Read O Debleskro Drom - I Bibla an o Romano Rakepen 2021 Luka 8 Bible Online

Luka 8 - O Debleskro Drom - I Bibla an o Romano Rakepen 2021 bible

Luka 8

¹Un o Jesus djas an i forja un gaba trujel, te penell lo i menshenge o latcho lab, kai o Dewel kamell len dran o tchilatchepen win te lell, un kamell lengro rai te well. Leskre deesh-te-dui mala djan leha.

²Un bud djuwja, kolen job sasto kras, djan ninna leha. Mashkral kol djuwjende his ninna kolla, kai bengen an pende his. Efta benga tradas lo dran i Mariate win, kai kharas ninna Magdalena.

³Ninna i Susanna djas leha, un i Joanna. Lakro rom his o Kuza. Kowa his o pralstuno budepaskro an o Herodeskro kheer. Un bud wawar djuwja djan leha, te denn le len chapen un pipen dran kowa, hoi len hi.

⁴Dran bud forja wan bud menshe pash leste khetne. Un job rakras ap lende sawe laba, kai hi i khatedo tchatchepen dren.

⁵Un job penas: “I hacho djas win, te witsrell lo o djob ap peskro kotar them, te well ko djob bares. Un tikne kotja peran ap o drom, un i menshe stakran len khetne. Un i tchirkle chan len pre.

⁶Un wawar djob peras ap i barra. Kote his gar doha pani. Un har ko djob dran i phub win was, chatchras o kham les.

⁷Un wawar djob peras mashkral i subjengre burra, un kol burra wan jaake baro, te las o djob kek ducho buder, un job meras.

⁸Wawar djob peras ap i latchi phub, un was baro, un hidjras sheel kope jaake bud.” Pal kowa das o Jesus gole: “Mukenn kowa an tumaro shero trujel te djal!”

⁹Un o Jesuseskre mala putchan lestar: “Hoi kameh tu menge kal labentsa te penell?”

¹⁰Penas lo ap lende: “O Dewel mukell tumen te haiwell, har kote djal, kai dell lo menshen pash peste gole, te djan le ap leskro drom. Kowa djinenn i wawar menshe gar. Lenge penau laba, kai o tchatchepen dren khatedo hi. Me rakrau jaake, te dikenn le kowa nai, un haiwenn les gar, un jaake, te shunenn le les nai, un haiwenn les gar.

¹¹Kanna penau tumenge kowa jaake, te haiwenn tumer kowa: O djob hi o Debleskro lab.

¹²Ko drom hi har o dji kol menshendar, kai shunenn o Debleskro lab. Un o beng wella, un lell kowa lenge pale dran o dji win, te patsenn le gar ap o Debleste un wenn gar ap leskro drom.

¹³Ko kotar phub, hoi hi pherde barra, hi har o dji kol menshendar, kai shunenn o Debleskro lab, un lenn les bachteles pre. O lab well gar sorelo an lengre djia. I tikno tsiro patsenn le. Un te well pharo tsiro ap lende, witsrenn le pengro patsepen ap i rig.

¹⁴Ko kotar phub, kai o djob mashkral i subjengre burra peras, hi har o dji kol menshendar, kai shunenn o Debleskro lab un rikrenn les i tsiro an pengre djia. Te well i daar an lengro djipen, un te well o brawlepen glan lengre jaka, un ko shukar djipen, palle well ko lab lendar tassedo un rakrell buder gar an lengre djia.

¹⁵Koi latchi phub hi har o dji kol menshendar, kai o Debleskro lab shunenna, un djiwenn koi pal. An lengre djia well ko lab sorelo. Un jon atchenn soreles an o patsepen tardo.”

¹⁶“Kek chatchell i momeli an, un tchiwell i piri pral. Un kek chatchell i momeli an, un tchiwell lat tel o tchiben. Na-a, job tchiwell lat ap i momelengri, te well koi momeli diklo hakenestar, kai wella an o kheer.

¹⁷Jaake hi kowa ninna o Debleskro labeha. Jek diwes dikenn le kowa, hoi jon kanna gar dikenna. Jek diwes shunenn le un haiwenn le, hoi jon kanna gar djinenna.

¹⁸Denn jak, te shunenn tumer ap o Debleskro lab! Koon o Debleskro lab an o dji rikrella, kowa haiwell les bud un budeder. Koon o Debleskro lab gar an o dji rikrella, koleske well ninna kowa krik lino, hoi job patsell, te hi les.”

¹⁹O Jesus his an o kheer un bud menshe his trul leste. Un leskri dai un leskre phrala kaman pash leste te djal, un nai wan gar pash leste.

²⁰Koi penas jek ap leste: “Tiri dai un tire phrala hi win tardo, un kamenn tut te dikell.”

²¹Penas lo: “Miri dai un mire phrala hi kolla, kai o Debleskro lab shunenna, un kowa ninna krenna.”

²²Was i diwes, kai o Jesus peskre malentsa an i bero djas. Un job penas ap lende: “Djas ap i wawar panjeskri rig!” Un jon uleran ap o baro pani.

²³Har jon ap o baro pani his, sowas lo dren. Un i baro diwjo ducho phurdas pral o baro pani. Un o pani was diwjo, un djas pre te tele. Un bud pani was an o bero dren, jaake bud, te kamas ko bero tele te djal.

²⁴Un jon djan pash leste, djangran les pre[26], un penan: “Sikepaskro, sikepaskro, ste pre, mer tassah!” Un job stas pre, un penas ap ko sorelo ducho, hoi phurdas pral o pani: “Atch kanna!” Un ap o diwjo pani penas lo: “Muk tele!” Un o sorelo ducho phurdas buder gar. Un o pani his buder gar diwjo, un das buder kek gole.

²⁵Un job penas ap lende: “Kai hi tumaro patsepen?” Un jon trashan, un penan jek ap o wawareste: “Koon hi kau mursh? Job penell ap o sorelo ducho, te phurdell lo buder gar, un ap o pani, te tchiwell lo pes. Un jon shunenn ap leste.”

²⁶Un jon uleran dureder, un wan ap i wawar panjeskri rig an ko them Gerasa. Kawa his wergel o them Galilea tchiddo.

²⁷Un o Jesus djas dran o bero. Kote was i mursh dran o foro. An koleste his benga. I rah tsiro his job nango, un djiwas gar an i kheer. Job djiwas an i mulengre khera.

²⁸Bud kope tapras les o beng. Un i menshe pandan les sasterne shellentsa ap i wasta un ap i pire. Job phagas kol sasterne shelle pestar tele. Un o beng tradas les an o mulo them. Har ko mursh kanna o Jesuses dikas, witsras pes lo glan leste ap i phub. Un o Jesus penas soreles ap o bengeste: “Dja lestar win!” Koi das job bari gole: “Jesus, tchawo o baro Deblestar, hoi kameh tu mandar? Me mangau tut: Ma duke man!”

²⁹

³⁰Un o Jesus putchas lestar: “Har khareh tu?” Penas lo: “Legioni.” Ko lab sikrella, te his bud benga an leste.

³¹Un jon mangan les, te bitchrell lo len gar an i telstuni phub.

³²Un kote ap koi berga his bud bale, hoi kote chan. Un kol benga mangan lestar: “Muk men an kol balende te djal!” Un job mukas len an lende dren te djal.

³³Koi wan kol benga dran o mursheste win, un djan an kol balende. Un kol tsele bale wan diwjo, un nashan i berga tele, un stan an o baro pani, un tassan.

³⁴Kol mursha, kai dan ap i balende jak, dikan kowa, un nashan an o foro un an i gaba, un penan kowa i menshenge.

³⁵Un kol menshe kaman te dikell, hoi kote djas, un wan pash o Jesuseste. Un jon dikan ko murshes, dran koleste i benga win djan. Job his pash o Jesuseste beshdo, his an-rido, un buder gar diwjo. Koi wan jon dareno.

³⁶Un kolla, kai dikan, har kau mursh sasto was, penan kowa kolenge, kai dran i forja un dran i gaba wan.

³⁷Un i bari daar was ap lende. Un kol bud menshe dran o them Gerasa penan ap o Jesuseste: “Mer mangah tut: Dja tuke mendar!” Un job djas an o bero, un uleras pale.

³⁸Ko mursh, kai sasto was, mangas lestar, te atchell lo nai pash leste. O Jesus penas ap leste:

³⁹“Dja khere un pen i menshenge, hoi o Dewel tuke kras!” Un kau mursh djas peske, un penas i tsele menshenge an peskro foro, hawo baro koowa o Jesus ap leste kras.

⁴⁰Un o Jesus was pale ap i wawar panjeskri rig. Un bud menshe his kote tardo, un lan les kamles pre.

⁴¹Koi was i mursh pash o Jesuseste. Leskro lab his Jairo. Job his i pralstuno an i biboldengri kangri. Kowa witsras pes glan o Jesuseste tele, un mangas les, te well lo an leskro kheer.

⁴²Leskri tchai, kai his deesh-te-dui bersha phuro, his ap o merepen tchiddo. Un les his kek wawar tchawe har koja. Un o Jesus kamas leha te djal. Un bud menshe his trul leste un djan lentsa.

⁴³Koi pashel his i djuwel. Kolat hi deesh-te-dui bersha i ratlo nasslepen. Koja das lauter, hoi lat his djipaske, i dramangren, un kek nai kras lat sasto.

⁴⁴Un joi djas pal o Jesuseste, un tapras ap leskro ripen. Ap jek kopo was li sasto.

⁴⁵“Koon tapras ap miro ripen?” putchas o Jesus. Un hakeno das buchoste. Penas o Petro leske: “Rai, bud menshe hi trul tute, un taprenn tut an.”

⁴⁶Koi penas o Jesus: “Jek tapras man an. Me haiwom, har soor mandar krik djas.”

⁴⁷Har koi djuwel dikas, kai o Jesus lauter djinas, was li glan. Un joi trissas[27] un witsras pes glan leste tele, un penas glan i tsele menshende, hoske joi ap leskro ripen tapras, un kai joi ap jek kopo sasto was.

⁴⁸Un o Jesus penas ap late: “Romnija, tiro patsepen kras tut sasto. Dja mo Debleha!”

⁴⁹Un har o Jesus jaake rakras, was jek dran o kheer ko pralstunestar pral i biboldengri kangri, un penas ap leste: “Tiri tchai meras. Tu hunte mangess o rajes buder gar.”

⁵⁰Har o Jesus kowa shunas, penas lo ap ko pralstuneste: “Ma traash! Tiri tchai djiwella. Pats man!”

⁵¹Un o Jesus djas an ko kheer. Un o Johanni un o Petro un o Jakobo djan leha. Un o tchakro dad un lakri dai djan ninna lentsa. Un o Jesus mukas kek wawares an kau kheer dren te djal.

⁵²Un halauter rowan, un dan pengre wasta pral o shero khetne. Un job penas ap lende: “Ma rowenn! Joi hi gar muli. Joi sowella.”

⁵³Jon djinan, te meras li, un san pral leste.

⁵⁴Un o Jesus tapras lakro wast, un penas ap late: “Tchai, ste pre!”

⁵⁵Koi was pale djipen an late, un joi stas pre. Un job penas, te anenn le lake tchomone te chal.

⁵⁶Lakro dad un lakri dai kran bare jaka pral kowa, hoi koi djas. Un o Jesus penas lenge, te penenn le kekeske, hoi job kras.