Read O Debleskro Drom - I Bibla an o Romano Rakepen 2021 Luka 9 Bible Online

Luka 9 - O Debleskro Drom - I Bibla an o Romano Rakepen 2021 bible

Luka 9

¹Pal kowa das lo peskre deesh-te-dui malen pash peste gole, un das len i soor pral i tsele benga, te nai tradenn le len dran i menshende win, un te nai krenn le i nasselen sasto.

²Un job bitchras len pash i menshende, te penenn le lenge, te hi o tsiro kanna kai, kai o Dewel i menshen pash peste gole della, te djan le ap leskro drom. Un job bitchras len ninna, te krenn le i nasselen sasto.

³Un job penas lenge: “Te djan tumer ap o drom, ma lenn tchi peha: kek kasht, kek possita, kek maro, kek lowe, witar gar i duito gad!

⁴Te lell jek tumen an peskro kheer dren, atchenn pash leste jaake rah, bis te djan dureder!

⁵Un te lenn le tumen gar an pengro kheer dren, djan tumenge dran kau foro, un denn koi tchik tumare pirendar tele! Un kowa sikrell i menshende, kai jon tchilatcho hi.”

⁶Un o Jesuseskre deesh-te-dui mala kran pen ap o drom, un djan an jek gab pal o wawar, penan i menshenge o Debleskro lab, un kran i nasselen sasto kote, kai jon ninna djan.

⁷O Herodes, ko baro rai pral o them Galilea, shunas lauter, hoi o Jesus krella. Un job djinas gar, hoi te patsell lo. His menshe koi, kai penan: “O Johanni stas i mulendar pre.”

⁸Wawar penan: “O Elija was pale.” Un ninna wawar penan: “Jek kol phure Debleskre rakepangrendar stas i mulendar pre.”

⁹O Herodes penas: “Me mukom o Johanneskro shero tele te dell. Koon hi kowa, kai shunau sawo koowa pral leste?” Un job kamas o Jesuses te dikell.

¹⁰Un kol deesh-te-dui bitchepangre wan pale, un penan o Jesuseske, hoi jon lauter kran. Un o Jesus las len peha, te well lo lentsa kokres, un djas lentsa pash ko foro Betsaida.

¹¹Har i menshe dikan, te djas o Jesus pash o foro Betsaida, djan bud leske palla. Un job mukas len pash peste te well, un penas lenge, te dell o Dewel len pash peste gole, te djiwell lo lentsa khetne. Un kolen, kai nasselo hi, kras lo sasto.

¹²Un o kham djas tele, un o Jesuseskre deesh-te-dui mala wan pash leste, un penan leske: “Bitche kal menshen tutar, te djan le an i gaba, un pash i hachende, te lenn le penge tchomone te chal, un te dikenn le kote, kai jon pral i rati nai atchenna! Kate, kai mer ham, della tchi te chal.”

¹³O Jesus penas ap lende: “Denn tumer len tchomone te chal!” Penan le leske: “Men hi gar budeder har pantch mare un dui matche. Kameh tu, te ginas kolenge lauterenge te chal?”

¹⁴Kote his nai jaake pantch serja mursha, ninna bud djuwja un tchawe. O Jesus penas ap peskre malende: “Krenn, te beshenn pen le jaake khetne, te hi kate pantch-deesh beshdo un kote pantch-deesh beshdo!”

¹⁵Un leskre mala kran jaake. Un lauter beshan pen.

¹⁶Un job las kol pantch mare un kol dui matche, un dikas pre ap o bolepen, un parkras pes pash o Debleste. Un palle phagas job kol mare un matche an kotja, un das len peskre malende, te denn le len i menshende.

¹⁷Un jon chan, un wan lauter tchalo. Un jon hadan kol kotja pre, hoi pral atchan. Koi wan deesh-te-dui marengre gone pherdo.

¹⁸His i diwes, kote his o Jesus kokres peskre malentsa, un mangas o Debles an. Un pal kowa putchas lo lendar: “Hoi penenn kol menshe, koon me hom?”

¹⁹Penan le leske: “Jon penenna, kai tu hal o Johanni, kowa, kai taufras i menshen. Wawar penenn: Kowa hi o Elija. Un pale wawar penenn: Jek kol phure Debleskre rakepangrendar stas i mulendar pre.”

²⁰Putchas lo lendar: “Tumer, hoi penenn tumer, koon me hom?” Penas o Petro: “Tu hal o Kristo, ko baro rai, kai menge o Deblestar bitchedo was.”

²¹Koi penas lo lenge, te penenn le kowa kekeske.

²²Un job penas: “Me, o Menshengro Tchawo, hunte lap bud duka ap mande. I bare rashaja un i biboldengre phureder un tchatchepangre tchiwenn man ap i rig. Un me hunte wap mulo dino, un pal triin diwessa krell man o Dewel djido.”

²³Un o Jesus penas ap lauterende: “Koon ap miro drom mantsa djala, kowa hunte bistrell, hoi leske kokres mishto hi, un lell peskro trushel hako diwes ap peste un djal mantsa.

²⁴Koon kamell peskro djipen te rikrell, kowa nashrell les. Koon peskro djipen mange nashrella, lell les mandar pale.

²⁵I mensheske wals kowa gar mishto, te lals lo o tselo brawlepen ap kai phub, un te wals lo o Debleske nashedo.

²⁶Kowa, kai ladjell pes mange un mire labenge, koleske ladjau me ninna, te wau me, o Menshengro Tchawo, pale. Ap ko diwes hi man ko railepen, kai hi ninna miro dades un o Debleskre bolepangren.

²⁷Tchatchepah, me penau tumenge: Kate hi menshe tardo, kolla merenna gar, bis te dikenn le o Debleskro railepen un soor, hoi an mande diklo wella.”

²⁸Pal ochta diwessa las o Jesus o Petres, o Johannes, un o Jakobes, un djas lentsa ap i berga, te rakrell lo o Debleha.

²⁹Un har job rakras o Debleha, dikas peskro mui wawartchandes win, un leskre koola wan railes bijalo.

³⁰Ap jek kopo rakran dui mursha leha. Kolla his o Mose un o Elija.

³¹Kol dujen his i bolepaskro railepen, un rakran leha pral leskro merepen an o foro Jerusalem.

³²O Petro un kol dui wawar his jaake khino, te sowan le. Har jon pre djangran[28], dikan le o Jesuses, har job an peskro bolepaskro railepen koi tardo his, un kol dui murshen, o Moses un o Elijas, pash leste.

³³Un har kol dui mursha kaman penge te djal, penas o Petro ap o Jesuseste: “Rai, hi mishto, te ham kai. Muk men triin tikne khera te krell, jek tuke, jek o Moseske, un jek o Elijeske.” Un job djinas gar, hoi rakrell lo kote.

³⁴Un har job jaake rakras, was i wolka pral lende tele. Un len his traash, har jon an koi wolka dren wan.

³⁵Koi shunan le i rakepen dran i wolka, hoi penas: “Kawa hi mo tchawo, job hi o wi-rodedo! Shunenn ap leste!”

³⁶Un har ko rakepen pre-heras, dikan le, kai o Jesus kokres koi tardo hi. Kol triin rikran kowa lauter penge, un penan an ko tsiro kekeske, hoi jon dikan.

³⁷Un o wawar diwes djan le koi berga tele, un bud menshe wan pash leste.

³⁸Mashkral lende his i mursh, kai das bari gole: “Sikepaskro, me mangau tut: Dik ap miro tchaweste! Man hi kokres kau tchawo, kek wawar.

³⁹I beng taprell les jaake, kai dell lo ap jek kopo bari gole, un perell ap i phub. Un palle well tchunger dran leskro mui. Ko beng kamell les buder gar te djal mukell, un kamell les te marell.

⁴⁰Me mangom tire malendar, te tradenn le o benges lestar win. Un jon haiwan kowa gar te krell.”

⁴¹Koi penas o Jesus: “Tumer tchilatche menshe. Tumen hi kek patsepen. Har rah tsiro hunte atchap pash tumende, te marap man tele tumentsa? An tiro tchawes pash mande!”

⁴²Har o tchawo was, witsras ko beng o tchawes ap i phub, un tserdas les jek rigjatar ap i wawar. Koi das o Jesus ko benges trad, un kras o tchawes sasto, un das les peskro dadeste pale.

⁴³Un lauterenge, kai kote tardo his, atchas o rakepen krik pral koi bari Debleskri soor. Har jon jaake bare jaka kran pral kowa, hoi o Jesus kras, penas lo ap peskre malende:

⁴⁴“Ma bistrenn, hoi me tumenge penau: Me, o Menshengro Tchawo, wau an i menshengre wasta dino!”

⁴⁵Kal laba haiwan le gar. Kowa, hoi job lenge kate penas, djas gar an lengro shero dren. Jaake djinan le gar, pral hoi job rakras un trashan, te putchenn le lestar pral kol laba.

⁴⁶Jek diwes tchingran pen leskre mala koi pral, koon lendar o pralstuno hi.

⁴⁷Har o Jesus haiwas, hoi an lengro shero trujel djala, las job i tchawes pash peste,

⁴⁸un penas ap lende: “Kowa, kai lell kau tchawes pash peste pre an miro lab, kowa lell man pash peste pre. Koon man pre lella, kowa lell koles pre, kai bitchras man. Koon mashkral tumende o tikneder hi, kowa hi baro.”

⁴⁹Koi penas o Johanni ap o Jesuseste: “Rai, mer dikam i murshes. Kowa tradas i bengen win an tiro lab. Un kowa his kek mendar. Doleske penam leske: Ma kre kowa buder!”

⁵⁰O Jesus penas ap lende: “Mukenn les! Koon hi gar tchilatcho ap tumende, kowa hi ap tumari rig tardo.”

⁵¹Har ko tsiro kai his, te well o Jesus maredo, kras pes lo ap o drom, te djal lo an o foro Jerusalem. Un kek nai rikras les pale.

⁵²Un job bitchras murshen glan peste ap kau drom. Kolla djan, un wan an i gab an o them Samaria.[29] Kote rodan jon leske i kheer, kai nai atchell lo pral i rati.

⁵³I menshe an ko gab shunan, kai kamell lo an o foro Jerusalem te djal. Doleske lan jon les gar pash pende pre.

⁵⁴Har leskre mala, o Jakobo un o Johanni, kowa dikan, penan jon ap leste: “Rai, te kameh tu, mukah mer jag dran o bolepen tele te perell, hoi chatchrell len.”

⁵⁵O Jesus rissras pes trujel, un tchingras ap lende.

⁵⁶Un jon djan an i wawar gab.

⁵⁷Un har jon ap o drom his, penas i mursh ap o Jesuseste: “Me kamau tuha te djal, kai tu ninna djah.”

⁵⁸Penas o Jesus ap leste: “I diwje djuklen hi i tchiben an i phub, kai sowenn le. Un i tchirklen hi i tikne khera ap i ruka. Me, o Menshengro Tchawo, man hi tchi, kai nai tchiwap man tele, te sowap.”

⁵⁹Ap i wawar mursheste penas job: “Am mantsa!” Kowa penas: “Muk man khere te djal, te paskrap miro dades! Pal kowa djau tuha.”

⁶⁰Penas o Jesus ap leste: “Muk kol mule pengre mulen te paskrell! Dja un pen i menshenge, kai o tsiro kanna kai hi, kai o Dewel kamell len dran o tchilatchepen te lell, un kamell lengro rai te well!”

⁶¹Un i wawar mursh penas ap o Jesuseste: “Me kamaus te djap khere, te penap mire menshenge: Atchenn mo Debleha! Un palle kamoms tuha te djal.”

⁶²Ap leste penas o Jesus: “Koon kamell o Debleske te budrell, un dikell ap wawar koowa, kowa budrella gar mishto o Debleske. Job hi har i hacho, kai budrell ap peskri kotar phub, un dikell pal peste. Leskri budi hi tchi moldo.”