu chocheno! Tu kreh, har te wals tu latcheder har job. Le ko baro kasht dran tiro jak win, palle nai leh tu ko tikno kasht dran tiro phraleskro jak win!

⁴³Kek latcho phabjengro ruk hidjrella djungele phabja. Un kek nasselo ruk hidjrella latcho koowa.

⁴⁴Tu prindjreh nai o ruk ap kowa, hoi ap leste baro wella. Ap i subjengro ruk wenna kek faige baro. Witar gar wenna drake baro ap subjengre burra.

⁴⁵Dran i latcho mensheskro dji well latcho koowa. Dran i tchilatcho dji well tchilatcho koowa. I mensho penell kowa, hoi an leskro dji dren hi.

⁴⁶Hoske penenn tumer: Rai, rai! ap mande un krenn gar, hoi me tumenge penaua?

⁴⁷Koon well pash mande, un shunell mire laba, un krell, hoi me penaua,

⁴⁸kowa hi har i mensho, kai kras peske i kheer. Job hadas i phub win, bis te was lo ap i sorelo baro bar. Kote tchiwas job peskro kheer pre. Un o baro pani was, un kamas ko kheer paash te krell. Un kowa djas gar. Ko kheer his ap o sorelo bar tardo.

⁴⁹Koon shunell mire laba, un krell kowa gar, hoi me penaua, hi har i mensho, kai kras peskro kheer ap i tchik, un gar ap i sorelo baro bar. Un o baro pani was, un o tselo kheer peras khetne. Un i bibacht his baro.